AISEA 14
14
Ko koya na Kalou ena vakabulai ira tale na Isireli, 1-4. Era tukuni Papiloni ni sa ca mai, 4-23. A lewa ni Kalou e na vuku i Asiria, 24-27, e na vuku i Filisitia talega, 28-32.
1Ni na lomani ira na Jekope ko Jiova, ka digitaki ira tale na Isireli, ka vakalesui ira ki na nodra vanua; ia ko ira na kai tani era na la'ki to vata kei ira, ka kabiti ira na mataqali i Jekope. 2Ko ira na lewe ni vanua era na kauti ira ki na nodra yasana: ia na mataqali i Isireli ena tauri ira e na vanua i Jiova me nodra tamata kei na nodra yada: ia na tamata era vakabobulataki ira eliu, era sa qai tauri me nodra bobula; ka ra na lewai ira era a vakasaurarataki kina. 3Ia ena yaco e na siga sa vakacegui iko kina ko Jiova mai na nomu rarawa, kei na nomu rere, kei na oca dredre ka lavaki vei iko, 4Ko na qai taurivaka nai bole oqo kei na tui Papiloni, ka kaya. Sa qai mudu ko koya ka ia na dauveivakasaurara! na kena mudu tu na koro koula! 5Sa musuka ko Jiova na nodra laciu na tamata ca, na nodra i titoko na mataveilewai! 6Ko koya ka dauyaviti ira na veimataqali e na yaloca ni sa ia tiko na veiyaviyaviti, ko koya ka daulewa na veimatanitu e na cudru, sa qai cudruvi ka sega e dua e tarova. 7Sa qai cegu, ka vinaka mai ko vuravura taucoko: era sa ia mada na sere. 8Io, na damanu sa reki e na vukumu, kei na sitari ni Lepanoni, ka sa kaya, Ni ko sa qai koto no, sa sega ni cabe mai e dua na dautakau me vakacaca kivei keimami. 9Ko bulubulu era sa yavala me mani tavaki iko ni ko sa lako yani kina: sa vakayadrati ira na yalo ni qaqa e na vukumu, ko ira kecega era turaga ni vuravura; sa vakaduri ira kecega na tui ni veimatanitu mai na nodra i tikotiko. 10Era na vosa kecega ka kaya vei iko, Ko iko talega ko sa malumalumu mai me vakataki keimami? ko sa tautauvata kei keimami? 11Sa biu sobu ki nai bulubulu na nomu lagilagi, kei na domo ni nomu api: sa tevu e rukumu na baca, ka sa nomu i tutuvi na baca. 12Isa na nomu lutu mai lomalagi, ko iko Lusefa na kalokalo i vola siga! na nomu tavakabalei sobu ki na qele, ko iko ka dauvakasaurarataka na veimatanitu! 13Io ko a kaya e lomamu, Ka'u na cabe ki lomalagi, ka'u na vakaceceretaka na noqu i tikotiko me cecere ka lolovira na kalokalo ni Kalou: ka'u na tiko talega mai na dela ni ulu-ni-vanua ni soqoni, e na tikina ki na tokalau: 14Ka'u na cabe ki na yasana ki cake me no ki ra na o; ka'u na tautauvata kaya sa Cecere sara. 15Ia ko na biu sobu ga ki etesi, ki na tikina ki yasa ni bulubulu. 16Ko ira era raici iko era na dikevi iko, era na vakananumi iko, ka kaya, Oqo li na tamata ka sautaninini kina ko vuravura, ka vakayavalata na veimatanitu, 17ka cakava na vuravura me lekutu tu, ka dauvakarusa na kena veikoro, ka sega ni vakasukai ira tale na nona bobula ki nodratou? 18Ko ira kece na tui ni veimatanitu, ko ira kecekecega, era dui koto yadua vakaiukuuku e na nona vale. 19Ia ko iko ko sa biu tani mai na nomu i bulubulu me vaka na taba ni kau sa vakasisilataki, me vaka na nodra i sulu era sa moku mate, era sa laubasikataki e nai seleiwau, ka lako sobu ki na veivatu ni bulubulu: me vaka na yago ni mate sa butubutuki: 20Ko na sega ni bulu vata kei ira, ni ko sa vakacacana na nomu vanua, ka vakamatei ira na nomu tamata: era na sega sara ni rogo na nodra kawa nai valavala ca, 21Dou vakarau ki na nodra veivakamatei na luvena e na vuku ni valavala ca ni nodra qase; me ra kakua ni tu cake, me taukena na vanua, ka vakarobota na dela i vuravura e na koro. 22Ni'u na tu cake vei ira, sa kaya ko Jiova ni lewe vuqa, ka muduka tani mai Papiloni na yacadra, kei na kedra vo, kei na luvedra tagane, kei na nodra kawa, sa kaya ko Jiova. 23Ka'u na cakava na vanua me nodra i tikotiko na belo, me vanua dranodrano: ia ka'u na taviraka laivi e nai taviraki e dauveivakarusai, sa kaya ko Jiova ni lewe vuqa.
24Sa bubului ko Jiova ni lewe vuqa, ka kaya, Me vaka dina na ka ka'u sa nanuma, ena yaco vakakina; ka me vaka na ka ka'u sa nakita, ena tu ga vakakina: 25me'u musuki koya na kai Asiria e na noqu vanua, ka buturaki koya e na noqu ulu-ni-vanua: ia na nonai vua ena qai biu tani vei ira, kei na nonai kaukau ena kau tani mai na domodra. 26Oqo na kenai naki e na vuku i vuravura taucoko: ia oqo na liga sa dodo yani ki na veimatanitu kecega. 27Ni sa nakita ga ko Jiova ni lewe vuqa, ia ko cei me vakadaroya? ka sa dodo yani na ligana, ia ko cei me na vakasuka tani? 28E na yabaki ka mate kina ko Easi na tui, sa qai kilai na vosa ni parofisai bibi oqo.
29Mo kakua ni reki, Filisitia taucoko ni sa qai ramusu nai titoko i koya ka yaviti iko: ni na tubu mai na vu ni gata na gata katakata, ia na vuana ena gata vakabukawaqa sa vuka. 30Ena qai kana ko ira na nodra ulumatua na dravudravua, ka ra na koto sobu vakavinaka na luveniyali: ia ka'u na vakamatea na wakamu e na dausiga, ia na kemu vo ena vakamatei. 31Mo tagi, na matamata-ni-koro! mo qoqolou, na koro! ko iko, Filisitia taucoko, ko sa waicala sara: ni na lako mai na tokalau na kubou, ena sega e dua me tiko tani e na gauna sa lokuci. 32Ia na vosa cava me qai tau vei ira na mata ni veivanua? Ni sa tauyavutaki Saioni ko Jiova, ka ra na dro kina ko ira na nona tamata era vakararawataki.
Currently Selected:
AISEA 14: FOV
Highlight
Copy
Compare
Share
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
