EMOSI 7
7
Sa vakaraitaki vei Emosi na nodra cudruvi na Isireli, ka sa tukuna vei ira na raivotu ni vodre, 1-3, kei na bukawaqa, 4-6, kei na vatu i vakarau, 7-9. Sa tarovi koya ko Amasaia, ka sa cudruvi kina, 10-17.
1Sa vakaoqo na ka e vakaraitaka vei au na Turaga ko Jiova; ka raica, sa bulia na vodre ni sa qai tekivu me tubu na co emuri; ka raica, sa kena co emuri oqo ni sa tamusuki oti na nona co na tui. 2Ia ni ra sa kania oti na co ni vanua, au a qai kaya, Kemuni na Turaga Jiova, au masuti kemuni mo ni loloma mada mai, ena tu rawa vakaevei ko Jekope? ni sa lailai ko koya. 3Sa veivutunitaka na ka oqo ko Jiova: Ena sega ga ni yaco, sa kaya ko Jiova.
4Sa vakaoqo na ka e vakaraitaka vei au na Turaga ko Jiova: ka raica sa kaci na Turaga ko Jiova, me ra mai ia na veilewai kaya e na bukawaqa, a sa kama kina na wasa levu, ka sa kania e dua na tiki ni vanua. 5Au a qai kaya, Kemuni na Turaga Jiova, mo ni kakua mada: ena tu rawa vakaevei ko Jekope? ni sa lailai ko koya. 6Sa veivutunitaka na ka oqo ko Jiova: A ka talega oqo ena sega ni yaco, sa kaya na Turaga ko Jiova.
7Sa vakaoqo na ka e vakaraitaka vei au ko koya: ka raica, sa wavu tu na Turaga e na dela ni bai e tu vakadodonu, ka sa dua na vatu i vakarau e na ligana. 8A sa kaya vei au ko Jiova, A cava ko sa raica, Emosi? Au a kaya, E dua na vatu i vakarau. Sa qai kaya na Turaga, Raica, au na viritu e dua na vatu i vakarau e na kedra maliwa na noqu tamata na Isireli: au na sega sara ni vosoti ira tale: 9ia ena vakalalataki na veiyasana cecere nei Aisake, a veitikina tabu talega nei Isireli ena vakacacani; ia ka'u na tu cake me'u vala kei na mataqali i Jeropoami e nai seleiwau.
10Sa qai talaki ko Amasaia na bete mai Peceli vei Jeropoami na tui Isireli, ka kaya, Sa bukia na kemu vere ko Emosi e na kedra maliwa na mataqali i Isireli: sa sega ni vosota rawa na vanua na nona vosa kecega. 11Ni sa kaya vakaoqo ko Emosi, Ena mate e nai seleiwau ko Jeropoami, ia ko ira na Isireli era na kau tani sara vakabobula mai na nodra vanua.
12A sa kaya talega ko Amasaia vei Emosi, Ko iko na rairai, mo la'ki dro ki na vanua ko Juta, ka kana madrai maikea, mo ia talega kina na parofisai: 13ia mo kakua ni parofisai tale e Peceli: ni sa nona koro tabu na tui, kei na vale vakaturaga ni nona matanitu.
14Sa qai kaya vei Amasaia ko Emosi, Sa sega ni parofita koi au, au sa sega talega ni luve ni parofita; ai vakatawa ni sipi ga koi au, kei na dausamaki lolo: 15ka sa kauti au ko Jiova ni'u sa muria na qele ni sipi, ka sa kaya vei au ko Jiova, Mo la'ki parofisai vei ira na noqu tamata na Isireli. 16Ia oqo, mo rogoca na vosa i Jiova: Ko sa kaya, Kakua ni ko parofisaitaka na ca vei ira na Isireli, kakua talega ni ko parofisaitaka na ca vei ira na mataqali i Aisake. 17O koya oqo sa kaya kina ko Jiova; A watimu ena ia na dautagane e na koro, a luvemu tagane talega kei na luvemu yalewa era na bale e nai seleiwau, a nomu vanua talega, ena votai ni sa vakarauti e na dali; ia ko iko ko na mate e na vanua tawa savasava: ko ira talega na Isireli, era na kau tani sara vakabobula mai na nodra vanua.
Currently Selected:
EMOSI 7: FOV
Highlight
Copy
Compare
Share
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
