TANIELA 6
6
Sa lesi ko Taniela me liu vei ira kece na turaga, 1-3. Era sa bukia na kena vere, 4-9. Sa beitaki ko Taniela vua na tui, ka sa biu ki na qara ni laioni, 10-18. Sa vakabulai ko Taniela, 19-23, ka sa kani ira na nona meca na laioni, 24. Sa vakacaucautaki na Kalou e nai vakaro ni tui, ka sa tamata yaco ko Taniela, 25-28.
1Sa vinakata ko Taraiase me lesia e le dua na drau ka ruasagavulu, era turaga, me ra lewa na matanitu taucoko; 2ka lewe tolu me nodra turaga lelevu; ka sa kenai matai vei iratou ko Taniela: ka me ra vakarorogo vei iratou ko ira na turaga, me kakua kina ni lako vakaca e dua na ka e na matanitu ni tui. 3Ia ko Taniela oqo sa uasivi cake vei ira na turaga lelevu kei ira na turaga lalai, ni sa tiko vua na yalo e uasivi cake; ka sa nanuma na tui me lesi koya me lewa na matanitu taucoko.
4Ia ko ira na turaga lelevu kei ira na turaga lalai era sa qai qaqa me ra kunea e dua na ka e cala kina ko Taniela e na ka ni matanitu; ia era sa sega ni kunea rawa e dua na ka e caka vakatani, se dua na ka e cala kina; ni sa dina tikoga ko koya, ka sa sega e dua na nona cala se dua na ka ca me kune vua. 5Era sa qai kaya ko ira na tamata oqori, Eda na sega ni kunea e dua na ka e cala kina ko Taniela oqo, eda na kunea ga na ka me vu ni nona cala e na nona lotu vua na nona Kalou.
6Ia ko ira na turaga lelevu kei ira na turaga lalai era sa qai soqoni vata vua na tui, ka ra kaya vakaoqo vua, Kemuni Taraiase na tui, mo ni bula ka sega ni mudu. 7Era sa bose vata kece na turaga lelevu ni matanitu, kei ira na kovana, kei na turaga lalai, kei na lewe ni bose, kei na turaga ni qali, me vakatura e dua na lawa ni tui, ka vakadreta e dua na sau tabu, ka vaka, O koya sa na kerea e dua na ka vua e dua na kalou se vua e dua na tamata ka bogi tolusagavulu, vei kemuni duaduaga, na tui; me sa biu ki na qara ni laioni. 8Ia koi kemuni na tui, mo ni vakatura mada na lawa oqo, ka vola na kenai vola, me kakua ni vakatanitaki, me vaka ga na noda lawa na kai Mitia kei na kai Perisia, sa sega ni bokoci rawa. 9O koya oqo sa vola kina ko Taraiase na tui na kenai vola kei na sau.
10Ia ni sa kila ko Taniela sa volai oti nai vola, sa curu ki na nona vale; ka ni sa dola tu na katuba ni nona loqi me donui Jerusalemi, sa tekiduru e duruna vakatolu e na veisiga, me masu, ka vakavinavinaka vua na nona Kalou, me vaka sa daucakava eliu ko koya.
11Era sa qai soqoni vata mai ko ira na tamata oqori, ka kunei Taniela ni sa masu ka kere loloma tiko vua na nona Kalou. 12Era sa qai lako mai, ka vosa vua na tui e na vuku ni nona sau, ka kaya, Ko ni a sega li ni vola e dua na lawa, ka vaka, O koya ena kerea e dua na ka vua e dua na kalou se vua e dua na tamata me oti mada na bogi tolusagavulu, vei kemuni duaduaga, na tui, sa na biu ki na qara ni laioni? Sa qai kaya na tui, Sa dina ga na ka oqori, me vaka na noda lawa na kai Mitia kei na kai Perisia, ka sa sega ni boko rawa. 13Sa ra qai kaya vua na tui, Ko Taniela ko ya vei ira na Juta ka vakabobulataki mai sa sega ni vakarorogo vei kemuni, na tui, se muria na sau ko ni sa vola, sa ia ko koya na nona masumasu vakatolu e na veisiga. 14Ia ni sa rogoca na vosa oqo na tui, sa qai cati koya vakalevu vakataki koya, a sa gu na yalona vei Taniela ka segata me vakabulai koya: ka sa segata tiko ko koya ka yacova na kena dromu na mata-ni-siga me vakabulai koya.
15Era sa qai soqoni vata vua na tui ko ira na tamata oqori, ka kaya vua, Mo ni kila, na tui, ni sa noda lawa na kai Mitia kei na kai Perisia, me kakua ni bokoci e dua na lawa se na sau tabu e vakatura ko koya na tui. 16Sa qai vosa na tui, ka ra sa kauti Taniela mai, ka biuta ki na qara ni laioni. Sa qai kaya vei Taniela ko koya na tui, A nomu Kalou o koya ko sa qarava tikoga, ena vakabulai iko. 17A sa kau mai e dua na vatu, ka virino ki na gusu ni qara; ka sa tabaka ko koya na tui e na nona mama ni taba, e na nodra mama ni taba talega na kena turaga; me kakua ni vakatanitaki na ka sa nakiti vei Taniela. 18Sa qai lako sara na tui ki na nona vale vakaturaga, ka sa lolo e na bogi ko ya ka siga: ia sa sega ni kau mai ki matana na ka domo vinaka: ka sa sega talega ni moce rawa ko koya.
19Ia sa sou e na mataka caca na tui, a sa lako vakatotolo ki na qara ni laioni. 20Ia ni sa torova na qara, sa kaci vakatagi vei Taniela: ka sa kaya vei Taniela na tui, I Taniela, na tamata ni Kalou bula, sa rawata li, na nomu Kalou, o koya ko sa qarava tikoga me vakabulai iko maivei ira na laioni? 21Sa qai kaya vua na tui ko Taniela, Mo ni bula, na tui, ka sega ni mudu. 22A noqu Kalou sa tala mai na nona agilose, ka sa sogota vakaruburubu na gusudra na laioni, a ra sa sega kina ni vakacacani au: ni sa sega e dua na ka ca sa kunea vei au ko koya: ia sa sega talega na ka ca ka'u cakava e matamuni na tui. 23Sa qai reki vakalevu na tui e na vukuna, ka sa kaya me ra kauti Taniela cake mai na qara. A sa qai kau cake mai na qara ko Taniela, a sa sega ni kune vua e dua na tikina e ca, ka ni sa vakabauta na nona Kalou.
24Sa qai vakarota na tui, a ra sa kauti ira mai na tamata ko ya era beitaki Taniela, ka ra sa biuti ira ki na qara ni laioni, ko ira, kei na luvedra kei na watidra; ka sa kani ira sara na laioni, ka quruqurulaka na suidra ni sa bera na nodra tau ki na boto ni qara.
25Sa qai volavola ko Taraiase na tui vei ira kece na tamata, kei na veivanua, kei na dui vosavosa, era tiko e vuravura taucoko ka vaka; Me vakalevutaki vei kemudou na vakacegu. 26E dua na lawa ka'u sa vakatura, ka vaka, E na veiyasana kecega e na noqu matanitu, me ra sautaninini ka rere ga na tamata e na mata ni Kalou i Taniela: ni sa Kalou bula ko koya, ka dei na nona tiko ka sega ni mudu, ia na nona matanitu ena sega ni ca rawa, kei na nona lewa ena yacova nai otioti. 27Sa dauia ko koya na veivakabulai kei na veikaliraki, ka sa cakava nai vakatakilakila kei na cakacaka mana mai lomalagi kei vuravura, o koya sa vakabulai Taniela mai na kaukauwa ni laioni.
28Ia ko Taniela oqo sa tamata cakacaka yaco ni sa lewa tiko ko Taraiase, ni sa lewa talega ko Sairusi na kai Perisia.
Currently Selected:
TANIELA 6: FOV
Highlight
Copy
Compare
Share
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
