2 SAMUELA 14
14
Sa lakovi tale ko Apisalomi, 1-24. Sa matavinaka ko koya, 25-27. Ni sa yabaki rua ko koya mai Jerusalemi, sa qai kauti koya ko Joapi vua na tui, 28-33.
1A sa kila ko Joapi na luve i Seruaia ni sa gole vei Apisalomi na yalona na tui. 2A sa talaki ki Tikoa ko Joapi, ka kauta maikina e dua na yalewa vuku, ka kaya vua, Mo vakataka mada e dua sa yasovaka na mate, ka mo la'ki tabui sulu, ka mo kakua ni lumuti iko e na waiwai, ia mo vakataka na yalewa sa yasovaka vakadede na mate: 3ia mo lako vua na tui, ka vosa vakaoqo vei koya. A sa vakavulica vua na vosa ko Joapi.
4Ka ni sa la'ki vosa vua na tui na yalewa ni Tikoa, sa cuva e matana ki na qele, ka vakarokoroko, ka kaya, Mo ni veivuke, na tui. 5A sa kaya vua ko koya na tui, A cava sa yacovi iko? A sa kaya ko koya, Sa dina ni'u sa yada koi au, sa mate na watiqu. 6Ia ka le rua na luvequ tagane na nomuni vada, a rau a veivala e na were, a sa sega e dua me tataro, a sa mokuta e dua ko koya nai karua, ka vakamatea. 7Ia raica, sa tu vakaukauwa kivei au na nomuni vada na mataqali taucoko ka ra sa kaya, Mo soli koya mada ka mokuta na tacina, me keitou vakamatei koya, me kenai sau ni tacina ka vakamatea ko koya; ia keitou na vakamatea talega nai taukei emuri: a ra na bokoca kina na qilaiso ni noqu buka sa vo tu, ka na sega ni laiva me vo na yaca vei koya na watiqu, se nona kawa e dela i vuravura. 8A sa kaya vua na yalewa na tui, Mo lako yani ki na nomu vale, ia koi au, ka'u na lewa e na vukumu.
9A sa kaya vua na tui ko koya na yalewa ni Tikoa, Me bale vei au, noqu turaga na tui, na kena ca, ka me baleta talega na mataqali i tamaqu; ia me kakua ni cala na tui kei na nonai tikotiko vakaturaga. 10A sa kaya na tui, O koya sa vosa vei iko mo kauti koya mai vei au, ena qai sega ni tarai iko tale. 11A sa kaya na yalewa, Me nanuma mada ko koya na tui na nomuni Kalou ko Jiova, mo kakua kina ni laivi koya sa sauma na dra me vakalevutaka na veivakarusai, de ra vakamatea na luvequ. A sa kaya ko koya, Me vaka sa bula ko Jiova, ena sega ni lutu ki na qele e dua na drau ni uluna na luvemu.
12Sa qai kaya na yalewa, Me'u vosataka mada na nomuni vada e dua na vosa vei kemuni na noqu turaga na tui. A sa kaya ko koya, Mo vosa mai. 13A sa kaya na yalewa, A cava ko ni sa nanuma kina vakaoqo vei ira na tamata ni Kalou? ni sa vosataka na ka oqo na tui sa vaka e dua sa cala, ni sa sega ni kauta tale mai ko koya na tui na nona sa vakasevi. 14Ni da na mate vakaidina, ka na vaka na wai sa tasova ki na qele, sa sega ni taloivaki rawa tale; ia na Kalou sa sega talega ni kauta tani na nona bula e dua na tamata: sa vakarawarawataka na nona tale mai ko koya ka vakasevi. 15Ia na ka oqo ka'u sa mai vosa kina vei kemuni na noqu turaga na tui, ni ra sa vakarerei au na tamata: a sa kaya na nomuni vada, Au na qai vosa vua na tui; ena kitaka beka na tui na ka sa kerea na nona vada. 16Ni na rogoca na tui ka na vakabula na nona vada mai na liga ni tamata sa via vakarusai keirau vata kei na luvequ mai nai votavota ni Kalou. 17A sa kaya na nomuni vada, Me ka mada ni veivakacegui na vosa ni noqu turaga na tui; ni sa vaka na agilose ni Kalou na noqu turaga na tui, me kunea na ka vinaka kei na ka ca: a sa tiko kei kemuni ko Jiova na nomuni Kalou.
18A sa kaya vua na yalewa na tui, Mo kakua mada ni vunia vei au na ka ka'u na tarogi iko kina. A sa kaya na yalewa, Me vosa mada mai na noqu turaga na tui. 19A sa kaya na tui, Sa tu vei iko na liga i Joapi e na ka kecega oqo, se segai? A sa vosa ko koya na yalewa, ka kaya, Me vaka sa bula na yalomuni, na noqu turaga na tui, sa sega e dua me gole rawa ki nai matau se ki nai mawi mai na ka kecega sa kaya na noqu turaga na tui: ni sa vakarota vei au ko Joapi ga na nomuni tamata, ka vakavulica vei au na nomuni vada na vosa kecega oqo: 20na nona via vakaduatanitaka na ka ko ya sa kitaka kina na ka oqo ko Joapi na nomuni tamata: ia ka sa vuku na noqu turaga me vaka na nona vuku e dua na agilose ni Kalou, me kila na ka kecega e vuravura.
21A sa kaya vei Joapi ko koya na tui, Raica, ka'u sa cakava na ka oqo, mo lako mada, mo kauta tale mai na cauravou ko Apisalomi. 22A sa cuva vakatoboicu ki na qele ko Joapi, ka cuva, ka vakavinavinaka vua na tui: a sa kaya ko Joapi, Sa kila edaidai na nomuni tamata ni'u sa kune loloma e matamuni, noqu turaga na tui, ni sa vakayacora ko koya na tui na vosa ni nona tamata. 23A sa ia ko Joapi, ka lako yani ki Kesuri, ka kauti Apisalomi mai ki Jerusalemi. 24A sa kaya na tui, Me lesu yani ko koya ki na nona vale, ka me kakua ni rairai vei au ko koya. A sa lesu yani ki na nona vale ko Apisalomi, ia sa sega ni rairai vei koya na tui.
25Ia sa sega e dua vei ira kecega na Isireli me sa qoroi e na vuku ni nona matavinaka me vakataki Apisalomi; mai na qeteqete ni yavana ka cavaraka na buradelana, sa sega na tikina e ca. 26Ia ni sa kotiva na uluna, (sa daukotiva ni sa cava na yabaki, ni sa bibi vua, sa daukotiva kina,) sa dauvakarautaka na kena bibi ni drau ni uluna, a sa rua na drau na sikeli me vaka nai vakarau ni tui. 27A sa sucu na luve i Apisalomi, e le tolu na tagane, ka dua na yalewa, a yacana ko Tema: sa yalewa matavinaka ko koya.
28A sa tiko mai Jerusalemi ko Apisalomi ka yabaki rua, ka sa sega ni raici koya na tui. 29A sa talaki ko Apisalomi kivei Joapi, me vakauti koya vua na tui, a sa bese ni lako yani vua. A sa talaki tale vua ko koya, a sa bese ga ni lako yani. 30A sa kaya vei ira na nona tamata, Raica, sa voleka na were i Joapi ki na noqu tikina, a sa tu kina na nona parile; dou la'ki vakama mada. A ra sa vakama na were ko ira na tamata i Apisalomi. 31A sa ia ko Joapi, ka lako vei Apisalomi ki na nona vale, a sa kaya vua, A cava era sa vakama kina na noqu were na nomu tamata? 32A sa kaya vei Joapi ko Apisalomi, Raica, ka'u a talaki vei iko ka kaya, Mo lako mai ki ke, me'u talai iko vua na tui, mo kaya, A cava beka ka'u sa lakovi kina mai Kesuri? sa vinaka cake ke'u a tikotikoga kina; ia oqo, me'u raici koya mada na tui; ia kevaka sa tu vei au na ca, me vakamatei au ko koya. 33A sa lako vua na tui ko Joapi, ka tukuna vua: a sa kacivi Apisalomi ko koya, a sa lako mai ko koya vua na tui, a sa vakacuva na matana ki na qele e na mata ni tui: a sa reguci Apisalomi na tui.
Currently Selected:
2 SAMUELA 14: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
