NAI VAKARUA 27
27
Me volai e na vatu na vunau, 1-4; ka me tara nai cabocabo-ni-soro e na vatu sa sega ni ta, 5-8. O Kirisimi kei Epali, 11-13. Me tukuni mai Epali na ka era na ca kina, 14-26.
1Ia ko Mosese kei ira na qase ni Isireli era sa vakaroti ira na tamata, ka kaya, Mo ni vakabauta nai vakaro kecega ka'u sa vakarota vei kemuni edaidai. 2Ia e na siga kemuni sa qalo-kosova kina na Joritani, ki na vanua sa solia vei kemuni ko Jiova na nomuni Kalou, mo ni qai vakaduria eso na vatu lelevu, ka boroya e nai boro: 3ia mo ni vola kina na vosa kecega ni vunau oqo, ni kemuni sa yaco ki tai kadua, mo ni curu ki na vanua sa solia vei kemuni ko Jiova na nomuni Kalou, a vanua sa dave kina na wai-ni-sucu kei na oni; me vaka sa yalataka vei kemuni ko Jiova na Kalou ni nomuni qase. 4Ia ni kemuni sa qalo-kosova na Joritani, mo ni qai vakaduria na veivatu oqo, ka'u sa vakarota vei kemuni edaidai, e na ulu-ni-vanua ko Ipali, ia mo ni boroya e nai boro. 5Ia ko ni na tara kina e dua nai cabocabo-ni-soro vei Jiova na nomuni Kalou, ai cabocabo-ni-soro vatu: mo ni kakua ni taya e na kaukamea. 6Mo ni tara nai cabocabo-ni-soro i Jiova na nomuni Kalou e na vatu sa sega ni ta: ia ko ni na vakacabora kina eso nai soro kama vei Jiova na nomuni Kalou: 7ko ni na vakamatea talega eso nai madrali ni veivinakati, ka kana maikea, ka reki e na mata i Jiova na nomuni Kalou. 8Ia mo ni vola e na vatu na vosa kecega ni vunau oqo me macala sara.
9A sa vosa vei ira kecega na Isireli ko Mosese kei ira na bete na Livai, ka kaya, Mo ni qarauni kemuni, ka vakarorogo, na Isireli; e na siga oqo ko ni sa yaco mo ni matanitu i Jiova na nomuni Kalou. 10Ia mo ni vakarorogo ki na vosa i Jiova na nomuni Kalou, ka cakava na nonai vakaro, kei na nonai lesilesi, ka'u sa vakarota vei kemuni edaidai.
11A sa vakaroti ira na tamata e na siga ko ya ko Mosese, ka kaya, 12O ira oqo era na tu e na dela ni ulu-ni-vanua ko Kirisimi me vosavakalougatataki ira na tamata, ni kemuni sa yaco ki tai kadua ni Joritani; ko ira na Simioni, kei ira na Livai, kei ira na Juta, kei ira na Isakari, kei ira na Josefa, kei ira na Penijamini: 13ia ko ira oqo era na tu e na dela ni ulu-ni-vanua ko Ipali me ra cavuta na vosa ni veicudruvi; ko ira na Rupeni, ko ira na Kata, kei ira na Aseri, kei ira na Sepuloni, ko ira na Tani, kei ira na Nafitalai.
14A ra na vosa na Livai, ka kaya vei ira kecega na Isireli e na domo levu, 15Me cudruvi na tamata sa cakava e dua na matakau ceuceu se na matakau sa vakawaicalataki, na ka vakasisila vei Jiova, na cakacaka ni matai, ka vakaduria e na tikina vuni. A ra na vosa na tamata kecega, ka vakaemeni. 16Me cudruvi ko koya sa beci tamana se tinana. A ra na vakaemeni na tamata kecega. 17Me cudruvi ko koya sa kisira nai yalayala ni vanua ni kai nona. A ra na vakaemeni na tamata kecega. 18Me cudruvi ko koya sa vakasesea na mataboko mai na sala. A ra na vakaemeni na tamata kecega. 19Me cudruvi ko koya sa kauta vakatani na lewa e na vuku ni kai tani, kei ira sa sega na tamadra, kei na yada. A ra na vakaemeni na tamata kecega. 20Me cudruvi ko koya sa cala kei na wati ni tamana; ni sa vakarairaitaka ko koya na luvawale ni tamana. A ra na vakaemeni na tamata kecega. 21Me cudruvi ko koya sa koto vata kei na dua na manumanu. A ra na vakaemeni na tamata kecega. 22Me cudruvi ko koya sa cala kei na ganena, na luve i tamana, se na luve i tinana. A ra na vakaemeni na tamata kecega. 23Me cudruvi ko koya sa cala kei na tina ni watina. A ra na vakaemeni na tamata kecega. 24Me cudruvi ko koya sa mokuta lo na kai nona. A ra na vakaemeni na tamata kecega. 25Me cudruvi ko koya sa taura nai yau me mokuta-mate kina na tamata sa sega ni cala. A ra na vakaemeni na tamata kecega. 26Me cudruvi ko koya sa sega ni vakadinadinataka na vosa ni vunau oqo me cakava. A ra na vakaemeni na tamata kecega.
Currently Selected:
NAI VAKARUA 27: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
