ISIKELI 3
3
Sa vakavulici, ka vakaukauwataki, ka vakasalataki ko Isikeli, 1-27.
1A sa kaya vei au ko koya, Ko iko na Luve ni tamata, na ka ko sa kunea mo kania, mo kania nai vola vivigi oqo, ka la'ki vosa vei ira na mataqali i Isireli. 2Au a qai dalaga, ka sa vakani au ko koya e nai vola vivigi ko ya. 3A sa kaya vei au ko koya, ko iko na luve ni tamata, mo ia mada na kana, ia mo vakamamautaka na ketemu e nai vola vivigi oqo ka'u sa solia vei iko. Au a qai kania; ia ni sa tiko e na gusuqu sa vaka na oni na kena kamikamica. 4A sa kaya vei au ko koya, Ko iko na luve ni tamata, mo lako, lako yani vei ira na mataqali i Isireli, ka vosataka na noqu vosa vei ira. 5Ni ko sa sega ni talai ki na mataqali sa dua tani na nodra vosa se sa dredre ni cavuti, vei ira ga na mataqali i Isireli; 6sa segai vei ira na veimatanitu tani e vuqa sa dua tani na nodra vosa sa dredre ni cavuti, ko sega ni kila rawa na nodra vosa. Ke'u sa talai iko vei ira, ke ra na vakarorogo ga vei iko, se segai? 7Ia na mataqali i Isireli era na sega ni vakarorogo vei iko; ni ra na sega ni vakarorogo vei au: ni ra sa mataviavialevu ga ka yalokaukauwa ko ira kece na mataqali i Isireli. 8Raica, au sa cakava na matamu me qaqa ki na matadra, kei na yadremu me qaqa ki na yadredra. 9Ia me vaka na taiamodi e qaqa ka malumalumu na qiwa, ka'u sa cakava na yadremu me vakakina: kakua ni ko rerevaki ira, se taqayataka na matadra, ia era sa mataqali dautalaidredre ga.
10Sa kaya talega vei au ko koya, Ko iko na luve ni tamata, na vosa kece ka'u na vosataka vei iko mo tugana ga ki lomamu, ka rogoca e daligamu. 11Ia mo lako, lako yani vei ira era vakabobulataki, vei ira na luvedra na kai nomu, ka vosa vei ira, ka tukuna vei ira, Sa kaya vakaoqo na Turaga ko Jiova; se ra na vakarorogo, se ra na kakua ga.
12Sa qai laveti au cake na yalo, ia ka'u sa rogoca mai dakuqu e dua na rorogo levu, sa kaya, Me vakavinavinakataki nai ukuuku i Jiova mai na nona yasana. 13Au a rogoca talega na carocaroba ni tabadratou na ka bula e veitaratarai, kei na rorogo ni yava sa vaka na yava ni qiqi, sa tu vata kei iratou, kei na dua na rorogo levu. 14Ia na yalo, sa laveti au cake, ka kauti au yani, ia ka'u sa lako ka rarawa tu ka katakata na yaloqu; ia na liga i Jiova sa tiko vakaukauwa ga vei au. 15Au a qai yaco vei ira era bobula mai Teli-apipi, era tiko mai na uciwai ko Kipa, ia ka'u a tiko e na yasana era sa tiko kina, ka'u a tiko maikea ka bogi vitu ia ka'u sa kidacala tiko e na kedra maliwa.
16Sa oti na bogi vitu, sa qai yaco vei au na vosa i Jiova, ka vaka, 17Ko iko na Luve ni tamata, ka'u sa lesi iko mo nodra i vakatawa na mataqali i Isireli: ia mo rogoca na vosa ni gusuqu, ka vakasalataki ira maivei au. 18Ni'u sa kaya vua na tamata ca, Ko na mate vakaidina; ia ko sa sega ni vakasalataki koya, se vakauqeta na tamata ca me biuta na nona sala ca, ka me vakabulai koya; ena mate ga na tamata ca ko ya e na nona caka cala; ia na nona mate ka'u na taroga vei iko. 19Ia kevaka ko sa vakasalataka na tamata ca, ka sa sega ni lesu mai na nona ca, se na nonai tovo ca, ena mate ga ko koya e na nona caka cala; ia sa na sega ni baleti iko.
20Ia ni sa vuki tani na tamata yalododonu mai na nonai valavala dodonu, ka sa caka cala, ni'u sa tauca e matana na ka e tarabe kina, ena mate ko koya: ni ko sa sega ni vakasalataki koya, ena mate ga e na nonai valavala ca, ia ena sega ni nanumi na nonai valavala dodonu sa cakava ko koya; ia na nona mate ka'u na taroga vei iko. 21Ia kevaka ko sa vakasalataka na tamata yalododonu, me kakua ni valavala ca na tamata yalododonu, ka sa sega ni valavala ca, ena bula vakaidina ko koya, ka ni sa vakasalataki; o iko talega, ko sa sereka na yalomu.
22A sa tu vei au maikea na liga i Jiova; ka sa kaya vei au ko koya, Mo cavu tu mo lako yani ki na buca, ia ka'u na vosa vei iko maikea. 23Au sa qai cavu tu, ka lako yani ki na buca: ka raica, sa tu maikina nai ukuuku i Jiova, me vaka nai ukuuku ka'u a raica mai na uciwai ko Kipa: ia ka'u sa bale vakatoboicu. 24A sa curumi au na yalo, ka sa vakaturi au e na yavaqu, a sa vosa vei au, ka kaya, Mo la'ki sogolati iko e nomu loma ni vale. 25Ia ko iko, na luve ni tamata, raica, era na vauci iko e na dali, ka ra na vesuki iko kina, ia ko na sega ni curu rawa ki tautuba vei ira: 26ia na yamemu ka'u na vakabita ki na loma ni gusumu e cake, mo galu kina, ka sega ni dauvunauci ira tiko: ni ra sa mataqali dautalaidredre. 27Ia ni'u sa vosa vei iko, ka'u na qai dalaga na gusumu, ia ko na qai kaya vei ira, Sa kaya vakaoqo na Turaga ko Jiova; O koya sa rogoca, me vakarorogo ga; ia ko koya sa sega ni via rogoca, me kakua ga: ni ra sa mataqali dautalaidredre.
Vakavakadewa Makawa (Fijian Old Version) © Bible Society of the South Pacific