NA DAUVEILEWAI 12
12
Sa ra veileti ka veivala ko Jefica kei ira na Ifireimi, 1-6. Sa ciba ko Jefica, 7. A kedrai tukutuku na turaga-ni-lewa eso, 8-15.
1A ra sa kacivi vata na kai Ifireimi, ka lako yani vaka ki na tokalau, a ra sa kaya vei Jefica, A cava ko a lako yani kina me veivala kei ira na luve i Amoni, ka sega ni kacivi keimami me lako vata kei iko? keimami na vakama e na bukawaqa na nomu vale, kei iko talega. 2A sa kaya vei ira ko Jefica, Koi au kei ira na noqu tamata, keimami sa veidre sara kei ira na luve i Amoni; ia ka'u a kacivi kemudou, ia dou a sega ni vakabulai au mai na ligadra. 3Ia ni'u a raica dou a sega ni ia na veivakabulai, ka'u a bolea sara na mate ka lako yani vei ira na luve i Amoni, a sa soli ira ko Jiova ki na ligaqu: ia ka cava dou sa lako mai kina vei au edaidai, mo dou vala kei au?
4A sa vakasoqoni ira vata kecega na kai Kiliati ko Jefica, ka vala kei ira na Ifireimi: a ra sa mokuti ira na Ifireimi ko ira na kai Kiliati, ni ra sa kaya, Koi kemudou na Kiliati ka se: ka tiko ga e na kedra maliwa na Ifireimi, kei na Manasa, koi kemudou. 5A ra sa rawa eliu na veivutovuto ni Joritani, ko ira na kai Kiliati, era bera ko ira na Ifireimi: ia ni ra sa kaya ko ira na Ifireimi era a dro, Me'u lako yani ki tai kadua, era sa qai taroga vua ko ira na kai Kiliati, Na Ifireimi ko iko, se segai? ia kevaka sa kaya, E segai; 6era sa qai kaya vua, Mo cavuti Jiboleta: a sa cavuti Siboleta ko koya: ni sa gato ko koya: era sa qai tauri koya, ka vakamatea mai na veivutovuto ni Joritani: a sa bale vei ira na Ifireimi e na gauna ko ya e le vasagavulu ka rua na udolu.
7A sa lewai ira na Isireli ko Jefica ka yabaki ono. Sa qai mate ko Jefica na kai Kiliati, a sa bulu e na dua na koro mai Kiliati.
8A sa taravi koya ko Ipisani na kai Pecileema, a sa lewai ira na Isireli. 9A sa le tolusagavulu na luvena tagane, ka sa le tolusagavulu na luvena yalewa, o ira sa tala tani ko koya; a sa kauta mai e le tolusagavulu na goneyalewa me watidra na luvena tagane. A sa lewai ira na Isireli ko koya ka yabaki vitu. 10Sa qai mate ko Ipisani, a sa bulu mai Pecileema.
11A sa taravi koya ko Eloni, e dua vei ira na Sepuloni, me lewai ira na Isireli: a sa lewai ira na Isireli ko koya ka yabaki tini. 12A sa mate ko Eloni, e dua vei ira na Sepuloni, a sa bulu mai Eijaloni e na vanua nei Sepuloni.
13A sa taravi koya me lewai ira na Isireli ko Apitoni na luve i Ileli, na kai Piraconi. 14A sa le vasagavulu na luvena na tagane, a sa le tolusagavulu na makubuna tagane, a ra sa dauvodoka na asa tagane e vitusagavulu: a sa lewai ira na Isireli ko koya ka yabaki walu. 15A sa mate ko Apitoni na luve i Ileli, na kai Piraconi, a sa bulu mai Piraconi e na vanua nei Ifireimi, mai na nodra ulu-ni-vanua na Amalekaiti.
Currently Selected:
NA DAUVEILEWAI 12: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
