AISEA 52
52
Era sa vakaroti na lewe ni lotu me ra vakabauti koya sara na nodra i Vakabula, 1-6. Sa ka vinaka sara nai tukutuku ni bula, 7-10. Me biu ko Jerusalemi, ka vakabau ga na Mesaia, na Kalou ni Isireli, 11,12. Sa tukuni mai ko koya na Mesaia, 13-15.
1Mo yadra mai, mo yadra; vakaisulutaki iko e na nomu kaukauwa, Saioni; mo vakaisulutaki iko e na nomu i sulu vakaiukuuku, Jerusalemi, na koro tabu: ni na sega tale ni curumi iko ko ira na sega ni cili kei ira na dukadukali. 2Ceburaka tani vei iko na kuvu ni soso: tu cake, mo la'ki tiko, Jerusalemi: sereka tani nai vau ni domomu, ko iko na goneyalewa ni Saioni na bobula.
3Ni sa kaya vakaoqo ko Jiova: Dou a volitaki wale; ia dou na voli tale ia ka sega e nai lavo. 4Ni sa kaya vakaoqo na Turaga ko Jiova, Era sa lako sobu eliu ko ira na noqu tamata ki Ijipita, me ra tiko vulagi kina; ia ko Asiria sa vakasaurarataki ira wale: 5ia oqo, a cava me'u cakava eke, sa kaya ko Jiova, ni ra sa kau tani walega na noqu tamata, ko ira ka lewai ira era kaikaila, sa kaya ko Jiova, ka sa vosavakacacataki ga na yacaqu e na veisiga kecega? 6O koya oqo era na kila ga kina na yacaqu na noqu tamata; o koya oqo era na kila kina e na siga ko ya ni sai au oqo sa kaya, Raici au!
7Na kena lagilagi e na ulu-ni-vanua na yava i koya sa kauta mai nai rogorogo vinaka, sa vakarogoya mai na sautu, sa kauta mai nai rogorogo vinaka ni ka vinaka, ka vakarogoya mai na veivakabulai, ka sa tukuna mai ki Saioni, Sa lewa na nomu Kalou! 8A domodra na nomu i vakatawa! era sa tabalaka na domodra, era ia vata na nodra kaila: ni ra na raica e na matanavotu ni sa lesu mai ki Saioni ko Jiova. 9Dou lagata mai na sere ni marau, dou kaikaila vata, na veiyasana lala ni Jerusalemi: ni sa vakacegui ira na nona tamata ko Jiova; ka sa vakabulai Jerusalemi. 10Sa vakaraitaka mai ko Jiova na ligana tabu e matadra na veimatanitu kecega; ia nai yalayala kecega kei vuravura ena kunea na bula sa maivei koya na noda Kalou.
11Dou lako, dou lako, lako tani eke; dou kakua ni tara na ka sa sega ni savasava; dou lako tani mai vua; dou savasava mai, koi kemudou ka kauta nai yaya nei Jiova. 12Ni na sega ni vakariri na nomudou lako tani, ia dou na sega ni dro ni dou sa lako tu: ni sa kemudoui liuliu ko Jiova, kei na kemudoui murimuri na Kalou ni Isireli.
13Raica, ena cakacaka vakavuku ko koya na noqu i talatala, ena vakalevulevui ka vakacaucautaki, ia ena cecere sara. 14Me vaka era kurabuitaki iko na lewe vuqa, ni sa vakacacani vakalevu na matana ka vakalailai na mata ni tamata kecega, kei na yagona talega me sega ni vakataki ira na luve ni tamata: 15ena vakakina, ena kureitaka na veimatanitu e vuqa; era na galu ko ira na tui e na vukuna: ni ra na kunea na ka sa sega ni tukuni vei ira; kei na ka era sa sega ni rogoca era na kila.
Currently Selected:
AISEA 52: FOV
Highlight
Copy
Compare
Share
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
