2 SAMUELA 17
17
Sa vakabauta ko Apisalomi nai vakavuvuli i Usai, 1-14. Sa tukuni vei Tevita, a sa lako ki tai kadua ni Joritani, 15-22. Sa kukunataki koya ko Eitofeli, 23. Sa la'ki Meeneimi ko Tevita, ka levu kina na magiti ka caka vei koya kei ira na nona tamata, 24-29.
1A sa kaya vei Apisalomi ko Eitofeli, Me'u digitaka mada e le tinikarua na udolu na tamata, ia ka'u na ia, ka cicimuri Tevita e na bogi oqo: 2ia ka'u na vauci koya ni sa ceguoca ka liga malumalumu, ia ka'u na vakarerei koya: ka ra na dro na tamata kecega era tiko vata kaya; ia ka'u na mokuti koya duaduaga na tui: 3ia ka'u na kauti ira tale mai vei iko na tamata kecega: ia na tamata ko sa qara sa vaka na nodra lesu kece mai: sa na qai vakacegu na tamata kecega. 4Ka sa vinaka sara na vosa oqo vei Apisalomi, vei ira kece talega na qase ni Isireli. 5A sa kaya ko Apisalomi, Me tei kacivi mada ko Usai talega na Ariki, me da rogoca talega na ka e kaya ko koya.
6A sa lako mai vei Apisalomi ko Usai, a sa vosa vua ko Apisalomi, ka kaya, Sa vosa vakaoqo ko Eitofeli: sa vakaevei, me da muria na nona vosa, se segai? kevaka e segai, mo vosa mai ko iko. 7A sa kaya vei Apisalomi ko Usai, Sa sega ni vinaka nai vakavuvuli sa tauca ko Eitofeli e na siga oqo. 8Sa kaya talega ko Usai, Ko ni sa kilai tamamuni kei ira na nona tamata, ni ra sa tamata qaqa ko ira, a sa rarawa sara na yalodra, me vaka e dua na pera sa tobo na luvena mai vanua: a sa tamata i valu ko tamamuni, ka na sega kina ni moce vata kei ira na tamata. 9Raica, sa na vuni tu ko koya e na dua nai keli, se dua na tikina tani: ia ni na bale ko ira eso ni sa qai ia, ena kaya ko koya sa rogoca, Raica, sa dua na moku levu vei ira na tamata era muri Apisalomi: 10ka na waicala sara kina ko koya talega sa qaqa, ka sa vaka na yalo ni laioni na yalona; ni sa kila ko ira kecega na Isireli ni sa tamata qaqa ko tamamuni, a ra sa tamata qaqa ko ira era sa tiko vata kaya. 11O koya oqo ka'u sa kaya kina me ra soqoni vata vei kemuni ko ira kecega na Isireli, mai Tani ka yaco sara ki Pieri-sepa, me vaka na mata ni nuku mai matasawa na kedra lewe vuqa; ia mo ni lako talega e nai valu koi kemuni. 12Ia eda na vauci koya e na dua na tikina sa na kune kina ko koya, ia eda na qai sikiti koya sara me vaka sa tau ki na vanua na tegu: ia ena sega ni vo ko koya se dua vei ira kecega era tiko vata kaya. 13Ia kevaka sa curu ko koya ki na dua na koro, era na qai kauta mai na dali ki na koro ko ya ko ira kecega na Isireli, ia eda na yarataka ki na uciwai, ka na sega tale ni kune maikea e dua na vatu lailai.
14A sa kaya ko Apisalomi kei ira kecega na Isireli, Sa vinaka na ka sa vakavulica ko Usai na Ariki, ka ca na ka sa vakavulica ko Eitofeli. Ni sa lewa ko Jiova me vakawaletaka nai vakavuvuli vinaka i Eitofeli, ka me vakayacora ko Jiova na ka ca vei Apisalomi.
15A sa kaya ko Usai kivei rau na bete, ko Setoki kei Epaiaca, Sa vakaoqo nai vakavuvuli i Eitofeli vei Apisalomi kei ira na qase ni Isireli; a sa vakaoqo na noqu i vakavuvuli: 16ia drau talaki kusarawa mada, ka tukuna vei Tevita, ka kaya, Mo kakua ni moce e na bogi edaidai e na buca ni veikau, mo lako vakatotolo sara ki tai kadua; de sa tilomi sara na tui kei ira na tamata kecega era tiko vata kaya.
17Ia erau a tiko ko Jonacani kei Eiimaasi mai Eni-rokeli; a sa lako e dua na vada ka tukuna vei rau; ni sa tabu me rau raici ni rau sa curu ki na koro; ka rau a la'ki tukuna vei Tevita na tui. 18A sa raici rau e dua na cauravou, ka tukuna vei Apisalomi; ia erau sa vakariri sara yani, ka la'ki curu ki na nona vale e dua na tamata mai Peurimi, a sa dua nai keli-wai e nona loma ni bai; a rau a lako sobu kina. 19A sa ia na yalewa, ka tevuka nai ubi ki na gusu ni keli-wai, ka kaburaka e delana na sila sa qaqi oti; a sa sega ni kilai kina na ka ko ya. 20A ra sa lako mai vua na yalewa ki vale ko ira na tamata i Apisalomi, a ra sa kaya, Sa evei ko Eiimaasi kei Jonacani? A sa kaya vei ira na yalewa, Erau sa qalo-kosova na uciwai. Ia ni ra sa qara, ka sega ni kunea, era sa lesu tale ki Jerusalemi. 21Ia ni ra sa lako yani, erau sa lako cake mai na keli-wai, ka la'ki tukuna vei Tevita na tui, a rau sa kaya vei Tevita, Mo ni cavu tu ka lako vakariri ki tai kadua ni wai; ni sa vakaoqo na nonai vakavuvuli ko Eitofeli me caka vei kemuni. 22A sa cavu tu ko Tevita kei ira kece na tamata era tiko vata kaya, a ra sa qalo-kosova na Joritani; ia ni sa kida na mataka sa sega ni vo e dua sa sega ni qalo-kosova oti na Joritani.
23Ia ko Eitofeli, ni sa raica sa sega ni vakabau na ka sa tukuna ko koya, sa vauca nai vodovodo ki na nona asa, ka sa ia, ka lako yani ki na nona vale, ki na nona koro, ka tataunaka na nona ka kece, ka qai kukunataki koya; a sa mate, ka sa bulu e nai bulubulu nei tamana.
24A sa yaco ki Meeneimi ko Tevita. A sa qalo-kosova na Joritani ko Apisalomi, o koya kei ira talega na Isireli era sa tiko vata kaya. 25A sa lesi Amasa ko Apisalomi me turaga ni valu mei sosomi kei Joapi: ko Amasa ko ya na luvena e dua na tamata, na yacana ko Jicera e dua na luve i Isireli, o koya ka curu vua na luve i Neasi ko Apikali, na taci i Seruaia na tina i Joapi. 26A ra sa tiko ko ira na Isireli kei Apisalomi e na vanua ko Kiliati.
27Ia ni sa yaco ko Tevita ki Meeneimi, ko Sopi na luve i Neasi mai Rapa ka nodra na luve i Amoni, kei Mekiri na luve i Amieli mai Lo-tipari, kei Pasiliai na kai Kiliati mai Rokilimi, 28eratou sa kauta eso nai mocemoce, ka so na peseni, ka so na bilo qele; na witi talega, kei na parile; kei na madrai droka, kei na sila sa tavu, ka so na pini, kei na pini tani, sa tavu, 29kei na oni, kei na uro ni wai-ni-sucu, ka so na sipi, kei na wai-ni-sucu ni pulumokau sa buli, me kei Tevita, ka me kedra na tamata era tiko vata kaya; ni ratou sa kaya, Era sa viakana na tamata, a ra sa malumalumu, ka viagunu mai na veikau.
Currently Selected:
2 SAMUELA 17: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
