2 TUI 11
11
Sa lewa ko Acalaia, ka qai moku; a sa qai tui Juta ko Joasi ni sa gone ga.
1Ia ko Acalaia na tina i Easaia ni sa raica, sa mate na luvena, sa ia ko koya, ka vakawabokotaka kecega na kawa ni tui. 2Ia na gane i Easaia, ko Jiosepa na luve i Jorami na tui, sa kauta vuni na luve i Easaia, ko Joasi, mai na kedra maliwa na luve ni tui era sa moku; ka sa vunitaki koya maivei Acalaia e na vale ni moce, kei koya sa susuga, a sa sega kina ni mate ko koya. 3A rau sa vuni vata kaya e na vale i Jiova, ka yabaki ono. A sa lewa na vanua ko Acalaia.
4Ia e na kenai kavitu ni yabaki, sa talaki ko Jioiata, ka kauti ira mai na turaga ni yayadrau, kei ira na kapiteni ni valu, kei ira nai vakatawa, a sa kauti ira vua ki na vale i Jiova, ka ia na veiyalayalati kei ira, ka vakabubuluitaki ira e na vale i Jiova, ka vakaraitaka vei ira na luvena na tui. 5A sa vakaroti ira, ka kaya, Dou cakava na ka oqo: me dua na kena wase vei kemudou sa curu mai e na siga ni vakacecegu, me vakatawa na vale ni tui; 6kei nai karua ni kena wase, me tiko e na matamata-ni-koro ko Suri; kei nai katolu ni kena wase, me tiko e na matamata-ni-koro mai dakudra nai vakatawa: ia dou na vakatawa na vale me kakua ni curu kina e dua. 7Ia ka rua na kena wase vei kemudou kecega sa curu yani e na siga ni vakacecegu, me vakatawa na vale i Jiova, voleka vua na tui. 8Ia dou na tiko vakavolivoliti koya na tui ni dou sa dui taura tu na nomudou i yaragi: ia ko koya sa sivita nai yalayala ni vakatawa, me vakamatei: ia dou tiko kaya na tui ni sa curu yani ka curu tale mai.
9A ra sa kitaka ko ira na turaga ni yayadrau me vaka na ka kecega sa vakarota vei ira ko Jioiata na bete: a ra sa dui kauti ira yadua na nona tamata sa dodonu me curu mai e na siga ni vakacecegu, kei ira e dodonu me curu yani e na siga ni vakacecegu, a ra sa lako vei Jioiata na bete. 10A sa solia ko koya na bete, vei ira na turaga ni yayadrau, na moto kei nai sasabai i Tevita na tui, ka tu e na vale i Jiova. 11A sa tu ko ira nai vakatawa, ni ra sa taura yadua na nonai yaragi, ka vakavolivolita na tui, mai na yasa i matau ni vale, ka yaco ki na yasa i mawi ni vale, ka tu voleka ki nai cabocabo-ni-soro kei na vale. 12A sa kauta ki tautuba na luvena na tui ko koya, ka vakaisalataka e nai sala ni tui, ka solia vua nai vola ni vunau; a ra sa buli koya me tui, ka lumuti koya; a ra sa cobo, ka kaya, Me bula na tui. 13Ia ni sa rogoca ko Acalaia na nodra ue nai vakatawa, kei na tamata, sa lako ko koya vei ira na tamata ki na vale i Jiova. 14Ia ni sa rai voli ko koya, raica, sa tu e na kenai tutu ko koya na tui, me vaka na kenai valavala, kei ira na turaga, kei ira era dauuvu davui era tu vata kei na tui, a ra sa reki kecega na lewe ni vanua, ka uvu davui. A sa dresulaka na nonai sulu ko Acalaia, ka kacivaka, Na vere! na vere! 15A sa vakarota ko Jioiata na bete, vei ira na turaga ni yayadrau, ko ira na turaga ni valu, ka kaya vei ira, Dou kauti koya ki tautuba e na kedra maliwa nai vakatawa: ia me vakamatei e nai seleiwau na tamata sa muri koya. Ni sa kaya na bete, Me kakua ni vakamatei e loma ni vale i Jiova. 16A ra sa taura; a sa lako ko koya e na sala sa daulako kina na ose ki na vale ni tui: a sa vakamatei maikea.
17A sa ia ko Jioiata na veiyalayalati kei Jiova kei koya na tui kei ira talega na tamata, me ra nona tamata ko Jiova: vei koya talega na tui kei ira na tamata. 18A ra sa curuma na bure kalou i Peali ko ira kecega na lewe ni vanua, ka basuraka; ka ra talaraka sobu na kenai cabocabo-ni-soro, ka ra sa vakacataka sara na kena veimatakau, a ra sa vakamatei Matani na bete i Peali e na mata ni cabocabo-ni-soro Ia sa lesia na bete na turaga eso me lewa na vale i Jiova. 19A sa kauti ira na turaga ni yayadrau, kei ira na kapiteni ni valu, kei ira nai vakatawa, kei ra kecega na lewe ni vanua; a ra sa kauti koya sobu na tui mai na vale i Jiova, ka lako e na sala sa lako ki na matamata-ni-koro era sa dautiko kina nai vakatawa, ki na vale ni tui. A sa tiko ko koya e na nodra i tikotiko vakaturaga na tui. 20A ra sa reki kecega na lewe ni vanua, a sa tiko vinaka na koro; a ra sa vakamatei Acalaia e nai seleiwau mai na vale ni tui. 21Sa vitu na yabaki i Jioasi ni sa tekivu me lewa:
Currently Selected:
2 TUI 11: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
