NA DAUVUNAU 7
7
Na ka yaga eso, 1-14; na ka yaga na rerevaka na Kalou, 15-18, kei na vuku, 19,20; ia na vuku na ka dredre, 21-24. Sa gumatua na Dauvunau me rawata na vuku, 25-29.
1Sa vinaka na yaca e rogo vinaka ka ca nai lumu talei; ka sa vinaka na siga ni mate ka ca na siga sa sucu kina e dua.
2Sa vinaka me lako ki vale ni tagi, ka ca me lako ki na vale ni kana magiti: ni sa kenai otioti ni tamata kecega oqo; ia ko koya sa bula tiko ena nanuma kina e lomana. 3Sa vinaka na tagi ka ca na dredre: ni sa vakaveveku mata sa vinaka cake kina na yalo. 4A yalodra na tamata vuku sa tiko e na vale ni tagi; ia na yalodra na lialia sa tiko e na vale ni marau.
5Sa vinaka ni rogoca na tamata na vunau ni vuku, ka ca vua ni rogoca na nodra sere na lialia: 6me vaka na lidilidi ni kau votovotoa e ruku ni kuro, sa vakakina na nona dredre na lialia: oqo talega na ka wale.
7E dina, na veivakasaurarataki sa vukica na tamata vuku me tamata lialia; a sa vakacataka na loma ni tamata nai solisoli.
8Sa vinaka nai otioti ni ka, ka ca na kenai vakatekivu: ka vinaka ko koya sa yalodauvosovoso ka ca na yaloviavialevu.
9Me kakua ni kusarawa na yalomu me cudru: ni sa tiko ga na cudru e lomadra na lialia.
10Me kakua ni kaya, E na vuku ni cava sa vinaka kina na gauna eliu ka ca na gauna oqo? ni sa sega ni vuku na nomu taroga na ka oqo.
11Sa vinaka na vuku sa tu vata kei nai yau: ka sa ka yaga vei ira era sa raica na mata-ni-siga: 12Ni sai vakaruru na vuku, ka sai vakaruru nai lavo: Ia na kena yaga na kila ka, ni sa vu ni bula vei ira na kenai taukei na vuku.
13Mo nanuma na cakacaka ni Kalou: ko cei ena vakadodonutaka rawa na ka, sa vakavevetaka ko koya? 14E na siga ni sautu mo reki, ia e na siga ni ca mo vakanananu: ni sa lesia na Kalou na ka oqo kei na ka ko ya me rau veiqaravi, me kakua kina ni kila na tamata na ka ena muri mai.
15Au a raica na ka kecega e na veisiga ni noqu bula wale oqo: ni sa tiko na yalododonu sa ca mai e na nonai valavala dodonu, ka sa balavu na nona bula na tamata ca ia sai valavala ca tiko. 16Mo kakua ni yalododonu vakalevu; mo kakua talega ni vuku sara mai: mo luveniyali mai e na vuku ni cava? 17Mo kakua ni valavala ca vakalevu, mo kakua talega ni lialia: mo mate koso e na vuku ni cava? 18Sa vinaka mo taura na ka oqo; io, mo kakua talega ni tarova na ligamu mai na ka oqo: ni sai koya sa rerevaka na Kalou ena lako tani mai na ka kece oqo.
19Na vuku, sa vagumatuataka vakalevu na tamata vuku ka vakalailai na turaga e le tini era sa tiko e na koro. 20Ni sa sega na tamata yalododonu e vuravura, sa caka vinaka tiko, ka sega ni caka cala.
21Ia kakua ni ko nanuma na vosa kece sa vosataki; de ko rogoca na nomu tamata ni sa vatonaki iko: 22Ni sa kila na lomamu, ni ko sa vatonaki ira vakavuqa na tani. 23A ka kece oqo ka'u sa vakatovolea oti e na vuku: au a kaya, Au na vuku; ia sa yawa ga vei au. 24A ka sa yawa, ka titobu sara, ko cei sa kunea rawa?
25Au a vakauqeta na lomaqu me'u kila, ka dikeva, ka vakasaqara na vuku, kei nai balebale ni ka, me'u kila talega na kena ca na lialia, io nai valavala sesewa ka lialia: 26ia ka'u sa kunea ni sa uasivia na kena gaga ni mate ko koya na yalewa sai cori ka lawa na lomana, ka sai vesu na ligana: ko koya sa vinaka vua na Kalou era dro bula maivei koya; ia ko koya sai valavala ca ena coriti vua. 27Sa kaya ko koya na Dauvunau, Raica, a ka oqo ka'u sa kunea, ni'u sa wilika vakayadua me'u kila na kena dina. 28O koya sa qara tiko na yaloqu, ka sega ga ni kunea: e dua na tagane vei ira na udolu ka'u sa kunea; ia ka'u sa sega ni kunea e dua na yalewa vei ira kecega oqo. 29Raica, na ka ga oqo ka'u sa kunea, ni sa bulia na tamata na Kalou me yalododonu; ia era sa vakasaqara nai tovo vou e vuqa.
Currently Selected:
NA DAUVUNAU 7: FOV
Highlight
Copy
Compare
Share
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
