ESITERI 6
6
Sa vakarokorokotaki ko Moatekai.
1Sa sega ni moce rawa na tui e na bogi ko ya, a sa kaya me kau mai nai vola ni tukutuku ni veika sa caka, a sa wili vua na tui. 2A sa kune ni sa volai kina, ni sa tukuni Pikicani kei Teresi ko Moatekai, e le rua vei iratou na nona mata na tui, erau a dauvakatawana na katuba, koi rau ka segata me rau vakamatei Easuerosi na tui.
3A sa taroga na tui, A vakarokoroko cava kei na ka vakaturaga cava sa caka vei Moatekai e na vuku ni ka oqo? Sa qai kaya ko iratou na tamata eratou sa dauqarava na tui, Sa sega na ka e caka vua. 4A sa taroga na tui, Ko cei sa tiko mai na rara? Ia sa qai curu mai ko Emani ki na rara ni vale ni tui esau, me kaya vua na tui me lili ko Moatekai e na kau sa vakarautaka vua ko koya. 5A sa kaya vua ko ira era sa dauqarava na tui, Sa tu saka ko Emani mai na rara. A sa kaya na tui, Me curu mada mai ko koya.
6A sa curu mai ko Emani. A sa taroga vua ko koya na tui, A cava na ka me sa caka vua na tamata sa vinakata ko koya na tui me vakarokorokotaki? A sa nanuma e lomana ko Emani, Sa vinakati cei li ko koya na tui me vakarokorokotaki, koi au ga? 7A sa kaya vua na tui ko Emani, Me kau mada mai vua na tamata sa vinakata na tui me vakarokorokotaki, 8nai sulu sa dausulumaka na tui, kei na ose sa dauvodoka na tui, kei na sala vakatui sa toka e uluna: 9ia me soli nai sulu oqo kei na ose vua e dua sa uasivi sara vei ira na nona tamata vakaturaga na tui, me ra vakaisulutaka kina na tamata sa vinakata na tui me vakarokorokotaki, ka kauti koya voli e na salatu ni koro ni sa vodo tiko e na ose, ka kacivaka tiko e matana, Ena caka vakaoqo vua na tamata sa vinakata na tui me vakarokorokotaki.
10Sa qai kaya vei Emani na tui, Mo kusarawa, mo kauta nai sulu kei na ose, me vaka na nomu vosa, ka kitaka vakakina vei Moatekai na Jiu, ko koya sa dautiko mai na matamata-ni-koro ni tui: me kakua ni yali e dua na ka e na ka kece ko sa cavuta.
11Sa qai kauta nai sulu kei na ose ko Emani, ka vakaisulutaki Moatekai, ka kauti koya voli e na salatu ni koro, ni sa vodo lako e na ose, a sa kacivaka e matana, Ena caka vakaoqo vua na tamata sa vinakata na tui me vakarokorokotaki.
12A sa lako tale mai ki na matamata ni koro ko Moatekai. A sa lako vakusakusa ki na nona vale ko Emani, ka tagi lako, a sa solei tutuvi. 13A sa tukuna ko Emani vei Seresi na watina kei ira kecega na wekana na ka kece sa yaco vua. Era sa qai kaya vua ko iratou na nona tamata vuku kei Seresi na watina, Kevaka e kawa ni Jiu ko Moatekai, ko sa qai vakatekivu mo bale e matana, ko na sega ni gumatua vua, ko na bale vakaidina ga e matana.
14Ia ni ratou sa veivosaki tiko kaya, sa lako mai ko ira na nona mata na tui, a ra sa mai vakariritaki Emani yani ki na magiti sa vakarautaka ko Esiteri.
Currently Selected:
ESITERI 6: FOV
Highlight
Copy
Compare
Share
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
