ISIKELI 7
7
Ena cudruvi vakaoti na vanua ko Isireli, 1-15. Ena vakabulai eso na tamata, ka la'ki tagicaka na nodra i valavala ca, 16-19. Ena soli na vale tabu vei ira na meca me sa vakacacani ni sa vakacacataka oti ko ira na Isireli e na nodra matakau, 20-22. Sa vakatakarakarataki e na sinucodo na nodra vakabobulataki vakaca na lewe ni vanua, 23-27.
1A sa yaco tale vei au na vosa i Jiova, ka vaka, 2Ia ko iko, na luve ni tamata, sa kaya vakaoqo na Turaga ko Jiova ki na vanua vaka-Isireli; Nai otioti, sa yaco mai nai otioti ki nai yalayala vava ni vanua. 3Sa qai yaco vei iko na kemui otioti, ia ka'u na vakayacora na noqu cudru vei iko, ka lewai iko me vaka na nomu i valavala, ka sauma vei iko na nomu i valavala vakasisila kecega. 4Ia na mataqu ena sega ni vosoti iko, au na sega talega ni yalololoma vei iko: ni ka'u na sauma vei iko na nomu i valavala, ia na nomu i valavala vakasisila sa na tu ga vei iko: ia dou na kila ni sai au ko Jiova.
5Sa kaya vakaoqo na Turaga ko Jiova: Na ca, na ca duaduaga, raica, sa qai yaco mai oqo. 6Sa yaco mai nai otioti, sa yaco mai nai otioti: sa yadravi iko; raica, sa qai yaco mai. 7Sa kida mai vei iko na kena mataka, o iko sa tiko e na vanua: sa yaco mai na kena gauna, sa voleka mai na siga ni kidroa, ka segai na kaila ni marau e na veiulu-ni-vanua. 8Sa vo ga e lailai me'u qai sova yani na noqu cudru vei iko, ka vakaotia yani na noqu lesa vei iko: ia ka'u na lewai iko me vaka na nomu i valavala, ka sauma vei iko na nomu i valavala vakasisila kecega. 9Ia na mataqu ena sega dina ni vosota, au na sega talega ni yalololoma: ka'u na sauma vei iko me vaka na nomu i valavala, ia na nomu ka vakasisila ena tu ga vei iko; ia dou na kila ni sai au ko Jiova sa ia na veicudruvi.
10Dou raica na kena siga, raica, sa yaco mai: sa lako tu yani na mataka; sa seraki mai na taba ni kau, sa kubu mai na viavialevu. 11Na veivakacacani, sa tubu cake me taba ni kau ca sara: ena sega vei ira me vo tiko, se vei ira na nodra lewe vuqa, se dua na nodra i yau: ena sega talega na tagi yaso e na vukudra. 12Sa yaco na kena gauna, sa toro voleka mai na siga: me kakua ni reki ko koya sa voli ka: me kakua talega ni tagi ko koya sa volitaka: ni sa cudruvi kecega na kedra lewe vuqa. 13Ni na sega ni taukena tale na ka sa volitaki, ko koya sa volitaka na ka, ke ra sa bula tiko: ni sa bale na raivotu oqo vei ira kecega na kedra lewe vuqa, ia ena sega me lesu mai; ena sega talega e dua vei ira sa caka cala tiko me vakaukauwataki koya kina. 14Era sa uvuca na davui, io me ra vakarau kecega; ia sa sega e dua sa lako ki nai valu: ni'u sa cudruvi ira kecega na kedra lewe vuqa. 15Ai seleiwau, sa tu ga mai taudaku, kei na mate dauveiveitauvi kei na dausiga, sa tu mai vale: o koya sa tiko mai na were ena mate e nai seleiwau; o koya talega sa tiko mai na koro, ena kani koya na dausiga kei na mate dauveiveitauvi.
16A ra na dro ko ira sa dro bula, a ra na tiko e na veiulu-ni-vanua me vaka na ruve ni veibuca, ka dui tagi yadua e na vuku ni nonai valavala ca. 17A ligadra kece ena wadamele, a durudra kece talega ena vaka na wai. 18A ra na vauci ira e nai sulu taga, ena nodra i tutuvi talega na domobula; era na matamadua ko ira kecega, era na ulu cou ko ira kece talega. 19A nodra siliva era na biuta ki na sala ni koro; kei na nodra koula ena vaka na ka velavela vei ira; a nodra siliva kei na nodra koula, ena sega ni vakabulai ira rawa e na siga ni cudru i Jiova: a yalodra, ena sega ni mamau kina; a ketedra talega, ena sega ni vakamamautaki kina: ni sa nodra caka cala oqo era sa tarabe kina. 20Ia na nona ka vakaiukuuku ka vakaturaga, sa vakaduria ko koya me ka lagilagi sara: ia na matakau ni nodra ka vakasisila ka velavela era sa cakava kina: o koya oqo ka'u sa cakava me ka vakasisila vei ira: 21Ia ka'u na solia ki na ligadra na kai tani, me vakayanaki; vei ira talega na tamata ca kei vuravura, mei toki ni valu; a ra na vakacacana. 22Ia ka'u na vagolea tani na mataqu vei ira, ka ra na vakacacataka na noqu yasana tabu: ni ra na curu kina na dauvakacaca, ka vakacacana.
23Mo cakava na sinucodo: ni sa robota na vanua na veilabati; kei na koro sa sinai tu e nai valavala kaukauwa. 24O koya oqo ka'u na kauti ira mai era ca sara vei ira na iceni, a ra na taukena na nodra veivale: ia ka'u na vakaotia na nodra viavialevu na kaukauwa: ena vakacacani talega na nodra veiyasana tabu. 25Sa yaco mai na dauveivakarusai; ka ra na ia na veisorosorovi, ka na sega ga. 26Na ca ena veitaravi kei na ca; nai rogorogo talega kei nai rogorogo; era na qai taroga vua na parofita na raivotu; ia na vunau, ena yali mai vua na bete; kei na lewa, maivei ira na qase. 27Ena tagi ko koya na tui, io ko koya na turaga ena vakaisulu e na rusa; a ligadra talega na lewe ni vanua, ena taqaya: ka'u na cakacaka vei ira me vaka na nodra i valavala; ia ka'u na cudruvi ira me vaka na ka sa dodonu vei ira; a ra na kila ni sai au ko Jiova.
Vakavakadewa Makawa (Fijian Old Version) © Bible Society of the South Pacific