2 VEIGAUNA 33
33
Sa tui Juta ko Manasa, a sa uasivi e nai valavala ca; sa qai veivutuni ko koya ni sa tiko vakararawa mai Papiloni, ka sa yaco tale ki Jerusalemi, 1-20. Sa tui Juta ko Emoni, 21-25.
1Sa tinikarua na yabaki i Manasa ni sa buli me tui, ka sa lewa mai Jerusalemi ka yabaki limasagavulu ka lima: 2a sa caka ca e na mata i Jiova, me vaka na nodra i valavala vakasisila na veimatanitu tani, o ira ka biuta tani ko Jiova e matadra na Isireli. 3Ni sa tara tale ko koya na veiyasana cecere ka basuka sobu ko Esekaia na tamana, ka sa vakaduria nai cabocabo-ni-soro me nodra na Peali, ka cakava eso na kalouyalewa ni veikau, ka sorova na kalokalo kecega ni lomalagi, ka qaravi ira. 4Sa cakava talega eso nai cabocabo-ni-soro e na vale i Jiova, sa kaya oti kina ko Jiova, Ena tiko mai Jerusalemi na yacaqu ka sega ni mudu. 5Ka sa cakava eso nai cabocabo-ni-soro vei ira kecega na kalokalo ni lomalagi e na rara vakabai ruarua ni vale i Jiova. 6A sa vakacabori ira na luvena e loma ni bukawaqa, e na buca ni luve i Inomi: ka sa daunanuma ki na siga eso, ka sa parofisai e na gata, ka dauveiriti kei ira na yalo mai bulu, kei ira na dauveinita: sa caka ca vakalevu ko koya e na mata i Jiova, me vakacudrui koya. 7Ka sa viritura e dua na matakau ceuceu, na matakau ka cakava ko koya, e na vale ni Kalou, oqori ka vosa kina na Kalou kivei Tevita kei Solomoni na luvena, ka vaka, Au na vakatikora na yacaqu e na vale oqo, kei Jerusalemi, ko ya au sa digitaka e na nodra mataqali kecega na Isireli ka tawa mudu. 8Ia ka'u na sega talega ni kauta tani na yavadra na Isireli mai na vanua au a lesia me nodra na nomudou qase, kevaka era na nanuma ga ka cakava na ka kecega au sa vakarota vei ira, me vaka na vunau taucoko, kei nai lesilesi, kei nai valavala ni soro, sa tukuna ko Mosese.
9Ka sa vakacalai ira na Juta kei ira na kai Jerusalemi ko Manasa, me ra sa uasivi cake vei ira na veimatanitu tani e nai valavala ca, o ira sa vakarusa ko Jiova e matadra na Isireli. 10A sa vosa ko Jiova kivei Manasa, vei ira talega na nona tamata: a ra sa bese ni rogoca. 11E na vuku ni ka oqo sa kauti ira mai ko Jiova na kapiteni ni vale nei tui Asiria, a ra sa tauri Manasa e na loma ni veiwa-vakavotona, ka vesuki koya e na sinucodo, ka kauta ki Papiloni. 12Ia ni sa rarawa ko koya, sa vakamasuti Jiova na nona Kalou, ka vakamalumalumutaki koya vakalevu e na mata ni nodra Kalou na nona qase. 13Ka sa masu kivei koya: ka sa yalovinaka vua ko koya, ka rogoca na nona vakamamasu, ka kauti koya tale ki Jerusalemi ki na nona matanitu. Sa qai kila ko Manasa ni sa Kalou ko Jiova.
14Ia ni sa oti oqo, sa viria ko koya e dua na bai e taudaku ni koro i Tevita, e na yasa i Kaioni sa donuya na ra, e na buca, ka yala ki nai curucuru ni matamata-ni-koro ni ika, ka vakavolivoliti Ofeli, a sa viria me cecere sara, ka sa lesia eso na kapiteni ni valu ki na koro vakabai kecega nei Juta. 15A sa kauta tani na kalou tani, kei na matakau mai na vale i Jiova, kei nai cabocabo-ni-soro kecega sa tara ko koya eliu e na ulu-ni-vanua ni vale i Jiova, e Jerusalemi talega, ka biuta tani ki taudaku ni koro. 16A sa vakavinakataka nai cabocabo-ni-soro i Jiova, ka vakacabora kina nai soro ni veivinakati kei nai soro ni vakavinavinaka, ka vakarota vei ira na Juta me ra qaravi Jiova na nodra Kalou na Isireli. 17Ia era sa vakacaboi soro tiko ko ira na tamata e na veitikina cecere, ia vei Jiova ga na nodra Kalou.
18Ia na kena vo ni cakacaka i Manasa, kei na nona masu vua na nona Kalou, kei na nodra vosa na rairai era sa vosa vei koya e na yaca i Jiova na nodra Kalou na Isireli, raica, sa volai e na kedrai vola na tui Isireli. 19A nona masu talega, kei na nona vakarogoci, kei na nonai valavala ca kecega, kei na nona caka cala, kei na veiyasana sa tara kina ko koya na veitikina cecere, ka vakaduria kina na kalouyalewa ni veikau kei na matakau ceuceu, ni sa bera ni vakamalumalumutaki koya; raica, sa volai vata kei na nodra vosa na rairai. 20A sa moce vata kei ira na nona qase ko Manasa, a sa bulu e na nona vale: ka sa tui ko Emoni na luvena, me kenai sosomi.
21Sa yabaki ruasagavulu ka rua ko Emoni ni sa buli me tui, ka sa lewa mai Jerusalemi ka yabaki rua. 22A sa caka ca ko koya e na mata i Jiova, me vaka ka cakava ko Manasa na tamana: ni sa vakacaboi soro ko Emoni ki na matakau ceuceu kecega ka cakava ko Manasa na tamana, ka qaravi ira. 23Ka sega ni vakamalumalumutaki koya e na mata i Jiova, me vaka ka vakamalumalumutaki koya ko Manasa na tamana; ia sa uasivi cake tiko e na nona caka cala ko Emoni. 24A sa buki kena vere ko ira na nona tamata, ka vakamatei koya e na nona vale. 25Ia ko ira na lewe ni vanua, era sa vakamatei ira kecega era sa bukia na vere kei Emoni na tui; ka ra sa buli Josaia na luvena ko ira na lewe ni vanua me tui, me kenai sosomi.
Currently Selected:
2 VEIGAUNA 33: FOV
Highlight
Copy
Compare
Share
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
