AISEA 21
21
Na vosa ni parofisai bibi kei Papiloni, 1-10; kei Itomi, 11,12; kei Arepea, 13-17.
1Na vosa ni parofisai bibi kei na lekutu ni waitui. Me vaka sa lako sara mai na covulaca mai na ceva; sa lako vakakina na ca mai na lekutu, mai na vanua rerevaki.
2A raivotu rarawa sa vakavotui mai vei au; sa butako na daubutako, ka sa vakacaca na dauvakacaca. Ko iko Ilama, mo lako cake, Ko iko Mitia Mo la'ki kaba; a nona dauveivakararawataki kecega ka'u sa muduka. 3O koya sa yaluma kina na toloqu; sa tauvi au na rarawa, me vaka na yaluma vua na yalewa sa taratara; ni'u sa rogoca, ka'u sa sautaribariba kina; ni'u sa raica, ka'u sa taqaya. 4Sa sese na yaloqu, sa kidaci au na rere; a bogi ni noqu marau sa vukica ko koya me'u rise kete kina. 5Vakarautaka na tepeli, lesia nai vakatawa, kana, gunu: dou tu cake, na turaga, dou lumuta nai sasabai! 6Ni sa kaya vei au ko Jiova, Mo la'ki lesia e dua nai vakatawa; me tukuna mai ko koya na ka sa raica; 7ni sa kunea ko koya e dua na mataivalu sa vodo tu e na ose, kei na asa, kei na kameli, ka ra yayarua lako; me qai vakarorogo sara ko koya. 8A sa tagi vakalaioni mai ko koya: Noqu turaga, ka'u sa tu ga e na noqu i tutu e na siga ka bogi, ka'u sa vakatawa tu ga e na bogi ka siga: 9ka raica, sa lako mai oqo e dua na mataivalu sa vodo tu, ka yayarua lako. A sa vosa mai ko koya, ka kaya, Sa bale, sa bale, ko Papiloni; ia na matakau ceuceu kece ni nona kalou sa basuraka sobu ki na qele ko koya. 10Ulei na noqu tamata ka dausamuti, kei na sila ni noqu rara ni sila! na ka ka'u sa rogoca maivei Jiova ni lewe vuqa, na Kalou ni Isireli, ka'u sa tukuna yani vei kemudou.
11Na vosa ni parofisai bibi kei Tuma. Sa kaci mai vei au e dua mai Sia, ka kaya, Nai vakatawa, sa vakaevei na bogi? Nai vakatawa sa vakaevei na bogi? 12Sa kaya mai nai vakatawa, Sa kida mai na mataka, sa toro talega mai na bogi: kevaka dou sa via taroga, dou taroga ga: dou lesu tale mai.
13Na vosa ni parofisai bibi kei Arepea. Dou na vakabogi ga mai na veikau ni Arepea, koi kemudou nai vavakoso ni Tetanimi sa lako tu. 14Ko ira na lewe ni vanua ko Tima era sa kauta na wai ki vei koya sa viagunu, era sa tavaki ira era sa dro ka solia vei ira na kedra madrai. 15Ni ra sa dro mai nai seleiwau, mai nai seleiwau sa ucuni tu kei na dakai sa loka tu, kei na kena rarawa ni valu kaukauwa. 16Ni sa vosa vakaoqo vei au na Turaga, Me dua tale na yabaki, me vaka na yabaki ni tamata voli, ena qai oti sara na nodra lagilagi kecega ko Kitari: 17ia na kena vo ni tamata dauvanavana, na qaqa ni Kitari, ena lewe lailai mai: ni sa kaya vakakina ko Jiova na Kalou ni Isireli.
Currently Selected:
AISEA 21: FOV
Highlight
Copy
Compare
Share
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
