EMOSI 3
3
Sa dodonu me ra cudruvi, ni ra sega ni muri koya na Kalou, 1-8. Sa qai tukuni ruarua na nodra cudruvi kei na vuna, 9-15.
1Dou rogoca na vosa oqo sa vosataka ko Jiova ka baleti kemudou, na Isireli, ka baleta na mataqali kecega ka'u a kauta cake mai na vanua ko Ijipita, ka vaka,
2Sai kemudou duaduaga ka'u a kila vei ira na veimataqali kece e vuravura: o koya oqo ka'u na cudruvi kemudou kina e na vuku ni nomudou caka cala kecega.
3Me rau lako vata li e lewe rua, kevaka erau sa sega ni yalovata? 4Me na tagi li na laioni mai veikau, ni sa sega na kena e kunea? me na tabalaka li na domona na luve ni laioni mai na nonai kotokoto, kevaka sa sega ni rawata e dua na kena? 5Me na tudaitaki li na manumanu vuka e na dai e na qele, ni sa sega na kena dai? me na riba li na dai mai na qele, ni sa sega sara na ka e tudaitaki? 6Me na uvuci li na davui e loma ni koro, ka sega ni rere kina na tamata? me dua li na ca e na koro, me na sega ni vakayacora ko Jiova? 7E dina, ena sega ni vakayacora e dua na ka na Turaga ko Jiova, ena vakaraitaka mada ga na nona vosa vuni vei ira na nonai talatala na parofita. 8Sa tagi na laioni, ko cei me na sega ni rere? sa vosa na Turaga ko Jiova, o cei me na sega ni parofisai?
9Dou vakarogoya e na veivale vakaturaga mai Asitoti, kei na veivale vakaturaga e na vanua ko Ijipita, ka kaya, Dou vakasoqoni kemudou ki na veiulu-ni-vanua mai Samaria, ka raica na masa levu maikina, kei ira era sa vakasaurarataki maikina. 10Ni ra sega ni kila me ra caka dodonu, sa kaya ko Jiova, era binia na ka e kovei ka butakoci e na nodra veivale vakaturaga. 11O koya oqo sa kaya kina na Turaga ko Jiova; Sa na dua mai na meca, io, sa na vakavolivolita na vanua; ka na kauta tani maivei iko na nomu kaukauwa, ena vakayanaki talega na nomu veivale vakaturaga. 12Sa kaya vakaoqo ko Jiova; Me vaka nai vakatawa sa kaliraka mai na gusu ni laioni e rua na yava ni sipi, se na tiki ni daligana; ena kaliraki vakakina na Isireli era tiko mai Samaria e na tutu ni mocemoce, kei ira mai Tamasiko e nai davodavo.
13Dou rogoca, ka vakadinadina ki na mataqali i Jekope, sa kaya na Turaga ko Jiova, na Kalou ni lewe vuqa, 14E na siga ka'u na cudruvi ira kina na Isireli, e na vuku ni nodra talaidredre, ka'u na qai cudruva na veicabocabo-ni-soro mai Peceli: io, na tutuna balavu cake ni cabocabo-ni-soro ena qai tamusuki, ka na lutu ki na qele. 15Au na vakacataka na vale ni vula i liliwa, kei na vale ni vula i katakata; ena rusa talega na veivale tabua, ka na vakaoti laivi na veivale lelevu, sa kaya ko Jiova.
Currently Selected:
EMOSI 3: FOV
Highlight
Copy
Compare
Share
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
