EMOSI 5
5
Sa lelevaki ira na Isireli ko Emosi, 1-3. Sa vakaroti ira me ra veivutuni, 4-17. Sa tukuna na siga i Jiova ni ka rerevaki, 18-20. Ena cata ga na Kalou na cakacaka vakailasu vua, 21-27.
1Dou rogoca na vosa oqo ka'u sa lagata, io, na kemudou lele, na mataqali i Isireli. 2Sa bale na goneyalewa ko Isireli, ena sega ni tu cake tale: sa biu laivi tu e nona vanua, sa sega e dua me vakaduri koya cake. 3Ni sa kaya vakaoqo na Turaga ko Jiova; A koro ka daulako maikina e le dua na udolu, ena vo ga kina e le dua na drau, kei na koro e daulako maikina e le dua na drau ena vo ga kina e le tini, ki na mataqali i Isireli.
4Ni sa kaya vakaoqo ko Jiova ki na mataqali i Isireli, Dou golevi au, mo dou bula kina: 5ia kakua ni dou golevi Peceli, kakua talega ni curu ki Kilikali, kakua talega ni lako ki Pieri-sepa: ko Kilikali ena kau tani vakabobula; kei Peceli, ena yaco me ka wale sara. 6Dou golevi Jiova, mo dou bula; de kida ko koya me vaka na bukawaqa ki na mataqali i Josefa, ka sa kama voli, ka sega e dua mai Peceli me bokoca.
7Oi kemudou sa vakatanitaka na lewa dodonu me ka gaga, ia nai valavala dodonu dou sa biuta no ga ki na qele, 8dou golevi koya ka buli Akituro kei Oraioni, ka sa vukica na butobuto loaloa me mataka, ia na siga sa vukica ko koya me bogi butobuto: ka sa kaciva na wai ni wasawasa, ka sovaraka sobu ki na dela i vuravura: ko Jiova na yacana: 9o koya sa vagumatuataki koya e vakacacani me vorata na qaqa, me qai la'ki kaba na koro kaukauwa ko koya sa vakacacani.
10Era cati koya sa ia na veivunauci e na matamata-ni-koro, ka vakasisilataki koya sa vosa dodonu. 11Ia ni dou sa buturaki koya sa dravudravua ka kovea mai vua nai kaukau sila: dou a tara na veivale e na veivatu e ta, ia dou na sega ni tiko kina; dou a tea na veiwere-ni-vaini domoni, ia dou na sega ni gunuva na kena waini. 12Ni'u sa kila na nomudou dautalaidredre, kei na nomudou i valavala ca e kaukauwa: ia era sa vakararawataka na yalododonu, ka tara na tautauri, ka sa vakatala tani na dravudravua mai na matamata-ni-koro.
13Ia ko koya sa yalomatua e na gauna ko ya ena tiko lo ga, ni sa gauna ca. 14Dou vakasaqara na ka vinaka, ka segai na ka ca, mo dou bula: ena qai tiko vata kei kemudou ko Jiova, na Kalou ni lewe vuqa, me vaka dou a kaya. 15Dou cata na ka ca, ka vinakata na ka vinaka, ka vakadeitaka na lewa dodonu e na matamata-ni-koro: ena qai yalololoma beka ko Jiova na Kalou ni lewe vuqa vei ira na kena vo vei Josefa.
16O koya oqo sa kaya kina ko Jiova, na Kalou ni lewe vuqa, na Turaga; E na saqata ni koro kecega ena ia na tagi; e na salatu kece talega era na kaya ulei! ulei! ka ra na kaciva nai vakatau-ni-were me tagi, kei ira sa dau ni tagi me ra mai tagi yaso. 17E na veiwere-ni-vaini kece ena ia na tagi: ni'u na lako voli yani e na kemudou maliwa.
18E ca vei kemudou sa gadreva me yaco na siga i Jiova! e vaka tale evei na kena yaga vei kemudou? a siga i Jiova sa butobuto, ka sega ni rarama. 19Sa vaka na tamata sa drotaka na laioni, ka sa tavaki koya e dua na pera; se curu ki vale, ka ravita na lalaga e na ligana, ka sa kati koya na gata. 20Ena sega li ni butobuto na siga i Jiova, ka sega ni rarama? io, me butobuto sara ga, ka sega na rarama e tu kina?
21Au sa cata, au sa vakasisilataka na nomudou so levu, au na sega talega ni vinakata na nomudou i soqosoqo tabu. 22Ni dou vakacabora vei au nai soro kama kei na nomudou i madrali laukana, au na sega ni vakadonuya: ia nai soro ni veivinakati, na nomudou manumanu uro, au na sega ni goleva. 23Kauta tani vei au na domo ni nomudou meke; ia ka'u sa bese ni rogoca na domo ni nomudou api. 24Ia me dave yani me vaka na wai na lewa dodonu, kei nai valavala dodonu me vaka na uciwai sa vuabale. 25Dou a vakacabora li vei au nai soro kei nai madrali e na veikau ka yabaki vasagavulu, oi kemudou na mataqali i Isireli? 26Ia dou a colata ga na vale ni nomudou Moloke kei Kaiuni na nomudou matakau, na kalokalo ni nomudou kalou, ko ya dou a cakava me nomudou. 27O koya oqo ka'u na vakauti kemudou tani kina vakabobula me sivi ko Tamasiko, sa kaya ko Jiova, sa Kalou ni lewe vuqa na yacana.
Currently Selected:
EMOSI 5: FOV
Highlight
Copy
Compare
Share
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
