2 TUI 16
16
Sa tui ko Easi.
1E na kenai katinikavitu ni yabaki i Peka na luve i Rimalaia, sa tekivu me lewa ko Easi na luve i Jocame na tui Juta. 2Sa ruasagavulu na yabaki i Easi ni sa tekivu me lewa, a sa lewa tiko mai Jerusalemi ka yabaki tinikaono: a sa sega ni daucaka dodonu e na mata i Jiova na nona Kalou, me vakataki Tevita na nona qase. 3A sa muria ga na nodra i valavala na tui Isireli; ia sa vakacabora na luvena e loma ni bukawaqa, me vaka na ka vakasisila ni veimatanitu ka vakaseva ko Jiova e matadra na Isireli. 4A sa vakacaboi soro ko koya, ka vakama na ka boi vinaka, e na veitikina cecere, kei na veiulu-ni-koro, kei na ruku ni kau bulabula kecega.
5Sa qai lako cake ko Risini na tui Siria, kei na tui Isireli, ko Peka na luve i Rimalaia, me rau kabai Jerusalemi: a ra sa buku druadrua vei Easi, ka ra sa sega ga ni rawai koya. 6E na gauna ko ya sa rawai Elaci tale me nei Siria ko Risini na tui Siria, a sa vakasevi ira yani na Juta mai Elaci: a ra sa lako ki Elaci na kai Siria, ka tiko kina, ka yacova na siga oqo. 7A sa vakatadu mata ko Easi kivei Tikilaci-pileseri na tui Asiria, ka kaya, Koi au na nomu tamata, kei na luvemu: mo lako cake mai, ka vakabulai au mai na liga i tui Siria, kei na liga i tui Isireli, erau sa noqu meca. 8A sa taura ko Easi na siliva kei na koula sa kune e na vale i Jiova, kei nai yau mai na vale ni tui, ka vakauta me ka-ni-loloma vua na tui Asiria: 9A sa vakarorogo vua ko tui Asiria: a sa lako cake ki Tamasiko ko tui Asiria, ka kaba, ka kauti ira vakabobula na lewena ki Kiri, ka vakamatei Risini.
10A sa lako ki Tamasiko ko Easi na tui me tavaki Tikilaci-pileseri na tui Asiria, a sa raica nai cabocabo-ni-soro mai Tamasiko: a sa vakauta ko Easi na tui kivei Uraija na bete na kenai cakacaka ni cabocabo-ni-soro kei na kenai vakatakarakara, me vaka na kenai cakacaka kecega. 11A sa cakava ko Uraija na bete nai cabocabo-ni-soro me vaka na ka kecega ka talaki kina mai Tamasiko ko Easi na tui: sa cakava oti vakakina ko Uraija na bete, ni sa bera na nona tale mai Tamasiko ko Easi na tui. 12Ia ni sa tale mai Tamasiko na tui, sa qai kunea nai cabocabo-ni-soro: a sa toro ki nai cabocabo-ni-soro na tui, ka vakacaboi soro kina. 13A sa vakama na nonai soro kama, kei na nonai madrali laukana; ka livia na nonai madrali liviraki, ka kureitaka na dra ni nonai soro ni veivinakati, e nai cabocabo-ni-soro. 14Ia nai cabocabo-ni-soro parasa ka tu e na mata i Jiova, sa kauta ko koya mai na mata ni vale, mai na tadrua ni cabocabo-ni-soro kei na vale i Jiova, ka tauca ki na yasa ni cabocabo-ni-soro, vaka ki na tokalau. 15A sa vakaroti Uraija na bete ko Easi na tui, ka kaya, Mo vakama e nai cabocabo-ni-soro levu nai soro kama ni mataka, kei nai madrali laukana, ni yakavi, kei na nonai soro kama na tui, kei na nonai madrali laukana, kei na nodra i soro kama kecega na lewe ni vanua, kei na nodra i madrali laukana, kei na nodra i madrali liviraki; ka kureitaka ki delana na dra kecega ni soro kama, kei na dra ni soro kecega: ia nai cabocabo-ni-soro parasa, au na taro kina. 16A sa kitaka ko Uraija na bete, me vaka na ka kecega ka vakarota ko Easi na tui. 17A sa taya laivi na batina mai na kenai tutu ko Easi na tui, ka laveta tani na taqi mai na deladratou: ka tauca sobu na taqi levu mai na deladratou na pulumokau parasa sa tu e rukuna, ka tauca ki na dua na rara vatu: 18ia nai vakaruru ni siga ni vakacecegu ka ra tara mai na vale, kei nai curucuru ni tui e tautuba, sa vukica ko koya mai na vale i Jiova e na vuku i tui Asiria.
19Ia na kena vo ni cakacaka i Easi sa cakava ko koya, sa sega li ni volai e nai vola ni veika sa caka e na nodra gauna na tui Juta? 20A sa moce vata kei ira na nona qase ko Easi, a sa bulu vata kei ira na nona qase e na koro i Tevita: a sa tui ko Esekaia na luvena, me kenai sosomi.
Currently Selected:
2 TUI 16: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
