AISEA 32
32
A kena vinaka na matanitu ni Mesaia, 1-8. Sa vakatakilai na ka ca me liu, me qai yaco emuri na sautu, 9-20.
1Raica, ena buli e dua na tui me ia na lewa dodonu, ko ira talega na turaga era na lewa vakadodonu. 2Ia ena dua na tamata ena vaka nai vunivuni mai na cagi, kei nai vakaruru mai na cava; ena vaka na uciwai e na vanua dravuisiga, ka vaka na yaloyalo ni vatu levu e na vanua dauveivakaocataki. 3A matadra era rai rawa ena sega ni buawa, kei na daligadra era rogo rawa ena vakarorogo: 4a lomadra talega na yaloriri ena kila mai na vuku, ka na vosa rawarawa ka macala na yamedra na daukaka. 5O koya sa lialia ena sega ni vakatokai tiko me yalovakaturaga, se tukuni me lomasoli ko koya sa kocokoco. 6Ia ko koya sa lialia ena vosataka ga na ka sesewa, ka caka ca tiko na lomana, me ia na veivakaisini, ka vosa cala vei Jiova, me vakalalataka na yalo i koya sa viakana, ka vakayalia na mena wai na tamata sa viagunu. 7Ia na nonai yaya na daukocokoco na ka ca; sa daubukia na vere ca me vereti ira kina era sa yalomalua io ni ra vosa vakadodonu ko ira era dravudravua. 8Ia ko koya sa lomasoli sa vakananuma na cakacaka loloma, ia e na cakacaka loloma ena dei ga kina ko koya.
9Koi kemudou na yalewa sa dautiko wale, dou tu cake, rogoca na domoqu; oi kemudou na goneyalewa sa wele tiko, dou vakatu daliga ki na noqu vosa. 10Ena yabaki dua ka bogi vica dou na sautaninini kina, koi kemudou na yalewa sa wele tiko: ni na yali na vua ni vaini, ena sega ni yaco na vula i matua. 11Dou taqaya, na yalewa dautiko wale; dou kidroa, oi kemudou sa wele tiko: dou luvawale mada, ka vauca nai sulu ca ki na tolomudou, 12ka yavita na lomaseremudou ni sa qai ca mai na veiwere vinaka, kei na vaini bulabula. 13E na nodra vanua na noqu tamata ena tubu ga na kau vakavotona kei na soni; io, e na dela ni veivale daumarau kecega e na koro daureki: 14ni sa biu laivi na vale vakaturaga: ka sa lala mai na koro ka tawa; na koro ni valu kei na veivale cecere sa qai yaco me qara wale tu ka sega ni mudu ka me ra rekitaka na asa kila, ka me kedra vanua veico na sipi; 15me sa sovaraki mada vei keda na Yalo mai cake, ka sa yaco na lekutu me were bulabula, ka sa wili na were bulabula me veikau. 16Ena qai tiko mai na lekutu na lewa dodonu, ka na tiko e na were bulabula nai valavala dodonu. 17Ia mai na cakacaka dodonu ena tubu na sautu, ia na cakacaka dodonu ena vakatubura na vakacegu kei na tiko dei me sega ni mudu. 18Ia ko ira na noqu tamata era na tikotiko ga e na vanua sa sautu, kei na veivale sa dei, kei nai vakavakacegu vinaka. 19Ia ena tau mai na uca-cevata ki na veikau, me bale ga kina; na koro talega ena vakalolovirataki sara. 20Sa kalougata koi kemudou sa ia na kabukaburaki e na bati ni wai kecega, koi kemudou sa vakauta yani kina na yavadra na pulumokau kei na asa.
Currently Selected:
AISEA 32: FOV
Highlight
Copy
Compare
Share
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
