AISEA 66
66
Sai tikotiko ni Kalou na yalo sa dina ka malumalumu, 1,2. Sa vakatatabui sara nai valavala ni lotu vaka-Juta, 3,4. Era sa vakacegui ko ira na yalodina era vakacacani, 5-14. Era cudruvi na lewe vuqa era sa vuki tani me ra qarava na ka lasu, 15-17. Era na lesi me rai talatala ni Kalou ki vuravura taucoko ko ira na lewe vica sa vo vei ira era vakabauta, ena yaco na nodra cakacaka, era na raica talega na nodra ca na tamata ca, 18-24.
1Sa kaya vakaoqo ko Jiova, Sa noqu i tikotiko vakaturaga, ko lomalagi, ia ko vuravura, sai tutu-ni-yavaqu: a vale cava dou na tara me noqu? se tikina cava me noqu i vakavakacegu? 2Ia na ka kecega oqo sa bulia na ligaqu, ka sa tu mai na ka kecega oqo, sa kaya ko Jiova: ia na tamata oqo ka'u na goleva, io ko koya sa yalomalumalumu ka ramusu na yalona, ka sa rerevaka na noqu vosa.
3Ko koya sa vakamatea na pulumokau mei soro, sa vaka e dua sa yavita na tamata; ko koya sa vakacabora na lami, sa vaka e dua sa muduka na domo ni koli; ko koya sa cabora nai madrali, sa vaka e dua sa cabora na dra ni vuaka; ko koya sa cabora nai madrali boi vinaka, sa vaka e dua sa vosavakalougatataka na ka lasu wale. Io ko ira oqo era sa digitaka na nodra sala, ka ra sa vinakata e na yalodra na nodra ka vakasisila. 4Io koi au, ka'u na digitaka na ka ni nodra veivakaocataki wale; ia na ka era sa rerevaka ka'u na vakayacora vei ira; ka ni'u a kaci, ka sa sega e dua e rogo mai, ka'u a vosa, ka sa sega e dua e rogoca, ia era sa cakava na ka ca e mataqu, ka ra sa digitaka na ka ka'u sa sega ni vinakata.
5Dou rogoca na vosa i Jiova, koi kemudou sa rerevaka na nona vosa; Ko ira na wekamudou, ka cati kemudou, ka biuti kemudou tani e na vuku ni yacaqu, era sa kaya, Me vakarokorokotaki ko Jiova: ia ena rairai ga ko koya mo dou reki kina, ka ra na madua ga ko ira.
6A domo ni ue ka rogo mai na koro! A domo ka rogo mai na vale ni soro! A domo i Jiova sa saumi ira tiko na nona meca! 7Ni sa bera na nona taratara, sa vakasucu ko koya; ni sa bera na nona yaluma sa vakasucuma e dua na gonetagane. 8Ko cei sa rogoca e dua na ka vakaoqo? ko cei sa raica na ka vakaoqori? Me vakasucumi li e dua na vanua e na siga e dua bau? se me sucu vata li na lewe ni dua na matanitu? ia ni sa qai taratara ko Saioni, sa vakasucumi ira na luvena. 9Me'u vakayacora beka na taratara, ka sega ni vakayacora talega na vakasucu? sa kaya ko Jiova: se me'u vakayacora beka na vakasucu, ka qai sogota tale? sa kaya na nomu Kalou.
10Dou reki vata kei Jerusalemi, ka marautaki koya, koi kemudou kecega sa lomani koya; dou reki vakalevu vata kaya, koi kemudou kecega sa tagicaki koya: 11mo dou sucuma na sucuna sa dauveivakacegui, ka mamau kina; mo dou lobaka, ka marautaka na kena levu ni nona lagilagi.
12Ni sa kaya vakaoqo ko Jiova, Raica, ka'u na vakayacora vua na sautu me vaka na uciwai, kei na nodra i yau na veimatanitu me vaka na wai drodro e vuabale: ia dou na qai sucuma, dou na keveti voli e na sarisarina, ka tenei e na duruna. 13Me vaka e dua sa vakaceguya ko tinana, ka'u na vakacegui kemudou vakakina: ia dou na vakacegui, e Jerusalemi. 14Ia dou na kunea, ka na reki na lomamudou, ka bulabula na suimudou me vaka na co: ena kilai na liga i Jiova vei ira na nona tamata, ia ena cudruvi ira na nona meca.
15Ni na lako dina mai ko Jiova e na bukawaqa, ena vaka talega na covulaca na nona qiqi-ni-valu, me ia na nona veisausaumi e na cudru katakata, kei na nona veivunauci e na yameyame ni bukawaqa. Na bukawaqa, kei nai seleiwau, sa na ia kina na veilewai kei ira na tamata kecega, ko Jiova: 16ia era na lewe vuqa ena vakamatea ko Jiova.
17Ko ira era ia na veivakatabui, kei ira era ia na veivakasavasavataki e na veiwere, ka ra muri koya e dua sa tiko e loma, ka ra sa kana vuaka, kei na ka vakasisila, kei na kalavo, era na vakaoti vata ga, sa kaya ko Jiova. 18Ia koi au ka'u sa kila na nodra cakacaka kei na nanuma ni lomadra: ia, ka'u na vakasoqoni ira vata na lewe ni veivanua kecega kei na dui vosavosa; ka ra na lako mai ka raica na noqu totoka. 19Ia ka'u na solia e na kedra maliwa e dua nai vakatakilakila; ka'u na talai ira era sa vo ki na veivanua, ki Tasisi, kei Puli, kei Luti, era dauloqata na dakai titi, ki Tupali, kei Javana, na veiyanuyanu vakayawa, era sa sega ni rogoca na noqu totoka, se raica na noqu lagilagi; a ra na tukuna na noqu i ukuuku e na veivanua. 20A ra na kauti ira kece na wekamudou mai na veivanua, mei cabocabo vei Jiova, e na ose, kei na qiqi-ni-tamata, kei na tavata, kei na meule, kei na kameli, ki na noqu ulu-ni-vanua tabu ko Jerusalemi, sa kaya ko Jiova, me vakataki ira na Isireli era kauta mai nai cabocabo e na bilo savasava ki na vale i Jiova. 21Ia ka'u na lesia talega eso vei ira na Livai me ra bete, sa kaya ko Jiova.
22Me vaka sa na tu e mataqu na lomalagi vou kei na vuravura vou ka'u sa cakava, sa kaya ko Jiova, ena tu vaka talega kina na nomudou kawa kei na yacamudou. 23Ia mai na vula e dua ka yacova na vula kadua, ka mai na siga tabu e dua ka yacova na siga tabu kadua, era na lako mai na tamata kecega me ra mai cuva e mataqu, sa kaya ko Jiova. 24A ra na lako yani, ka raica na yago ni tamata era sa mate era vuki tani vei au: ni na sega ni mate na kedra baca, ena sega talega ni bokoci na kedra bukawaqa; ka ra na ka vakasisila vei ira na tamata kecega.
Currently Selected:
AISEA 66: FOV
Highlight
Copy
Compare
Share
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
