IPERIU 10
10
Sa uasivi cake nai soro sa cabora ko Karisito e nai soro kecega eliu, ni sa kau tani kina nai sau ni valavala ca, 1-18. Sa vakarota kina vei ira ko koya me ra vakabauti Jisu sara, 19-39.
1Sa tu ga e na vunau nai vakatakarakara ni veika vinaka me na muri mai, ia ka sega ni koya na yaloyalona dina, ka sega talega ni rawa e nai soro era sa cabora tiko e na veiyabaki, me vakasavasavataki ira era toro tiko kina. 2Ia kevaka sa rawa, sa sega li ni mudu na nodra vakacabori, ni ra sa sega ni beitaki tiko e nai valavala ca ko ira sa dausoro, ni ra sa vakasavasavataki vakadua? 3ia e nai soro oqori sa vakananumi tale kina nai valavala ca e na veiyabaki.
4Ni sa dredre sara me kauta tani nai valavala ca na dra ni pulumokau kei na me. 5O koya oqo sa kaya kina ko koya ni sa lako mai ki vuravura, Ai soro kei nai madrali ko sa sega ni vinakata, Ia ko sa vakarautaka ga vei au na yago: 6Ai soro kama, kei nai soro talega sa sorovaki kina nai valavala ca, ko sa sega ni reki kina: 7Au sa qai kaya, Raica, au sa lako mai, (Au a volai e nai vola vivigi,) Me'u cakava na ka ko sa vinakata, na Kalou. 8Sa kaya eliu ko koya, Ai soro kei nai madrali kei nai soro kama kei nai soro sa sorovaki kina nai valavala ca, ko sa sega ni vinakata, se rekitaka, (o koya sa vakacabori me vaka na vunau,) 9sa qai kaya ko koya, Raica, au sa lako mai me'u cakava na ka ko sa vinakata, na Kalou. Sa kauta tani ko koya nai matai, me vakayacora na kenai karua. 10Ia eda sa vakasavasavataki e na vuku ni lewa oqo, e na yago i Jisu Karisito ni sa cabori vakadua.
11Ia ko ira kecega na bete era sa tu ka cakacaka e na veisiga, ka vakacabora wasoma nai soro ko ya sa sega ni kauta tani rawa nai valavala ca: 12ia ko koya oqo, ni sa vakacabora oti vakadua nai soro e dua ga e na vuku ni valavala ca, sa qai tiko sobu e na liga i matau ni Kalou; 13a sa qai waraka tiko me vakayacori ko ira na nona meca mei tutu-ni-yavana. 14Ni sa vakacabora vakadua nai soro sa cakava kina ko koya na ka kecega e yaga vei ira era sa vakasavasavataki tiko.
15Ia sai vakadinadina talega vei keda na Yalo Tabu: io, ni sa kaya oti ko koya, 16Oqo na veiyalayalati ka'u na cakava vei ira Ni sa oti na gauna ko ya, sa qai kaya na Turaga, Au na tugana na noqu vunau ki na yalodra, Ka vola e na lomadra; 17Ia na nodra i valavala ca kei na nodra talaidredre ka'u na sega ni nanuma tale. 18Ia kevaka sa bokoci na veika oqori, sa sega ni vakacabori tale nai soro ni valavala ca.
19O koya oqo, oi kemudou na veiwekani, ni da sa qai doudou rawa me da curu ki na loqi tabu sara e na vuku ni dra i Jisu, 20e na sala vou ka bula, o koya sa qai vakatara vei keda ko koya, ia sa ka e curu kina nai lati, oqori na yagona; 21ka ni sa dua talega na noda bete levu e na vale ni Kalou; 22me da toro voleka yani e na yalo dina kei na vakabauta dina sara, ni sa kureitaki tu na yaloda me da kakua ni beitaki keda e na ca, ka sa vakasilimi tu na yagoda e na wai makare. 23Tou taura matua na vakatusa ni noda vakabauta me kakua ni yavala; ni sa yalodina ko koya sa yalataka; 24me da veivakananumi keda vakai keda me da veivakatakatai me dauloloma kai valavala vinaka: 25me da kakua ni biuta na vakasoqoni vata, me vaka nai valavala ni tamata eso; me da veivakamasuti tiko: ia me vakalevu, ni dou sa raica sa toro voleka mai na siga. 26Io, kevaka eda sai valavala ca ka sa yaloda kina, ni da sa kila oti nai vakavuvuli dina, sa qai sega tale e dua tani nai soro ni valavala ca: 27sa vo ga na noda waraka e na rere na siga ni lewa, kei na cudru waqawaqa talega, oqori ena kani ira na meca. 28O koya sa beca na vunau i Mosese sa mate ga, sa sega tale ni lomani, ni sa beitaka vei koya e le rua se le tolu nai vakadinadina: 29dou vakasama se na vakaevei na kena levu cake ni cudruvi, sa dodonu me yaco vua, sa butuka na Luve ni Kalou, a sa vakawaletaka na dra ni veiyalayalati sa vakasavasavataki kina, a sa beci koya na Yalo ni loloma? 30Ni da sa kilai koya sa kaya, Sa noqu i tavi me'u cudruvaka, au na sauma ga. Ka sa kaya tale, Ena lewai ira na nona tamata ko Jiova. 31Sa ka rerevaki me lutu ki na liga ni Kalou bula.
32Ia dou vakananuma na veisiga eliu, dou a vakararamataki kina ka dou a qai vosota na veivala e na rarawa vakaidina; 33eso, ni dou a vakasesevotuni e na veivakalialiai kei na veivakararawataki; ka so, ni dou a tiko vata kei ira era sa vakakina. 34Ni dou a lomani ira ga era sa vesuki, ka reki ni sa kovei na nomudou i yau, ni dou sa kila e na lomamudou sa tu ga mai lomalagi na nomudou i yau e vinaka cake kina ka veiqati. 35O koya oqo mo dou qai kakua ni biuta na nomudou dinata ena levu na kenai sau.
36Ni sa yaga vei kemudou na vosota, mo dou cakava na ka sa lewa na Kalou, ka me nomudou kina na ka ka yalataki. 37Ni na dede vakalailai, Ena qai lako mai ko Koya e lako mai, ka na sega ni dede sara. 38Ia ena bula na tamata yalododonu e na vakabauta: Ia, kevaka sa suka tani tale, ena sega ni vinakati koya na yaloqu. 39Ia koi keda, eda sega ni vakataki ira sa suka tale yani ki na rusa; eda sa vakataki ira ga era sa vakabauta tiko me bula na yalo.
Currently Selected:
IPERIU 10: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
