2 VEIGAUNA 4
4
Sa caka nai yaya ni vale i Jiova.
1Ka sa cakava e dua nai cabocabo-ni-soro parasa, sa ruasagavulu na kiupiti na kena balavu, ka ruasagavulu na kiupiti na kena raraba, ka tini na kiupiti na kena cecere.
2A sa cakava e na ka sa vakawaicalataki na taqi levu, e tini na kiupiti mai na batina e dua ki na batina kadua; sa momokiti, a sa lima na kiupiti na kena cecere: ke sa vakavolivoliti e na dua na wa sa na tolusagavulu na kena kiupiti. 3A sa so nai vakatakarakara ni pulumokau e rukuna, sa vakavolivolita, e tini e na dua na kiupiti, ka volita na taqi levu: sa vakawaicalataki na pulumokau me rua na yatu ni sa vakawaicalataki vata. 4Sa tu e deladra na pulumokau e tinikarua, e tolu sa namata ki na tokalau, ka tolu sa namata ki ra, ka tolu sa namata ki na ceva, ka tolu sa namata ki na tu-i-cake: a sa toka e cake e deladra na taqi levu, a ra sa vakanadaku ki loma kecega. 5Ia na kena vavaku sa tauvata kei na raba ni liga, a sa caka na batina me vaka na bati ni bilo, e na se ni viavia; ka sa rauta e rua na oba ka rua na udolu ka lima na drau na kaloni.
6Sa cakava talega ko koya e tini na taqi; a sa viritura e lima e nai matau, ka lima e nai mawi, me deredere kina: na veika era sa vakacabora mei soro kama era sa derea kina; ia na taqi levu sa nodra i vuivui na bete.
7A sa cakava ko koya e tini nai tutu-ni-cina koula, me vaka na kedrai vakatakarakara, ka viritura e na vale ni soro, e lima e nai matau, ka lima e nai mawi.
8Sa cakava talega ko koya e tini na tepeli, ka vakatikora e na vale ni soro, e lima e nai matau, ka lima e nai mawi. A sa cakava e dua na drau na peseni koula.
9Sa cakava talega ko koya na nodra rara vakabai na bete, kei na rara vakabai levu, kei nai sogo ni rara vakabai, a sa botana na kedrai sogo e na parasa. 10A sa viritura na taqi levu e na yasa i matau ni vale vaka ki na tu-i-cake, ka donuya na ceva.
11A sa cakava na sedre ko Urami, kei nai sivi me kau tani kina na dravusa, kei na peseni me kau kina na dra me kureitaki. A sa vakaotia ko Urami na cakacaka kecega sa cakava ko koya vei Solomoni na tui, ki na vale ni Kalou: 12E rua na duru, kei nai ukuuku momokiti e na domodomo sa tu e na dela ni duru ruarua; ka rua na ka sa caka vakalawa, me ubia nai ukuuku momokiti ruarua e na domodomo sa tu e na deladrau na duru; 13kei nai ukuuku e va na drau e vaka na pomekaraneti, ki na ka vakalawa ruarua; e rua na yatu ukuuku e vaka na pomekaraneti ki na dua na lawa, me ubia nai ukuuku momokiti ruarua e na domodomo sa tu e na deladrau na duru; 14sa cakava talega na veitutu, a sa cakava na taqi e na deladratou nai tutu; 15e dua na taqi levu, kei na pulumokau e tinikarua e rukuna; 16kei na kuro, kei nai sivi me kau tani kina na dravusa, kei nai qila ni lewe ni manumanu: ia na parasa sa solo vakavinaka nai yaya kecega oqo sa cakava ko Urami na tamana vei Solomoni na tui, ki na vale i Jiova. 17Sa cakava oqo na tui e na buca mai Joritani, e na vanua tete e na macawa i Sukoci kei Siretaca. 18A sa cakava nai yaya kecega oqo ko Solomoni, ka sa ka levu sara: ni sa sega ni qarai na kena bibi na parasa.
19A sa cakava ko Solomoni nai yaya kecega sa tu e na vale ni Kalou: nai cabocabo koula talega, kei na tepeli sa dautu kina na madrai dauraici, 20kei nai tutu-ni-cina koula dina, kei na nodra cina me caudre me vaka na kenai valavala, e na mata ni loqi ni Vosa; 21kei na se ni kau, kei na cina, kei na saga-ni-buka, e na koula, io na koula talei; 22kei nai koti-ni-cina, kei na peseni, kei nai taki, kei na miqa ni ka boi vinaka, e na koula dina; ia e nai curucuru ni vale, sa caka e na koula na kenai sogo eloma ki na tikina tabu sara, kei nai sogo ni vale, ko ya na vale ni soro.
Currently Selected:
2 VEIGAUNA 4: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
