CAKACAKA 27
27
Sa vodoka e dua na waqa ko Paula me lako ki Roma, a sa vakasalataka ni na yaco na ca e na soko, 1—12. A sa labati ira na cagi levu, a sa ca na waqa, a ra sa qalo bula kecega ki vanua na lewe ni waqa, 13—44.
1Ia ni sa lewai oti me keitou soko ki Itali, era sa soli Paula, ka so tale na tamata sa vesu, vua e dua na turaga ni mata sotia nei Akusito, na yacana ko Juliase. 2Ia ni keimami sa vodoka e dua na waqa ni Atiramitio, keimami sa vakarewa, ka nakita me keimami sokoravita na baravi kei Esia; a sa dua na kai Masitonia mai Cesalonaika, o Arisitako, sa lako kei keimami. 3Ia e na mataka keimami sa uru ki Saitoni. A sa lomavinaka vei Paula ko Juliase, a sa sereki koya me lako vei ira na wekana me vakacegui kina. 4Keimami sa qai soko tani yani eke, ka sokoraviti Kipiro, ni sa ca na cagi. 5Ia keimami sa sokota na wasawasa kei Silisia kei Pamifilia, ka yaco sara ki Maira mai Lisia.
6A sa kunea kina na turaga ni valu e dua na waqa ni Alekisadria, sa soko ki Itali; a sa vakavodoki keimami kina. 7Ia ni keimami sa soko malua ga ka bogi vuqa, ka yaco vakadredre me donui Nito, ni sa tarovi keimami na cagi, keimami sa sokoraviti Kiriti, ka donui Salimoni; 8a sa vo e lailai me dredre ni sivia, keimami sa yacova e dua na yasana na yacana na Toba Vinaka; a sa voleka kina e dua na koro ko Lasea.
9Ia ni sa qai bogi vuqa, a sa mani dredre na soko, ka ni sa qai oti na gauna ni Lolo, sa qai vakasalataki ira ko Paula, 10ka kaya vei ira, Oi kemuni na turaga, au sa kila ena levu na ka e ca kei na ka eda na biuta e na soko oqo, ena sega ni ca walega nai usana kei na waqa, oi keda talega. 11Ia na turaga ni valu sa vakabauti rau na turaga ni waqa kei na kenai taukei, ka segai na veika sa kaya ko Paula. 12Ia ni sa sega ni vinaka na toba ko ya me kele kina e na vula i liliwa, era sa lewe vuqa vei ira sa lewa me ra soko tani yani, ni ra nanuma de sa rawa ki Finaisi, me ra kele kina e na vula i liliwa; ko ya na toba ki Kiriti, a sa donuya na ceva era kei na tokalau vualiku.
13Ni sa qai liwa vakamalua na ceva, era sa vakasama ni ra sa rawata na ka era a nakita, era sa cavui kelekele, ka sokoraviti Kiriti. 14A sa sega mada ni dede, sa qai laba na cava levu, a yacana ko Urokilitoni. 15Ia ni sa lebuka na laca ni waqa, ka sega kina ni tau rawa ki na mata ni cagi, keimami sa laiva ga me savu yani. 16A sa savu kina ka volekata e dua na yanuyanu na yacana ko Kilota, a sa vo e lailai sara me keimami sega ni rawata na velovelo: 17ia ni ra sa vakarewataka cake mai oqo, era sa cakava nai vakatukuwalu, a ra sa vakatukuwalutaka kina na waqa; ia ni ra sa rere de ra kasa ki na nuku, era sa sereka na gacagaca, ka savu yani. 18Ia ni keimami sa suaigelegele vakalevu sara e na cava, e na mataka era sa biuta nai usana: 19ia e na bogi tolu keimami sa biuta e na ligaimami na gacagaca ni waqa. 20Ni sa qai bogi vuqa ka sega ni rairai na mata-ni-siga se na veikalokalo, a sa laba na cava levu, sa qai takali sara vei keimami na nuitaka na bula.
21Ia ni sa dede na nodra sega ni kana, sa tu cake ko Paula e na kedra maliwa, ka kaya, Oi kemuni na turaga, sa dodonu mo ni vakarogoci au eliu, ka kakua ni cavui kelekele mai Kiriti, sa yaco kina na ca oqo kei na biu. 22Ia oqo, au sa masuti kemuni mo ni kua ni yalolailai: ni sa sega e dua vei kemuni ena yali na nona bula, ena ca ga na waqa: 23ni sa tu voleka vei au e na bogi oqo e dua na agilose ni Kalou, o koya ka’u sa nona, o koya talega ka’u sa qarava, 24a sa kaya, Kakua ni rere, Paula; o na kau ga kivei Sisa: ka raica, sa soli ira kecega vei iko na Kalou o ira dou sa soko vata. 25O koya oqo, koi kemuni na turaga, mo ni vakacegu ni’u sa vakadinata na Kalou, ni na yaco ga me vaka sa tukuni mai vei au. 26Ia sa da na biu ga ki na dua na yanuyanu.
27Ia ni sa yaco mai nai katinikava ni bogi, ni keitou sa veisavuyaki tiko e na wasawasa ko Atiria, ni sa lomaloma-ni-bogi era sa nanuma na lewe ni waqa era sa volekata e dua na vanua; 28a ra sa vakarauta na wai, a ra sa kila sa katu ruasagavulu: ia ni ra sa savu yani vakalailai, ka vakarauta tale na wai, era sa kila sa katu tinikalima. 29Ia ni ra sa rere de keimami kasa ki na veivatu, era sa biuta nai kelekele e va mai na mua ni turaga, a ra sa gadreva tu me siga na vanua.
30Ia ni ra sa vakarau me dro tani e na waqa ko ira na kai mua, ni ra sa tukuca na velovelo ki wai, me vaka era sa ia me biuta nai kelekele mai na mua kiliu 31sa kaya ko Paula vua na turaga ni valu, vei ira talega na sotia, Kevaka era na sega ni tiko ga e na waqa ko ira oqo, kemuni na sega ni bula rawa. 32Era sa qai seledrutia nai noka ni velovelo ko ira na sotia, a ra sa biuta me ciri yani.
33Ia ni sa voleka mai na siga, sa cikevi ira kecega ko Paula me ra kana, ka kaya, Oqo na kenai katinikava ni bogi kemuni sa wawa ga ka lolo, ka sega ni kania e dua na ka; 34o koya oqo ka’u sa masuti kemuni kina mo ni kana mada: ena yaga mo ni bula kina: ni sa sega e dua vei kemuni ena lutu mai e dua na drau ni uluna. 35Ia ni sa vosa oti vakaoqo, sa taura na madrai, a sa vakavinavinaka vua na Kalou e na matadra kecega; ia ni sa dovia, sa vakatekivu me kana. 36A ra sa qai vakacegui kecega, ka ra kana talega ko ira. 37Ia koi keimami kecega sa tiko e waqa keimami sa le rua na drau ka vitusagavulu ka ono. 38Ia ni ra sa kana oti ka mamau, era sa vakamamadataka na waqa, ka biuta na sila ki wai.
39Ni sa qai siga mai, era sa sega ni kila na vanua: a ra sa kunea e dua na toba sa vakamatasawa, a ra sa bosea me ra vakasa kina na waqa, kevaka e rawa. 40Ia ni ra sa drutia laivi nai kelekele ni waqa, era sa biuta tu mai wai, ka sereka nai noka ni uli, ka vakarewa na laca levu ki na cagi, ka soko vaka ki vanua. 41A ra sa ciri ki na yasana e sota vata kina e rua na drodro, a ra sa vakasa na waqa, a sa coba sara na mua kiliu, ka sega ni yavala rawa, a sa kasere na mua turaga e na kaukauwa ni biau. 42A ra sa bose ko ira na sotia me ra vakamatei ira na tamata era sa vesu tu, de ra qalo dro eso, ka bula. 43Ia sa vinakata na turaga ni valu me vakabulai Paula, a sa tarovi ira kina mai na ka era sa nanuma; a sa kaya me rika eliu ko ira sa qalo rawa; me ra liu ki vanua: 44ia ko ira na kena vo, eso e na rara eso, ka so e na ka tani ni waqa. A sa vakaoqo, era sa cabe bula kecega ki vanua.
Currently Selected:
CAKACAKA 27: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific