AISEA 19
19
Ena ca ko Ijipita, 1-10, ka sese na nodra turaga kei ira na kai Ijipita, 11-17. Era na lotu na kai Ijipita, 18-22, ka tovata ko Ijipita, kei Asiria, kei Isireli, 23-25.
1Na vosa ni parofisai bibi kei Ijipita. Raica, sa vodo tu ko Jiova e na o totolo, ka sa lako mai ki Ijipita; a sa yavala na kalou lasu ni Ijipita e matana, ka sa waicala e lomana na yalo i Ijipita. 2Ia ka'u na vakaveimecakitaki ira na kai Ijipita kei ira na kai Ijipita: ka ra na dui veivala na veitacini, kei na veitokani; na veikoro, kei na veimatanitu. 3Ia ena oca sara na yalo i Ijipita e lomana; ia na kena vuku ka'u na vakaotia: a ra na la'ki taroga na kalou lasu, kei ira na daulawaki, kei ira na daucurumi, kei ira na rairai. 4Ia ka'u na soli Ijipita ki na ligana e dua na turaga yaloca; ena lewai ira e dua na tui yalokaukauwa, sa kaya na Turaga, ko Jiova ni lewe vuqa. 5Ia ena di na wai mai na wasawasa, ka yali na wai mai na uciwai ka na di sara. 6Ia ena boi ca mai na veiuciwai; ena maca ka di sara na soniwai ni Ijipita; ena malai yani na gasau kei na kuta. 7A veico mai na uciwai, mai na bati ni uciwai, kei na were ni sila kecega mai na uciwai, ena malai, ka cagina tani, ka yali sara. 8Ka ra na tagi na gonedau, ka osima kecega era dausiwa ena uciwai, ka ra oca sara ko ira era dauviritaka na lawa ki dela ni wai. 9A ra na taqaya ko ira era daucakacaka e na laino matailalai, kei ira era dautali sulu vulavula. 10A kena duru era na ramusu, ko ira kece talega sa dauvoli na nodra cakacaka ena sa rarawa na lomadra. 11Era sa yalolialia sara na turaga ni Soani, ko ira sa vuku vei ira na lewe ni bose nei Fero sa qai druma sara mai na nodra lewa: dou sa kaya vakacava vei Fero, Au sa luvedra na vuku, na luvedra na tui eliu? 12Sa evei ko ira? sa evei na nomu tamata vuku? me ra tukuna mada vei iko, ia me ra kila mai na ka sa lewa ko Jiova ni lewe vuqa e na vuku i Ijipita. 13Era sa lialia mai na turaga ni Soani, era sa vakacalai na turaga ni Nofi; ka ra sa vakacalai Ijipita ko ira na duru ni kena veimataqali. 14Sa solia ko Jiova ki lomadra na yalovakatani, ka ra sa vakacalai Ijipita e na kena cakacaka kecega, me vaka ni sa yatayata na daumateni e na nona lua. 15Ia ena sega na cakacaka mai Ijipita, me sa cakava rawa na uluna, se na buina, se na tabana, se na kena taria. 16E na siga ko ya ena vakataki ira na yalewa ko Ijipita: ia ena rere ka sautaninini e na mata i Jiova ni lewe vuqa, ni sa laveta na ligana, o koya sa laveta kina ko koya. 17Ia na vanua ko Juta ena ka rerevaki ki Ijipita, ko ira kece era sa cavuta era na rere, e na vuku ni lewa i Jiova ni lewe vuqa, oqori sa lewa ko koya me yacova. 18E na siga ko ya ena lima na koro mai na vanua ko Ijipita ena vosataka na vosa vaka-Kenani, ka bubului vei Jiova ni lewe vuqa; ena vakatokai e dua, Na koro ni veivakarusai. 19E na siga ko ya ena dua nai cabocabo-ni-soro vei Jiova e na loma ni vanua ko Ijipita, ka dua na duru vei Jiova mai na kenai yalayala. 20Ia ena yaco oqori mei vakatakilakila kai vakadinadina vei Jiova ni lewe vuqa e na vanua ko Ijipita: ni ra na tagi vei Jiova e na vukudra na dauveivakasaurarataki, ia ena tala vei ira ko koya e dua nai vakabula, io e dua sa kaukauwa, ka na vakabulai ira ko koya. 21Ia ko Jiova ena kilai mai Ijipita, ka ra na kilai Jiova ko ira na kai Ijipita e na siga ko ya ka ra na vakacaboi soro kei nai madrali, ka ia na bubului vei Jiova, ka vakayacora. 22Ia ena yaviti Ijipita ko Jiova, ena yavita ka vakabula: ka ra na lesu mai vei Jiova, ia ena vakamasuti e na vukudra ka na vakabulai ira. 23E na siga ko ya ena dua na salatu mai Ijipita ki Asiria, a ra na veilakovi na kai Asiria kei na kai Ijipita, ka ra na lotu vata ko ira na kai Ijipita kei na kai Asiria. 24E na siga ko ya sa na kenai katolu kei Ijipita kei Asiria ko Isireli, io na ka e veivakalougatataki e loma ni vanua: 25ko koya sa vakalougatataka ko Jiova ni lewe vuqa, ka kaya, Sa kalougata ko Ijipita na noqu tamata, kei Asiria na cakacaka ni ligaqu, kei Isireli na noqu i votavota.
Currently Selected:
AISEA 19: FOV
Highlight
Copy
Compare
Share
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
