NA DAUVEILEWAI 15
15
Sa vakama na nodra sila na kai Filisitia ko Samisoni, 1-5. Sa ra mai vala kaya, ka sa mokuti ira vakarua ko Samisoni, 6-17. Sa malumalumu e na viagunu, ka caka mana na Kalou me gunu kina ko koya, 18-20.
1Ia emuri, e na vula ka tamusuki kina na witi, sa la'ki raici watina ko Samisoni, ka kauta e dua na luve ni me; ka kaya, Au na lako vua na watiqu ki loqi. A sa sega ni laivi koya me curu kina ko tamana na yalewa. 2A sa kaya na tama ni yalewa, Au a kaya sa dina ga ko sa cati koya; ka'u a soli koya kina vua na nomu i tau: sa sega li ni matavinaka cake ko tacina? me nomu mada ga ko koya, me kenai sosomi.
3A sa kaya e na vukudra ko Samisoni, Au na qai dodonu ga ka ra cala na kai Filisitia, kevaka ka'u sa vakacacani ira. 4A sa lako ko Samisoni, ka toboka e tolu na drau na fokise, ka saumaka me veiuturi na buidra ka qai bukuya vata vakayayarua, ka vauca e dua na cina e na maliwa ni buidra yarua kecega. 5A sa tutuvaka na veicina, ka biuti ira me ra lako e loma ni nodra sila na kai Filisitia sa sega ni tamusuki, ka sa vakama na veibinibini sila, kei na sila sa sega ni tamusuki, kei na veiwere ni olive.
6A ra sa taro na kai Filisitia, O cei sa cakava na ka oqo? A ra sa kaya, Ko Samisoni, na vugona na kai Timinaca, ni sa kauta ko koya na watina, ka solia ki na nonai tau. A ra sa lako cake na kai Filisitia, ka vakamai koya na yalewa kei na tamana e na bukawaqa.
7A sa kaya vei ira ko Samisoni, Dou sa cakava na ka oqo, ia ka'u na sauma mada ga vei kemudou, ka'u na qai vakacegu. 8A sa mokuti ira e na moku levu, ka sa ravusebetaki ira: a sa lako sobu ko koya, ka sa tikotiko ga e na yasa ni vatu ko Etami.
9A ra sa lako cake na kai Filisitia, ka tiko vakaivalu mai Juta, ka sa robota na vanua mai Liai. 10A ra sa kaya ko ira na mataqali i Juta, A cava dou sa lako cake mai kina vei keimami? A ra sa kaya, Keimami sa lako cake mai me vesuki Samisoni, me keimami cakava vua me vaka sa cakava vei keimami ko koya. 11Sa qai lako sobu e lewe tolu na udolu na tamata vei ira na mataqali i Juta, ki na yasa ni vatu ko Etami, a ra sa kaya vei Samisoni, Ko sa sega li ni kila ni ra sa lewai keda na kai Filisitia? ia a cava na ka oqo ko sa cakava vei keimami? A sa kaya vei ira ko koya, au sa cakava ga vei ira me vaka na ka era sa cakava vei au. 12A ra sa kaya vua, Keitou sa lako sobu mai me vesuki iko, me soli iko ki na ligadra na kai Filisitia. A sa kaya vei ira ko Samisoni, Dou bubului mada vei au mo dou kakua ni mokuti au koi kemudou. 13A ra sa kaya vua, Sa vinaka; ia keitou na vesuki iko matua ga, ka soli iko ki na ligadra: ia keitou na sega sara ni vakamatei iko. A ra sa vesuki koya e na dali vou e rua, ka kauti koya cake mai na vatu.
14Ni sa yaco ko koya ki Liai, era sa kaikaila na kai Filisitia ni ra sa la'ki tavaki koya: a sa curumi koya vakaukauwa na Yalo i Jiova, a sa vuki sara na dali e ligana me vaka na wa sa kama yavu, a sa tasere mai na ligana na kenai vesu. 15A sa kunea ko koya e dua na kau-ni-bati vou ni asa, a sa dodoka na ligana, ka taura, ka mokuta kina e le dua na udolu na tamata. 16A sa kaya ko Samisoni, E na kau-ni-bati ni asa sa dua nai binibini, sa rua nai binibini, E na kau-ni-bati ni asa ka'u sa mokuta e le dua na udolu na tamata.
17Ia ni sa vosa oti ko koya, sa qai biuta tani e ligana na kau-ni-bati, ka vakayacana na tikina ko ya ko Rama i Liai [Na biu ni kau-ni-bati].
18A sa mate e na viagunu; a sa tagi vei Jiova, ka kaya, O ni sa ia na veivakabulai levu oqo e na ligaqu na nomuni tamata: ia ka'u na qai mate beka e na viagunu, ka ra na tauri au ko ira sa sega ni cili? 19A sa kavidalaka na vatu mai Liai na Kalou, a sa vure maikina na wai, a sa gunu ko koya, ka sa lesu tale mai na yalona, ka sa bula mai: o koya sa vakatoka kina na yacana ko Eni-akori [Nai vurewai mei koya ka tagi], ko ya mai Liai, ka yacova na siga oqo.
20A sa lewai ira na Isireli ko koya, e na nodra gauna na kai Filisitia, ka yabaki ruasagavulu.
Currently Selected:
NA DAUVEILEWAI 15: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
