2 TUI 13
13
Sa tui Isireli ko Jioaasi, ka qai taravi koya ko Joasi. Sa mate ko Ilaisa.
1E na kenai karuasagavulu ka tolu ni yabaki i Joasi na tui Juta, na luve i Easaia, sa buli me tui vei ira na Isireli mai Samaria ko Jioaasi na luve i Jeu, ka sa lewa yabaki tinikavitu. 2A sa daucaka ca ko koya e na mata i Jiova, ka muria nai valavala ca i Jeropoami na luve i Nipati, ko koya ka vakaivalavalacataki ira na Isireli; sa sega ni biuta tani ko koya. 3A sa waqa na cudru i Jiova vei ira na Isireli, a sa soli ira ki na liga i Eseeli na tui Siria, kei na liga i Peni-etati na luve i Eseeli, e na veigauna kecega. 4A sa vakamamasu vei Jiova ko Jioaasi, a sa rogoci koya ko Jiova: ni sa raica sa vakasaurarataki ko ira na Isireli, ni sa vakasaurarataki ira na tui Siria. 5(A sa solia ko Jiova vei ira na Isireli e dua nai vakabula, a ra sa vakabulai kina mai na ligadra na kai Siria: a ra sa tiko mai na nodra veivale laca ko ira na Isireli, me vaka eliu. 6Ia ka ra sa sega ni biuta nai valavala ca ni mataqali i Jeropoami, ko koya ka vakaivalavalacataki ira na Isireli; era sa muria tiko ga: a sa tu talega mai Samaria na kalouyalewa ni veikau.) 7A sa sega ni laiva na tamata vei Jioaasi, e le limasagavulu ga na tamata sa dauvodo ose, ka tini na qiqi-ni-valu, ka le tini na udolu na tamata sa lako e yavadra; ni sa vakarusai ira na tui Siria, ka kitaki ira me ra vaka na kuvu-ni-qele ni ra sa dausamulaki.
8Ia na vo ni cakacaka i Jioaasi, kei na ka kecega sa cakava ko koya, kei na nona kaukauwa, sa sega li ni volai e nai vola ni veika sa caka e na nodra gauna na tui Isireli? 9A sa moce vata kei ira na nona qase ko Jioaasi, a ra sa buluti koya mai Samaria: a sa tui ko Joasi na luvena, me kenai sosomi.
10E na kenai katolusagavulu ka vitu ni yabaki i Joasi na tui Juta, sa tekivu me lewa vei ira na Isireli mai Samaria ko Jioasi na luve i Jioaasi, ka sa lewa yabaki tinikaono. 11A sa daucaka ca ko koya e na mata i Jiova; sa sega sara ni biuta tani nai valavala ca i Jeropoami na luve i Nipati, ko koya ka vakaivalavalacataki ira na Isireli: sa muria tiko ko koya.
12Ia na kena vo ni cakacaka i Joasi, kei na ka kecega sa cakava ko koya, kei na nona qaqa sa vala kina kei Amasaia na tui Juta, sa sega li ni volai e nai vola ni veika sa caka e na nodra gauna na tui Isireli? 13A sa moce vata kei ira na nona qase ko Joasi; a sa tiko e nonai tikotiko vakaturaga ko Jeropoami; a sa bulu vata ko Joasi kei ira na tui Isireli mai Samaria.
14A sa tauvi mate ko Ilaisa e na mate ka ciba kina. A sa lako sobu vua ko Joasi na tui Isireli, a sa tagi ni sa raica na matana, a sa kaya, Na tamaqu, na tamaqu! na nodra qiqi-ni-valu na Isireli, kei na nodra tamata sa dauvodo ose! 15A sa kaya vua ko Ilaisa, Mo ni taura na dakai kei na gasau. A sa taura ko koya na dakai kei na gasau. 16A sa kaya vua na tui Isireli ko koya, Ni taura e na ligamuni na dakai. A sa taura kina e na ligana. A sa tauca na ligana ko Ilaisa ki na liga ni tui. 17A sa kaya ko koya, Mo ni dolava nai sogo cicila vaka ki na tu-i-cake. A sa dolava ko koya. A sa kaya ko Ilaisa, Ni vana mada. A sa vana ko koya. A sa kaya ko koya, Na gasau ni veivakabulai i Jiova; ia na gasau ni veivakabulai maivei ira na kai Siria: ni ko na mokuti ira na kai Siria mai Efeki, ka vakaoti ira sara. 18A sa kaya ko koya, Mo ni taura na gasau. A sa taura ko koya. A sa kaya ko koya vua na tui Isireli, Mo ni yavita na qele. A sa yavita vakatolu, ka qai cegu. 19A sa cudru vua ko koya na tamata ni Kalou, ka kaya, E dodonu mo ni yavita vakalima, se vakaono; ko ni a qai mokuti ira na kai Siria, ka vakaotia sara; ia oqo, ko na mokuti ira na kai Siria vakatolu ga.
20A sa ciba ko Ilaisa, a ra sa buluti koya. A sa lako mai ki na vanua na nodra veimataivalu na Moapi, ni sa qai tekivu na yabaki. 21Ia ni ra sa buluta tiko e dua na tamata, raica, era sa kunea e dua na mataivalu; a ra sa biuta na tamata ki nai bulubulu i Ilaisa: ia ni sa tara na sui i Ilaisa na yago ni tamata, sa bula tale ko koya, ka tu cake e na yavana.
22A sa vakasaurarataki ira na Isireli ko Eseeli na tui Siria, e na gauna kecega i Jioaasi. 23Ia sa lomani ira ko Jiova, ka sa yalololoma vei ira, ka sa nanumi ira, e na vuku ni nona veiyalayalati kei Eparaama, kei Aisake, kei Jekope, ka sega ni via vakarusai ira, ka sa bera ni biuti ira tani e matana. 24A sa mate ko Eseeli na tui Siria; a sa tui ko Peni-etati na luvena, me kenai sosomi. 25Ia ko Jioasi na luve i Jioaasi, sa taura tale mai vei Peni-etati na luve i Eseeli na veikoro ka kovea ko koya mai vei Jioaasi na tamana e nai valu. Sa yaviti koya vakatolu ko Joasi, ka rawata tale na veikoro nei Isireli.
Currently Selected:
2 TUI 13: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
