AISEA 37
37
Sa vakamalumalumutaki koya vei Jiova ko Esekaia, a sa talaki vei Aisea, ka sa qai vakacegui kina, 1-7. Sa suka tani e Jerusalemi nai valu ni meca, ka sa qai vola mai ko Senakaripi vei Esekaia, ka sa vosavakacacataki Jiova, 8-13. A masu i Esekaia, kei na vosa i Jiova vua, 14-35. Sa yaviti ira na kai Asiria e dua na agilose, 36. Sa moku mai Ninive ko Senakaripi, 37,38.
1Ia ni sa rogoca ko Esekaia na tui, sa qai dresulaka na nonai sulu, ka ubi koya e nai sulu taga, ka la'ki curu ki na vale i Jiova.
2Ka sa talai Elaiakimi, ko koya sa lewa na vale levu, kei Sepina na vunivola, kei iratou sa qase vei ira na bete, ka ratou sa vakaisulu e nai sulu taga kivei Aisea na parofita na luve i Emosi. 3A ratou sa kaya vua, Sa kaya vakaoqo ko Esekaia, Sa siga ni veivakararawataki oqo, kei na veivunauci, kei na vosaveivakacacataki; ni sa voleka ni sucu ko ira na gone, ka sega na kaukauwa me ra vakasucumi kina: 4Ena rogoca beka ko Jiova na nomu Kalou na vosa kecega i Rapisake, ko koya sa tala mai ko tui Asiria na nona turaga me vosavakacacataka na Kalou bula: ka na sauma na vosa sa rogoca ko Jiova na nomu Kalou: o koya mo qai masu kina e na vukudra na lewe lailai era vo tiko.
5Ka sa qai lako vei Aisea ko iratou nai talaki i Esekaia na tui. 6A sa kaya vei iratou ko Aisea, Dou kaya vakaoqo vua na nomudou turaga. Sa vaka ko Jiova, Mo kakua ni rere e na vuku ni vosa ko sa rogoca, sa ratou vosavakacacataki au kina ko iratou na nona tamata na tui Asiria. 7Raica, ka'u na liwavi koya e na cagi, ia ena rogoca ko koya e dua na rogorogo, ka na lesu yani ki na nona vanua; ia ka'u na vakabalei koya e nai seleiwau e na nona vanua.
8Ka sa lesu yani ko Rapisake, a sa kunei tui Asiria ni sa vala tiko kei Lipina; ni sa rogoca eliu ko koya ni sa lako tani mai Lakisi. 9Ka sa rogoca ko koya na tui ni sa kainaki e na vuku i Tiraka, na tui Iciopea, ka vaka, Sa mai veivala kei iko ko koya: ia ni sa rogoca na ka oqo, sa baci tala tale eso na tamata vei Esekaia, ka kaya, 10Dou kaya vakaoqo vei Esekaia na tui Juta, Me kakua ni vakaisini iko na nomu Kalou, ko koya ko sa vakararavi kina, ni sa kaya, Ena sega ni soli ko Jerusalemi ki na liga i tui Asiria. 11Raica, ko sa rogoca oti na ka era sa cakava na tui Asiria ki na veivanua kecega, ni ra sa vakarusa sara; ia ko na vakabulai beka ko iko? 12Era sa vakabula li ko ira na nodra kalou na veivanua ka vakarusa ko iratou na noqu qase, io ko Kosani, kei Arani, kei Resefi, kei ira na luve i Iteni era tiko mai Tilasari? 13sa evei ko tui Emaci, kei tui Apati, kei na tui ni koro ko Sifaveimi, kei Ena, kei Iva?
14A sa taura nai vola ko Esekaia mai na ligadratou nai talaki, ka wilika: ka sa lako cake ko Esekaia ki na vale i Jiova, ka sa tevuka e na mata i Jiova. 15Ka sa qai masu ko Esekaia e na mata i Jiova, ka kaya, 16Kemuni Jiova ni lewe vuqa, na neimami Kalou na Isireli, koi kemuni sa tiko e na tadrua ni jerupi, sai kemuni na Kalou duaduaga, ni veimatanitu kecega kei vuravura: koi kemuni ka buli lomalagi kei vuravura: 17Kemuni Jiova, mo ni vakalakala daligamuni, ka vakarorogo: Kemuni Jiova, mo ni rai mada mai, ka raica; ka rogoca na vosa i Senakaripi, ko koya sa talatala mai me vosavakacacataka na Kalou bula. 18E dina ga, Jiova, ko iratou na tui Asiria, eratou sa vakarusa na lewe ni veivanua kei na nodra vanua, 19a ratou sa biuta ki na bukawaqa na nodra kalou: ni ra sa sega ni kalou, na cakacaka walega ni liga ni tamata, na kau kei na vatu: ia eratou sa vakarusai ira kina. 20Ia oqo, Jiova na neimami Kalou, mo ni vakabulai keimami mada mai na ligana, me kila kina na veimatanitu kecega e vuravura ni sai kemuni duaduaga ko Jiova.
21A sa talaki vei Esekaia ko Aisea na luve i Emosi, ka kaya: Sa vosa vakaoqo ko Jiova na noda Kalou na Isireli, Na ka ko sa masu kina vei au e na vuku i Senakaripi na tui Asiria: 22oqo na vosa sa vosataka ko Jiova e na vukuna: Na goneyalewa, na luve i Saioni, sa beci iko, ka dredrevaki iko ko koya; sa kurea vei iko na uluna na goneyalewa ni Jerusalemi! 23Ko sa vosavakacacataki cei, ka vakalialia? ia vei cei beka ko sa tabalaka na domomu, ka ta cake kina? vei Koya ga na Yalosavasava i Isireli. 24Ko sa vosavakacacataki koya na Turaga e na gusudra na nomu talai, ni ko sa kaya, E na noqu qiqi-ni-valu e vuqa, ka'u sa cabeta na kena cecere ni veiulu-ni-vanua, ki na yasa i Lepanoni, ia ka'u na taya sobu na kena veisitari babalavu, kei na kena veidamanu vinaka: ka'u na yacova na kenai yalayala cecere sara, kei na kena veikau bulabula: 25ka'u sa kelia ka gunuva na wai; ka vakadiva e na qeteqete ni yavaqu na uciwai kecega ni Ijipita. 26Ko sa sega beka ni rogoca makawa, ni'u sa cakava; ka ni'u a lesia e a gauna mailiu? ia oqo ka'u sa qai vakayacora, ka na yaco kina mo cakava me bukebuke walega na veikoro sa vakabai. 27O koya era sa malumalumu kina na lewena, era sa yalolailai ka taqaya: era sa vaka na co ni vanua, kei na co bulabula sa qai rovu, na co mai na dela ni vale, kei na sila sa malai ni sa sega ni tubu cake. 28Ia ka'u sa kila na nomu tiko, kei na nomu curu ki tuba, kei na nomu curu ki loma, kei na nomu cudru levu vei au. 29Ia ni sa lako cake mai ki na daligaqu na nomu cudru vei au, kei na nomu viavialevu, ka'u na qai qilaita kina na ucumu e na noqu i qila, ka vakaciqira na noqu i tarovi ki na gusumu, ia ka'u na vakasukai iko yani e na sala ko a lako mai kina.
30Ia oqo na kenai vakadinadina vei iko, Dou na kania e na yabaki oqo na ka sa tubu walega; e na kenai karua ni yabaki dou na kania na ka sa tubu walega maikina: ia e na kenai katolu ni yabaki dou kaburaka, ka tamusuka, ka tea eso na were-ni-vaini, ka kania na vuana. 31Ia ko ira na bula sa vo e na mataqali i Juta era na tei sobu tale, ka vua ki cake. 32Ni na lako tani mai Jerusalemi na kena vo, kei ira era dro bula mai na ulu-ni-vanua ko Saioni: ena rawata na ka oqo na gugumatua i Jiova ni lewe vuqa.
33O koya sa kaya kina vakaoqo ko Jiova e na vuku i tui Asiria, Ena sega ni curu mai ki na koro oqo, se vanataka kina e dua na gasau, se mai tu kina vakaisasabai, se viri suva kina: 34na sala sa lako mai kina, ena lesu tale kina, ka na sega ni curu ki na koro oqo, sa kaya ko Jiova. 35Ia ka'u na vakaruruga na koro oqo me'u vakabula e na vukuqu, e na vuku talega i Tevita na noqu i talatala.
36Ka sa lako yani na agilose i Jiova, ka yavita e na nodra i tikotiko ni valu na kai Asiria e dua na drau ka walusagavulu ka lima na udolu: ia ni ra sa sou e na mataka, raica, era sa mate sara kecega. 37A sa lesu tani ko Senakaripi na tui Asiria, ka la'ki tiko mai Ninive. 38Ia ni sa soro tiko e na bure i Nisiroki na nona kalou, erau sa vakamatei koya e nai seleiwau koi rau na luvena ko Etirameleki kei Saresa: ka rau sa dro bula ki na vanua ko Aminia. Sa qai buli me tui ko Esa-atoni na luvena, me kenai sosomi.
Currently Selected:
AISEA 37: FOV
Highlight
Copy
Compare
Share
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
