AISEA 46
46
Sa vakabobulataki na kedrau matakau na kalou ni Papiloni, 1,2. Sa vakabulai ira tiko na nona tamata na Kalou, 3,4. Sa ka lialia sara na matakau, ia sa kaukauwa sara na Kalou ka vuku talega, 5-13.
1Sa cuva sobu ko Peli, sa vakalairoro ko Nipo; a kedrau matakau sa toka e na daku ni manumanu, kei na daku ni pulumokau; sa vakavodoki tu na nomudou i kaukau, sai colacola bibi ki na manumanu sa oca. 2Erau sa vakalairoro, erau sa cuva sobu vata; erau sa sega ni vakabula rawa nai colacola bibi, a rau sa kau vakabobula lako koi rau.
3Dou vakarorogo mai vei au, na mataqali i Jekope, kei kemudou kece na kena vo ni mataqali i Isireli; koi kemudou ka'u sa keveta voli mai na kete, ka roqota voli mai na gauna dou sa sucu kina: 4ia ka'u sai koyakoya tikoga ka yacova na gauna dou na qase kina; ka'u na keveti kemudou mo dou sa sika mada ga: ka'u a bulia, ia ka'u na ia tikoga na veikeveti, kei na veiroqoti, ka'u na ia talega na veivakabulai.
5Dou na vakatautauvatataki au, ka vakarauvatani au, ka vakatauvatani au kei cei, me keirau tautauvata kaya? 6Era sa sova vakailoa na koula mai na taga, ka vakarauta na siliva e na kenai vakarau; era sa volia e dua na matai ni koula, ka sa cakava ko koya me kalou: era sa cuva sobu, io, era sa sorova: 7era sa tauca ki domodra, era sa colata voli; era sa viritura e na kenai tutu, a sa tu ga; ena sega ni lako tani mai na kenai tutu: io, e dua sa na kaci vua, ka sa sega ni rogo mai; se vakabulai koya mai na nona rarawa.
8Dou vakananuma na ka oqo, ka mo dou tu dei ga; dou vakasara ki na lomamudou, koi kemudou na dauvuki tani. 9Dou vakananuma na ka makawa eliu ni sai au na Kalou, ka sa sega tale e dua: sai au na Kalou, ka sa sega e dua me keirau tautauvata kaya, 10ka'u sa dautukuna na kenai vakataotioti mai na kenai vakatekivu, ia mai na gauna eliu ka'u sa tukuna na ka sa bera ni caka; ka'u a kaya, Na noqu lewa ena tu ga; ia na ka kece ka'u sa vinakata ka'u na cakava ga: 11ka'u sa kaciva na ikeli mai na tu-i-cake, kei na tamata sa na vakayacora na noqu i naki, mai na vanua yawa: ka'u sa cavuta, ka'u na vakayacora talega: ka'u sa nakita, ka'u na cakava talega.
12Dou vakarorogo vei au, koi kemudou sa yalokaukauwa, ka sa veiyawaki kei na cakacaka dodonu: 13au sa kauta voleka mai na noqu cakacaka dodonu, ena sega ni yawa; kei na veivakabulai ka'u sa ia, ena sega ni berabera; ia ka'u na tauca na bula mai Saioni me nodra na Isireli na noqu lagilagi.
Currently Selected:
AISEA 46: FOV
Highlight
Copy
Compare
Share
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
