AISEA 3
3
Na ka ca sa tubu e na nodra i valavala ca na lewe ni vanua, 1-12; era na cudruvi na turaga e na vuku ni nodra i valavala kaukauwa, 13-15; kei ira talega na yalewa e na vuku ni nodra wedewede, 16-24; ena cudruvi sara ko Jerusalemi, 25,26.
1Raica, na Turaga ko Jiova ni lewe vuqa, sa qai kauta tani e Jerusalemi kei Juta na ka kece sara sa bula kina, na madrai kecega sa bula kina, kei na wai kecega sa bula kina, 2Na qaqa talega, kei na tamata i valu, na turaga ni lewa, kei na parofita, kei na rairai kei na qase, 3Na turaga ni lewe limasagavulu, kei koya na tamata sa rogovinaka, kei na lewe ni bose, kei na matai vuku, kei koya sa maqomaqosa na nona vosa. 4Ia ka'u na lesi ira na gone me nodra turaga, ia na gone lalai ena lewai ira. 5A ra na dui ia na veivakasaurarataki na tamata yadua vua e dua tani, vua talega na kai nona: era na cakacaka vakavosalevu na gone vua na qase, kei na kaisi botoboto vua na tamata turaga. 6E dua na tamata ena qai goleva na tacina e na vale i tamana, ka kaya, Sa tu vei iko nai sulu, mo neitou turaga mada, ia na ca oqo mo lewa ga kina: 7E na siga ko ya ena dulaki liga mai ko koya, ka kaya, Au na sega ni vakabula; ni sa sega na madrai se nai sulu e noqu vale: dou kakua sara ni lesi au me'u lewai ira na tamata. 8Ni sa rusa ko Jerusalemi, ka sa ca ko Juta: ni sa dua tani na nodra vosa kei na nodra i valavala vei Jiova, me vakararawataka na matana vakaiukuuku. 9Ai rairai ni matadra sa beitaki ira ni ra ca; ia na nodra i valavala ca era sa vakavotuya me vakataki Sotoma, era sa sega ni vunia. Ena ca na yalodra! ni ra sa vakacacani ira vakataki ira ga. 10Dou kaya vua na yalododonu ena yaco ga vua na vinaka: ni ra na kania na vua ni nodra i valavala. 11Ena ca ko ira na tamata ca! ena yaco ga vua na ca: na ka sa cakava na ligana ena caka talega vua. 12Era sa gone ga ko ira era sa vakasaurarataki ira na noqu tamata, ka sa lewai ira ko ira na yalewa. Koi kemudou na noqu tamata, ko ira era sa tuberi kemudou era sa vakacalai kemudou, ka vakacacana na sala ko sa lako kina.
13Sa tu mai ko Jiova me ia na veitotaki, sa tu me lewai ira na tamata. 14Ena ia na lewa ko Jiova vei ira na qase ni nona tamata, kei iratou na nodra turaga: Ni sai kemudou ka kania oti na were-ni-vaini; na ka sa kovea mai vei ira na dravudravua sa tu ga e na nomudou veivale. 15A cava dou sa butuki ira sobu kina na noqu tamata, ka butuqaqia na matadra na dravudravua? sa taroga na Turaga ko Jiova ni lewe vuqa.
16A sa kaya talega ko Jiova, Ni ra sa qaciqacia na goneyalewa ni Saioni, ka sa vakateqateqa na nodra i lakolako, ka sa dauvere na matadra, ka sa lako vakamamada, ka sa taqiriqiri tu na vesa ni yavadra: 17o koya ena lewa kina na Turaga me tubura na buradeladra na goneyalewa ni Saioni na mate ka na vakaluvawaletaki ira ko Jiova. 18E na siga ko ya ena luvata tani kina na Turaga na nodra vesa lagilagi, kei na lawa ni drau ni uludra, kei na nodra i taube civa; 19na sau ni daligadra, kei na qato, kei na pulou, 20nai sala, kei na sinucodo ni vesa, kei nai vau, kei na tavaya ka boi vinaka, kei nai vakadaro ni ca, 21na mama, kei nai sau ni ucu; 22nai sulu vakaiukuuku, kei na curucuru, kei na sole, kei na taga ni lavo, 23nai iloilo, kei nai sulu lineni matailalai, kei nai sala, kei na pulou levu mamare. 24Ia ena yaco mei sosomi kei nai saluaki na ka e bona; ka mei sosomi ni vau vakaiukuuku na dali; kei nai sosomi ni ulu sa talitali vinaka na ulu cou; kei nai sosomi ni curucuru nai sulu taga; kei na vakamai mei sosomi ni matavinaka. 25A nomu tagane era na mate e nai seleiwau, kei ira na nomu qaqa, e nai valu. 26Ena levu na tagi kei na yaso e na nona matamata-ni-koro; ia ko koya ni sa lala tu ena tiko sobu e na qele.
Currently Selected:
AISEA 3: FOV
Highlight
Copy
Compare
Share
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
