EMOSI 9
9
Ena sega ni tarovi rawa na nodra cudruvi, 1-10. Ena vakaduri tale na vale i Tevita ka bale eliu, 11-15.
1Au a raica na Turaga ni sa tu e na dela ni cabocabo-ni-soro: ka sa kaya ko koya, Mo yavita na kenai ukuuku momokiti, me yavala kina na duru ni sogo: ia mo yavita na uludra kecega; ia na kena vo vei ira ka'u na vakamatea e nai seleiwau: ena sega e dua vei ira me dro bula, ena sega talega ni vakabulai ko koya sa dro. 2Ke ra kelia ki bulu, sa na kauti ira cake maikina na ligaqu; ia ke ra kaba cake ki lomalagi, ka'u na kauti ira sobu maikina. 3Ia ke ra vunitaki ira e na dela i Kameli, ka'u na qarai ira ka kauti ira maikea; ia ke ra tabonaki ira mai na mataqu e na boto ni wasawasa, ka'u na vosa ki na gata maikea, ka na kati ira ga: 4ia ke ra lako vakabobula e matadra na nodra meca, ka'u na vakarota nai seleiwau ka na vakamatei ira maikea: ia ka'u na wanonovi ira me ra ca kina, ka segai me ra vinaka.
5Ni sai koya na Turaga ko Jiova ni lewe vuqa ka tara na vanua, ka sa waicala kina, a ra na dui tagi ko ira kece era tiko kina: sa na tubu cake sara ga me vaka na Uciwai; ka sa na malumu sobu tale me vaka na Uciwai mai Ijipita. 6Sai koya e tara mai lomalagi na nonai taba loma ni vale mai lomalagi, ia na vu ni nona lomalagi sa tauyavutaka ko koya e vuravura; sai koya ka kaciva na wai ni wasawasa, ka sovaraka sobu ki na dela i vuravura: na yacana ga ko Jiova.
7Dou sa sega li ni vakataki ira na kai Iciopea vei au, oi kemudou na Isireli? sa kaya ko Jiova. Koi au beka se segai ka kauti ira cake na Isireli mai na vanua ko Ijipita? kei ira na kai Filisitia mai Kafitori, kei ira talega na kai Siria mai Kiri? 8Raica, sa wanonova tiko na matanitu ca ko ya na mata ni Turaga ko Jiova, ka'u na vakarusa tani talega mai na dela i vuravura, ia ka'u na sega ni vakarusa sara na mataqali i Jekope, sa kaya ko Jiova. 9Ni sai au, raica, ka'u na vakarota, ia ka'u na dui tauvuloni ira tani na mataqali i Isireli ki na veimatanitu kecega, me vaka sa tauvuloni na sila e na vulo, ka na sega ni lutu e dua na vuana ki na qele. 10Ena mate e nai seleiwau ko ira kece na noqu tamata erai valavala ca, era kaya, Ena sega ni vauci keda se liutaki keda na ca oqori.
11E na siga ko ya au na vakatura tale na vale i Tevita, ko ya sa bale sobu, au na viria tale na tikina sa cicila; ia na tikina ka rusa au na vakaduria, ia ka'u na tara tale me vaka e na gauna eliu: 12me ra taukena na kena vo ni Itomi, kei na veimatanitu kecega, sa cavuti kina na yacaqu, sa kaya ko Jiova, o koya ka cakava na ka oqo. 13Sa kaya ko Jiova, Raica, ena yaco na gauna, ena vauci koya sa tamusuka na vuana, ko koya sa daucuki were, o koya talega sa sikaraka na vua-ni-vaini ena vauci koya sa kaburaka na sila; ia na veiulu-ni-vanua ena vakatauca mai na waini vou, ia ena vakawaicalataki na veiulu-ni-koro kecega. 14Ia ka'u na kauti ira tale mai na noqu tamata na Isireli era vakabobulataki, ka ra na tara na veikoro lala, ka vakatawa; ka ra na tea na veiwere-ni-vaini, ka gunuva na kena waini; era na cakava talega na were, ka kania na vuana. 15Ia ka'u na vakadeitaki ira e na nodra vanua, ka ra na sega ni cavuti tani tale mai na nodra vanua ka'u sa solia vei ira, sa kaya ko Jiova na nomudou Kalou.
Currently Selected:
EMOSI 9: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific