NAI VAKARUA 11
11
Sa vakadreta tiko ko Mosese me ra talairawarawa vua na Kalou e na vuku ni nona loloma, 2-25. Sa vakatakila na ka vinaka se na ka ca me na yaco vei ira, 26-32.
1Ia mo ni lomani Jiova na nomuni Kalou, ka vakabauta na ka sa kaya ko koya, kei na ka sa lesia, kei na ka sa lewa, kei na nonai vakaro, e na veisiga kecega.
2Ia mo ni kila edaidai: ni'u sa sega ni vosa vei ira na luvemuni era sa sega ni kila, ka sa sega ni raica na vakanakuitataki maivei Jiova na nomuni Kalou, na kena levu, na ligana kaukauwa, kei na ligana sa dodo yani, 3kei na nona veivakatakilakila, kei na nona cakacaka, sa cakava ko koya e loma i Ijipita, kivei Fero na tui Ijipita, kei na nona vanua taucoko; 4kei na ka sa cakava ko koya ki nai valu ni Ijipita, ki na nodra ose, kei na nodra qiqi-ni-valu; ni sa vakaluvuci ira e na Wasa Damudamu ni ra sa cicimuri kemuni, ka sa vakarusai ira ko Jiova ka yacova na siga oqo; 5kei na ka sa cakava ko koya vei kemuni mai na vanua liwa, ka yacova na nomuni lako mai ki na yasana oqo; 6kei na ka sa kitaka ko koya kivei Tecani kei Epairami, na luve i Iliapi, na luve i Rupeni: ni sa kasei na vanua, ka tilomi rau, kei na nodrau lewe-ni-vale, kei na nodrau veivale laca, kei nai yau kecega sa tu vei ira, e na kedra maliwa na Isireli kecega: 7ia na matamuni sa raica na cakacaka levu kecega i Jiova sa cakava ko koya. 8Ia mo ni muria kina na vunau kece ka'u sa vakarota vei kemuni e na siga oqo, mo ni kaukauwa kina, ka lako me taukena na vanua, kemuni sa lako yani kina mo ni taukena; 9me balavu talega na nomuni bula, e na vanua sa bubului kina vei ira na nomuni qase ko Jiova, me solia vei ira kei na nodra kawa, e dua na vanua sa dave kina na wai-ni-sucu kei na oni.
10Ia na vanua ko ni sa lako kina mo ni taukena, sa sega ni vaka na vanua ko Ijipita, kemuni sa lako maikina, ko ni a kaburaka kina na nomuni sore ni sila, ka vakasuasuataka e na yavamuni, me vaka na were ni co laukana: 11ia na vanua kemuni sa lako kina mo ni taukena, sa vanua vakaulunivanua, ka vakakikilo, ka sa dautau kina na uca mai lomalagi: 12e dua na vanua sa vakaraica tiko ko Jiova na nomuni Kalou: sa qarava tikoga na mata i Jiova na nomuni Kalou, mai nai vakatekivu ni yabaki ka yacova nai vakataotioti ni yabaki.
13Ia ena yaco kevaka kemuni sa vakarorogo vakavinaka ki na noqu i vakaro, ka'u sa vakarota vei kemuni e na siga oqo, mo ni lomani Jiova na nomuni Kalou, ka mo ni qaravi koya e na lomamuni taucoko kei na yalomuni taucoko, 14au na qai vakatauca na uca ki na nomuni vanua e na kena gauna, na uca taumada kei na uca taumuri, mo yauta mai kina na nomuni sila, kei na nomuni waini, kei na nomuni waiwai. 15Ia ka'u na solia na co e na nomuni vanua ni veico me kedra na nomuni manumanu e yavai va, mo ni kana kina ka mamau.
16Mo ni qarauni kemuni, me kakua ni vakacalai na lomamuni, mo ni qai lesu tani kina, ka qarava na kalou tani eso, ka cuva vei ira; 17a sa tubu kina vei kemuni na cudru i Jiova, a sa sogota na lomalagi ko koya, me kakua kina na uca, ka sa sega ni vuataka na kena vuata na vanua: ka kemuni sa rusa vakatotolo mai na vanua vinaka sa solia vei kemuni ko Jiova.
18Ia mo ni maroroya na noqu vosa oqo e na lomamuni kei na yalomuni, ka vauca mei vakatakilakila e na ligamuni, ka me sa kenai ukuuku e na maliwa ni matamuni. 19Ia mo ni vakavulica vei ira na luvemuni, ka dauvosataka ni kemuni sa tiko e na nomuni vale, ni kemuni sa lako voli talega e na sala, ka ni kemuni sa la'ki koto, ni kemuni sa duri cake talega. 20Mo ni vola talega e na duru ni sogo ni nomuni vale, kei nai sogo ni nomuni matamata-ni-koro: 21me levu kina na nomuni siga kei na nodra siga na luvemuni, e na vanua sa bubului kina ko Jiova vei ira na nomuni qase me solia vei ira, me vaka na siga vakalomalagi e vuravura.
22Ia kevaka kemuni na vakabauta vakavinaka nai vakaro kecega oqo ka'u sa vakarota vei kemuni mo ni cakava, mo ni lomani Jiova na nomuni Kalou, ka lako e nona sala kecega, ka kabiti koya; 23ena qai vakasevi ira tani ko Jiova e na matamuni na matanitu kecega oqori, ia kemuni na taukena eso na matanitu sa levu ka kaukauwa, ka lailai ka malumalumu koi kemuni. 24A yasana kecega sa butuka na qeteqete ni yavamuni ena nomuni ga: mai na vanua liwa, kei Lepanoni, mai na uciwai ko ya, na uciwai ko Uferetisi, ka yacova na wasawasa mai ra, ena nomuni yalayala. 25Sa na sega na tamata me tu rawa e matamuni: ena vakatubura na rere kei na domobula e na vukumuni ko Jiova e na vanua kecega kemuni na butuka, me vaka ka kaya vei kemuni.
26Raica, ka'u sa tauca e matamuni e na siga oqo na vosa ni veivakalougatataki kei na vosa ni veivakarusai: 27a vosa ni veivakalougatataki, kevaka kemuni sa vakarorogo ki nai vakaro i Jiova na nomuni Kalou, ka'u sa vakarota vei kemuni edaidai: 28kei na vosa ni veivakarusai, kevaka kemuni sa sega ni vakarorogo ki nai vakaro i Jiova na nomuni Kalou, ka sa lesu tani mai na sala ka'u sa vakarota vei kemuni edaidai, ni kemuni muria na kalou tani eso kemuni sa sega ni kila.
29Ia ena yaco, ni sa kauti kemuni ko Jiova na nomuni Kalou ki na vanua ko ni sa lako kina mo ni taukena, mo ni qai vakatura na vosa ni veivakalougatataki e dela ni ulu-ni-vanua ko Kirisimi kei na vosa ni veivakarusai e dela ni ulu-ni-vanua ko Ipali: 30Sa sega li ni rau tu e na tai kadua ni Joritani, vaka ki na tikina sa dromu kina na mata-ni-siga, e na nodra vanua na kai Kenani, era sa tiko e na vanua cecelevu sa donui Kilikali, sa voleka ki na veioki mai More? 31Kemuni na qalo-kosova na Joritani, mo ni la'ki taukena na vanua sa solia vei kemuni ko Jiova na nomuni Kalou, ia kemuni na taukena, ka tiko kina.
32Ia kemuni na vakabauta ka cakava nai lesilesi kecega, kei na lewa, ka'u sa vakatakila vei kemuni e na siga oqo. Era a lako sobu ki Ijipita na nomuni qase, a ra sa lewe vitusagavulu ga na tamata; ia oqo, sa qisi kemuni ko Jiova na nomuni Kalou mo ni lewe levu me vaka na veikalokalo mai lomalagi.
Currently Selected:
NAI VAKARUA 11: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
