2 PITA 2
2
Sa tukuni ira ko koya nai vakavuvuli ca, kei na tamata era sa muri ira, 122.
1Ia sa tiko vei ira na kai noda eliu na parofita vakailasu eso, me vaka ni na tiko talega vei kemudou nai vakavuvuli vakailasu eso, era na kauta vuni mai na veisei e veivakarusai, ni ra sa cakitaka na Turaga sa voli ira, a ra sa vakayacora vakasauri mai na nodra rusa. 2Era na lewe vuqa talega era na muria na nodra i valavala e dauvakasisila: ena vosavakacacataki talega nai vakavuvuli dina e na vukudra. 3Ia ni ra sa daukocokoco era na vakaiyau voli e na vukumudou e na vosa e dauveivakaisini: ia na lewa makawa me ra ca sa sega so ni berabera, a sa sega ni moce na nodra rusa.
4Io, kevaka sa sega ni lomani ira na agilose kai valavala ca na Kalou, ka sa biuti ira sobu ki eli, a sa vesuki ira e na sinucodo ni butobuto, me ra tauri tiko me yaco mada na siga ni lewa; 5a sa sega talega ni lomani ira tiko na kai vuravura makawa, a sa vakabulai Noa ka lewe vitu tale, o koya ka dauvunautaka nai valavala dodonu, ka sa luvuci ira na kai vuravura era sa sega ni lotu: 6a sa vakamai rau na koro ko Sotoma kei Komora me dravusa, ka sa vaqeavutaka ni sa cudruva, a sa qisia me kedrai vakarau na tawa lotu e na gauna emuri; 7a sa vakabulai Loti na tamata yalododonu, o koya sa rarawa na lomana e na vuku ni nodra i valavala vakasisila na tamatai valavala ca; 8(io, sa tiko na tamata yalododonu ko ya e na kedra maliwa, ia ni sa raica ka rogoca, sa vakararawataki na yalona sa dodonu e na veisiga e na nodra i valavala ca;) 9sa kila kina na Turaga me vakabulai ira era sa daulotu mai na veivakatovolei, me maroroi ira talega na tawa yalododonu me yaco mada na siga ni lewa me ra qai cudruvi: 10ia ka vakalevu sara ko ira era sa daumuria na yagodra e na gagadre ca e dukadukali, a ra sa beci ira era sa turaga. Era sa daubole, era sa yalokaukauwa, era sa sega ni rere ni ra vosavakacacataki ira na turaga. 11Ia ko ira na agilose, era sa uasivi cake e na kaukauwa kei na qaqa, era sa sega ni vosavakacacataki ira ka beitaki ira e na mata ni Turaga. 12Ia ko ira oqo me vaka na manumanu tawa vuku, sa muria na lomadra, sa caka me vesuki ka vakarusai, era sa vosavakacacataka na veika era sa sega ni kila; ia era na rusa sara e na nodra i valavala e veivakarusai; 13ka na rawata nai sau ni valavala tawa dodonu: ni ra sa vakasama me ka ni reki nai valavala mamarau e na siga: era sa dukadukali ka velavela! a ra sa daukitaka na ka era marau kina ni ra dauveivakaisini, a ra sa dauia na kana veilomani kei kemudou: 14a sa sinai na matadra e na dauyalewa, ka sa sega ni mudu rawa ni valavala ca; a ra sa dauvakacalai ira na tamata era sa yalowai: a yalodra sa dauia na kocokoco: era sa luve ni veivakarusai: 15era sa lesu tani mai na sala dodonu, a ra sa sese, ni ra sa muria nai valavala i Pelami na luve i Piori, o koya sa vinakata nai voli ni valavala tawa dodonu; 16ia sa vunauci e na nonai valavala ca: sa vosa na asa galu e na domo ni tamata a sa tarova na lialia ni parofita.
17Oqori na mata-ni-wai sa sega ni to, a o sa veikauyaki e na cava; sa tu ga me nodra na butobuto loaloa sa tawa mudu.
18Ni ra sa vosataka na vosa sa tubu cake walega e na lialia, era sa lari ira sa qai bula walega maivei ira era sa dauia na caka cala, e na vuku ni gagadre ca ni yago, e nai valavala vakasisila. 19Era sa yalataka vei ira na lalaga, ia ko ira era sa vakabobulataki e na ca; ni sa vakabobulataki na tamata e na ka sa rawai koya. 20Ia kevaka era sa dro tani mada mai na dukadukali ni vuravura oqo ni ra sa kila na Turaga nai Vakabula ko Jisu Karisito, ka sa tao tale kina, ka rawai, era sa qai ca vakalevu e na gauna emuri, era ca vakalailai ga e nai vakatekivu. 21Ni sa vinaka cake vei ira me ra kakua ni kila nai valavala dodonu, ka ca me ra kila mada, ka qai lesu tani mai na vunau tabu sa soli vei ira. 22Ia sa yaco ga vei ira na ka sa vosataka na vosa vakaibalebale dina, Sa lesu tale na koli ki na nona lua, kei na vuaka sa vakasilimi oti me boroboro tale e na lolobo.
Currently Selected:
2 PITA 2: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific