KOLOSA 2
2
Sa vakarota vei ira ko koya me ra tu dei vei Karisito, a sa vakasalataki ira e na vuku ni vuku vakavuravura, kei nai tukuni; kei na masuti ira na agilose, kei na ka ni lotu makawa sai vakatakarakara kei Karisito, 123.
1Niu sa vinakata mo dou kila na levu ni noqu lomaocaoca e na vukumudou, e na vukudra talega mai Leotisea, kei na vukudra kecega era a sega ni raici au vakayago; 2me vakacegui na yalodra, me ra vakaduavatataki e na loloma, me nodra nai yau kecega ni vuku era na kila dina sara kina na ka vuni ni Kalou, io na Karisito: 3o koya sa bini tu vua nai yau kecega ni vuku kei na yalomatua. 4Ia na ka oqo kau sa kaya, de dua e temaki kemudou e na vosa veicavilaki. 5E dina ga kau sa tiko tani vakayago, ia kau sa tiko vakayalo ga vei kemudou, ka reki ka raici kemudou ni dou sa dua vata ka tu dei e na vakabauti Karisito. 6Ia ni dou sa vakabauti Karisito Jisu na Turaga, mo dou ia tiko nai valavala sa vinaka vua: 7dou tauyavutaki ka tara cake vua, ka vakataudeitaki e na nomudou vakabauta, me vaka dou sa vakatavulici, mo dou uasivi cake kina ka vakavinavinaka.
8Dou raica vinaka de dua sa vakacacani kemudou e na vuku vakavuravura sa sega ni yaga ka lasu talega, e vaka nai tukuni vakatamata, e vaka nai vakavuvuli vakavuravura, ka sa sega ni vaka nai vakavuvuli i Karisito. 9Ni sa tiko e na yagona na ka kecega sa sinai kina na Kalou. 10Ia dou sa vutu ni ka kecega vei koya; a sa liutaki ira kecega era sa liu kei ira sa kaukauwa ko koya: 11ia dou sa cilivi talega vua e na veicili sa sega ni caka e na liga, ni dou sa luvata nai valavala ca ni yago e na veicili sa caka e na vuku i Karisito, 12ni dou a bulu vata kaya e na papitaiso: o koya talega dou sa tu cake tale kaya ni dou sa vakabauta na kaukauwa ni Kalou, o koya sa vakaturi koya cake tale mai na mate. 13Ia koi kemudou, ni dou a mate tu e nai valavala ca, e na vuku talega ni yagomudou sa sega ni cili, sa qai vakabulai kemudou vata kaya ko koya, ni sa sega ni cudruvi keda e na vuku ni nodai valavala ca; 14ni sa qusia nai vola liga ni veivakaro sa beitaki keda, sa noda meca tiko, ka sa kauta tani sara, ni sa vakota ki na kauveilatai; 15ia ni sa vakacacani ira sa liu kei ira sa kaukauwa, sa vakasesevotuni ira, ni sa rawai ira sara e na ka oqo. 16O koya oqo me kakua ni lewai kemudou kina e dua e na vuku ni kakana, se na ka-ni-gunu, se na siga ni so levu, se na vula vou, se na siga tabu: 17oqori ga nai vakatakarakara ni veika me yaco mai emuri; ia sa nei Karisito na yago. 18Me kakua ni tarovi kemudou e dua mai na kemudoui sau, ni sa viavia yalomalumalumu ka daumasu vei ira na agilose, ni sa doudou e na veika sa raica ko koya, a sa dokai koya e na vuku ni yalona sa vakalewe, 19a sa sega ni taura matua na Uluda, o koya sa dautokoni kina na yago taucoko, a sa veikabiti vata, e na vuku ni veisema kei na veiwa, a sa tubu e na tubu ni Kalou.
20Ia kevaka dou sa mate vata kei Karisito mai nai vakavuvuli vakavuravura, a cava dou sa muria kina na veivakaro me vaka dou sa bula vakavuravura tiko, 21Kakua ni tara; kakua ni tovolea; kakua ni qumia; 22oqori kecega ena oti, ni sa tauri tiko; ni ra sa vaka na vunau kei nai vakavuvuli ni tamata? 23Ia e dina ga sa rairai me vuku na veika oqo, e na viaviamasu kei na yalomalumalumu, kei na vakararawataka na yago; ka sega ni yaga, sa vakamamautaki ga kina na yago.
Currently Selected:
KOLOSA 2: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
