ISIKELI 41
41
Ai vakarau, kei na veitikina, kei nai ukuuku ni vale tabu, 1-26.
1Sa qai kauti au ko koya ki na vale tabu, ka sa vakarauta na duru, ka sa dui ono na kiupiti na kena raraba ki na tabana e dua, ka dui ono na kiupiti na kena raraba ki na tabana ka dua, na kena raraba ni vale tabu sa vaka kina. 2Ia na kena raraba ni katuba sa tini na kiupiti; ia na taba ni katuba sa lima na kiupiti vaka, ka lima na kiupiti vaka; a sa vakarauta ko koya na kena balavu, ka sa vasagavulu na kiupiti: kei na kena raraba, ka sa ruasagavulu na kiupiti.
3Sa qai curu ki loma ko koya, ka vakarauta na duru ni sogo, a sa rua na kiupiti; kei na katuba, ka sa ono na kiupiti, kei na raraba ni katuba, ka sa vitu na kiupiti. 4A sa vakarauta ko koya na kena balavu, ka sa ruasagavulu na kiupiti: kei na rabana, ka sa ruasagavulu na kiupiti e na mata ni vale tabu, a sa kaya vei au ko koya, Sai koya oqo na tikina tabu sara.
5Sa qai vakarauta ko koya na lalaga ni vale, ka sa ono na kiupiti: kei na raraba ni loqi ki na sarisari ni vale, ka sa dui va na kiupiti, ka volita na vale e na veiyasana kecega. 6Ia nai taba loqi e veitaqataqai, sa tolu, ka yatolusagavulu na kena loqi; a sa lagoni mai ki na lalaga ni vale sa kedra dina voli tu na loqi ki sarisari ni vale, me tauri deivaki kina ia sa sega ni sema kei na lalaga ni vale tabu. 7A sa rabailevu cake tu, ni sa cabeti voli ki cake nai taba loqi: e na vuku ni sa cabeti voli tiko ki cake na vale ka volita sara na vale tabu: o koya oqo sa rabailevu cake tu kina na vale ki cake, ni sa cabeti vakaoqo nai taba loqi ki cake sara, mai na kena vale e ra sara, ka basika na kena eloma. 8Au a raica talega na kena cecere ni vale e na veiyasana mai na dui kenai lago nai taba loqi, ka sa ono na kiupiti ki na kena sema kei na vale.
9A kena raraba ni bai ni taba loqi ki sau, sa lima na kiupiti: ia na tikina sa vo mai ki vale sa kedra nai taba loqi sa tu mai ki loma. 10Ia na tadrua ni yatu vale sa ruasagavulu na kiupiti ka muri volita na vale tabu e na veiyasana. 11Ia na kedra katuba nai taba loqi sa dui donuya tu na tikina sa vo, sa dua na katuba e donuya na tokalau, ka dua tale na katuba sa donuya na ceva: ia na kena raraba ni tikina sa vo sa lima na kiupiti ka volita tu.
12Ia na vale sa tara tu e na mata ni yasana tabu ki na tikina ki ra sa vitusagavulu na kiupiti na kena raraba; ia na lalaga ni vale e tara tu sa lima na kiupiti sa volita tu na kena vavaku, ka ciwasagavulu na kiupiti na kena balavu. 13Ia sa vakarauta ko koya na vale tabu, e dua na drau na kiupiti na kena balavu; kei na yasana tabu, kei na vale sa tara tu, kei na kena veibai, e dua na drau na kiupiti na kena balavu; 14na kena raraba talega ni mata vale, kei na yasana tabu ki na tu-i-cake, e dua na drau na kiupiti.
15A sa vakarauta ko koya na kena balavu ni vale e tara tu ka donuya na yasana tabu mai dakuna, kei na kena varada vaka ka vaka, e dua na drau na kiupiti; kei na vale tabu ki loma, kei nai curucuru ni lomanibai; 16kei na duru ni sogo, kei na katuba qiqo, kei na varada e dui volita nai taba loqi e tolu ka donuya na katuba, ka botani voli tu e na kau, mai na qele talega ka yala ki na katuba lalai, ia na katuba lalai sa lati tu, 17ka yacova oqori ki dela ni katuba, ka yala sara ki na vale tabu ki loma, e taudaku talega, ka muria voli sara tu na bai e na veiyasana eloma e taudaku talega, me vaka na dui kenai vakarau.
18A sa caka kina na jerupi kei na balabala, ia e dua na balabala sa ceuti tu ga e na maliwa ni jerupi e rua; a sa dui yarua na matadra na jerupi; 19ia na mata vakatamata sa donuya na balabala vaka, kei na mata vaka luve ni laioni sa donuya na balabala vaka: sa caka voli tu e na veiyasana kecega ni vale tabu. 20Sa vu mai na qele ka yala ki na tikina e dela ni katuba sa caka kina na jerupi kei na balabala, e na lalaga ni vale tabu talega. 21A duru ni sogo ni vale tabu sa dui ta vakarivirivi, kei na mata ni tikina tabu sara; sa rairai tautauvata ruarua.
22Ai cabocabo-ni-soro kau sa tolu na kiupiti na kena cecere, ka rua na kiupiti na kena balavu; ia na tutuna, kei na delana, kei na sarisarina, sa kau ga: ka sa kaya vei au ko koya, Oqo na tepeli sa tu e na mata i Jiova. 23A sa dui yarua na kena katuba na vale tabu kei na tikina tabu sara. 24A sa dui lobi rua na katuba yadua, e dui rube tu ruarua; sa lobi rua na katuba e dua, ka lobi rua na katuba kadua. 25A sa ceuti kina, io ki na katuba ni vale tabu, na jerupi kei na balabala, me vaka sa ceuti e na lalaga; ka sa so na papa vavaku e na mata ni lalaga ni curucuru ki tuba. 26Ka sa so na kena katuba qiqo ka so na kena balabala vaka ka vaka e na yasa ni curucuru, ia nai taba loqi ni vale, sa vakapapa vavaku talega.
Currently Selected:
ISIKELI 41: FOV
Highlight
Copy
Compare
Share
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
