NAI VAKARUA 16
16
Na kana vata ni lako-sivia, 1-8; kei na wiki e vitu, 9-12; kei na vale taba ni kau, 13-15. Me ia na so levu tolutolu oqo na tagane vakaaduaga, 16-17. Ai vakaro vei ira na mataveilewai, 18-20. Me kakua na matakau, 21-22.
1Mo ni nanuma na vula ko Epipi, ka ia kina na kana vata ni lako-sivia vei Jiova na nomuni Kalou: ni sa kauti kemuni tani mai Ijipita ko Jiova na nomuni Kalou e na vula ko Epipi, e na bogi. 2Ia mo ni vakacabora kina nai soro ni lako-sivia vei Jiova na nomuni Kalou, maivei ira na qele ni sipi kei na qele ni pulumokau, e na yasana sa digitaka ko Jiova me vakatikora kina na yacana. 3Mo ni kakua ni kania vata kei na madrai sa vakalevenitaki; me bogi vitu mo ni kania tiko kaya na madrai sa sega ni vakalevenitaki, na kakana ni rarawa; ni kemuni a lako vakatotolo sara mai na vanua ko Ijipita: mo ni nanuma kina na siga ko ni a lako tani kina mai na vanua ko Ijipita, e na veisiga kecega ko ni sa bula kina. 4Ia me kakua vei kemuni na ka sa vakaleveni ka bogi vitu e na nomuni yasana kecega; me kakua talega ni vo e na bogi, me yacova na mataka, e dua na tiki ni lewe manumanu ko sa vakacabora e na yakavi e nai matai ni siga. 5E sega ni tara mo ni vakacabora nai soro ni lako-sivia e na nomuni lomanibai kecega, sa solia vei kemuni ko Jiova na nomuni Kalou: 6e na tikina ga sa digitaka ko Jiova na nomuni Kalou me vakatikora kina na yacana, mo ni vakacabora kina nai soro ni lako-sivia e na yakavi, ni sa la'ki dromu na mata-ni-siga, e na tiki-ni-siga ko ni a lako tani kina mai Ijipita. 7Ia mo ni tavuna ka kania e na yasana sa digitaka ko Jiova na nomuni Kalou; ia ko ni na lesu e na mataka, ka lako yani ki na nomuni veivale laca. 8E ono na siga mo ni kania kina na madrai sa sega ni vakalevenitaki: ia e nai kavitu ni siga me dua nai soqosoqo tabu e na vuku i Jiova na nomuni Kalou: mo ni kakua ni kitaka kina na cakacaka.
9Mo ni wilika vei kemuni e vitu na wiki: ka mo ni wilika na wiki e vitu mai nai vakatekivu ni tamusuki sila. 10Ka mo ni kitaka na so levu ni veiwiki vei Jiova na nomuni Kalou, ni ko solia nai vakacavacava sa vinakata na lomamuni ka rawarawa vei kemuni, ko na solia, me vaka sa vakalougatataki kemuni ko Jiova na nomuni Kalou: 11ia ko ni na reki e na mata i Jiova na nomuni Kalou, koi kemuni, kei na luvemuni tagane, kei na luvemuni yalewa, kei na nomuni tamata, kei na nomuni vada, kei na Livai sa tiko e nomuni lomanibai, kei na vulagi, kei ira sa sega na tamadra, kei na yada, era sa tiko kei kemuni, e na yasana sa digitaka ko Jiova na nomuni Kalou me vakatikora kina na yacana. 12Ia mo ni nanuma ni kemuni a bobula mai Ijipita: mo ni nanuma talega mo ni muria nai lesilesi oqo.
13Mo ni ia na so levu ni vale taba ni kau ka bogi vitu, ni kemuni sa yauta vata oti na nomuni sila kei na nomuni waini: 14ia ko ni na reki e na nomuni so levu, koi kemuni, kei na luvemuni tagane, kei na luvemuni yalewa, kei na nomuni tamata, kei na nomuni vada, kei na Livai, kei na vulagi, kei ira sa sega na tamadra, kei na yada, era sa tiko e nomuni lomanibai. 15Sa bogi vitu mo ni ia kina na so levu vei Jiova na nomuni Kalou e na yasana sa na digitaka ko Jiova: ni na vakalougatataki kemuni ko Jiova na nomuni Kalou e na nomuni vuata kecega, kei na cakacaka kecega ni ligamuni; o koya ko ni na reki vakaidina kina.
16Era na rairai vakatolu e na dua na yabaki e na mata i Jiova na nomuni Kalou ko ira kecega na nomuni tagane, e na yasana sa na digitaka ko koya; e na so levu ni kana madrai sa sega ni vakalevenitaki, kei na so levu ni veiwiki, kei na so levu ni vale taba ni kau: ia me ra kakua ni lako wale mai vei Jiova: 17me ra solia ko ira na tamata yadua me vaka na ka era sa rawata, me vaka na ka sa solia vei kemuni ko Jiova na nomuni Kalou ni sa vakalougatataki kemuni.
18Mo ni lesia vei kemuni eso na turaga ni lewa kei na ovisa e na nomuni koro kecega, sa solia vei kemuni ko Jiova na nomuni Kalou, e na nomuni veimataqali: a ra na lewai ira na tamata e na lewa dodonu. 19Mo ni kakua ni kauta vakatani na lewa; mo ni kakua ni vinakata na mata ni tamata, se taura nai solisoli: ni sa vakamatabokotaka na matana na vuku nai solisoli, ka kauta vakatani na nodra vosa na dodonu. 20A ka sa dodonu ga mo ni muria, mo ni bula kina, ka taukena na vanua sa solia vei kemuni ko Jiova na nomuni Kalou.
21Mo ni kakua ni tea e dua na nomuni kau me kalouyalewa ni veikau, me voleka ki nai cabocabo-ni-soro i Jiova na nomuni Kalou, ko ni sa cakava vei kemuni. 22Mo ni kakua talega ni vakaduria e dua na matakau; o koya sa cata ko Jiova na nomuni Kalou.
Currently Selected:
NAI VAKARUA 16: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
