2 SAMUELA 21
21
Sa dua na dausiga, a sa oti ni sa soli e lewe vitu na luve i Saula, me ratou kunati mai Kipea, 1-14. Sa vala kei ira na Isireli ko ira na kai Filisitia, a sa moku e lewe va na tamata yagolevu, 15-22.
1Sa qai dua na dausiga e na gauna i Tevita, ka yabaki tolu ka veitaravi: a sa masu vei Jiova ko Tevita. A sa kaya ko Jiova, E na vuku i Saula ga, kei na nona lewe-ni-vale dauveivakamatei ko ya, ni sa vakamatei ira na kai Kipioni ko koya. 2A sa kacivi ira na kai Kipioni, ko koya na tui, ka kaya vei ira; (ia sa sega ni kawa i Isireli ko ira na kai Kipioni, era sa kena vo vei ira na Amoraiti; a sa bubului eliu vei ira ko ira na Isireli: a sa segata ko Saula me mokuti ira e na nona lomakatakata e na vukudra na Isireli kei ira na Juta); 3a sa kaya vei ira na kai Kipioni ko Tevita, A cava me'u kitaka e na vukumudou? ka cava me'u cakava me kenai bulubulu, mo dou vosavakalougatataka kina nai votavota i Jiova? 4A ra sa kaya vua ko ira na kai Kipioni, Me kakua vei keitou na siliva se na koula mai vei Saula, se vei ira na nona lewe-ni-vale; me kakua talega ni vakamatei e dua vei ira na Isireli e na vuku i keitou. A sa kaya ko koya, A ka dou sa kaya, au na kitaka e na vukumudou. 5A ra sa kaya vua na tui, A tamata ka vakaoti keitou, ka nakita me vakarusai keitou, me keitou kakua sara ni tiko e na nodra veiyasana na Isireli, 6me soli vei keitou e lewe vitu vei iratou na luvena tagane, ia keitou na vakalilici iratou e na mata i Jiova mai Kipea nei Saula, o koya ka digitaka ko Jiova. A sa kaya na tui, Au na solia.
7A sa maroroi Mefiposece ko koya na tui, o koya na luve i Jonacani na luve i Saula, e na vuku ni bubului vei Jiova erau a kitaka ko Tevita kei Jonacani na luve i Saula. 8Ia ko koya na tui sa kauti Erimoni kei Mefiposece, erau tagane ka luve i Saula kei Risipa, o koya ka luve i Eya; kei iratou na lewe lima eratou tagane ka luve i Maikali, na luve i Saula ka yalewa, o iratou ka vakasucuma ko koya vei Atirieli na luve i Pasiliai na kai Miola: 9a sa soli iratou kivei ira na kai Kipioni, a ra sa vakalilici iratou mai na ulu-ni-vanua e na mata i Jiova: a ratou sa bale vata ko iratou vituvitu, a ratou sa vakamatei e na gauna ni tamusuki sila, ka ni sa qai tekivu na tamusuki parile. 10A sa kauta ko Risipa na luve i Eya e dua nai sulu taga ka birika e dela ni vatu levu, me tiko kina mai nai vakatekivu ni tamusuki sila, ka yacova na gauna sa tauci iratou kina na uca mai lomalagi; a sa sega ni laiva na manumanu vuka me ro vei iratou e na siga, se na manumanu ni vanua e na bogi.
11A sa tukuni vei Tevita na ka ka kitaka ko Risipa na luve i Eya, na watina lailai i Saula. 12A sa lako ko Tevita ka kauta na sui i Saula, kei na sui i Jonacani na luvena, maivei ira na kai Jepesi-kiliati, era a butakoca mai na sala ni koro mai Peci-sani, na tikina ka vakalilici rau kina ko ira na kai Filisitia, e na siga sa mokuti Saula kina mai Kilipoa ko ira na kai Filisitia: 13a sa kauta cake maikea ko koya na sui i Saula, kei na sui i Jonacani na luvena; a ra sa kumuna vata na suidratou eratou a vakalilici. 14A ra sa buluta na sui i Saula kei Jonacani na luvena, e na vanua nei Penijamini mai Sela, e nai bulubulu i Kisi na tamana; a ra sa kitaka na ka kecega ka vakarota ko koya na tui. A sa oti na ka oqo, sa qai vakamasuti na Kalou e na vuku ni vanua.
15A ra sa vala tale ko ira na kai Filisitia kei ira na Isireli; a sa lako sobu ko Tevita, kei ira vata kaya na nona tamata, a ra sa vala kei ira na kai Filisitia: a sa malumalumu mai ko Tevita, 16A sa dua vei ira na luve ni tamata yagolevu, ko Isipipinopi, sa tolu na drau na sikeli parasa na kena bibi ni nona moto, ka vauci tu vua nai yaragi vou; a sa nakita me vakamatei Tevita. 17A sa vukei koya ko Apisai na luve i Seruaia, ka mokuta mate na kai Filisitia. Era sa qai bubului vei Tevita ko ira na nona tamata, ka kaya, O na sega tale ni lako kei keitou ki nai valu, mo kakua kina ni bokoca na cina i Isireli.
18A sa oti na ka oqo sa dua tale nai valu kei ira na kai Filisitia mai Kopo: a sa mokuti Safi e dua vei ira na luve ni tamata yagolevu ko Sipikei na luve i Usa.
19A sa dua tale nai valu kei ira na kai Filisitia mai Kopo, ia ko Elanani na luve i Jeere-orikimi, na kai Pecileema, sa mokuta na taci i Kolaiaci, na kai Kaca, na dia ni nona moto sa vaka na nodra kau na dautali sulu.
20Sa dua tale nai valu mai Kaca, a sa dua na tamata yagolevu, a sa tauyaono nai qaqalo ni ligana ruarua, ka tauyaono nai qaqalo ni yavana ruarua, e ruasagavulu ka va ni wili vata; ko koya talega na luvena na tamata yagolevu. 21Ia ni sa bolei ira na Isireli ko koya, sa mokuti koya ko Jonacani na luve i Semea, na tuaka i Tevita.
22Sa sucu na luve ni tamata yagolevu mai Kaca ko iratou na lewe va oqo, a ratou sa bale e na liga i Tevita, kei na ligadratou na nona tamata.
Currently Selected:
2 SAMUELA 21: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
