2 VEIGAUNA 28
28
Sa tui Juta ko Easi, a sa levu na nonai valavala ca; a ra sa le vuqa ka gumatua ko ira na nona meca.
1Sa yabaki ruasagavulu ko Easi ni sa buli me tui, a sa lewa mai Jerusalemi ka yabaki tinikaono: ia sa sega ni caka dodonu e na mata i Jiova, me vakataki Tevita na tamana: 2ni sa muria ko koya na nodra i valavala na tui Isireli, ka cakava na matakau e vakawaicalataki kivei ira na Peali. 3Sa vakama talega na ka boi vinaka e na buca ni luve i Inomi, ka vakamai ira na luvena e na bukawaqa, me vaka na nodra i valavala velavela na veimatanitu tani, o ira ka vakaseva ko Jiova e matadra na Isireli. 4Sa vakacaboi soro talega, ka vakama na ka boi vinaka, e na veitikina cecere, kei na veiulu-ni-vanua, kei na ruku ni kau bulabula kecega.
5E na vuku ni ka oqo, sa soli koya yani ko Jiova ki na ligana na tui Siria; a ra sa mokuti koya, ka vakabobulataki ira na lewe vuqa, ka kauti ira ki Tamasiko. Ka sa soli talega ko koya ki na ligana na tui Isireli, o koya sa vakamatei koya, kei ira vata kaya na lewe vuqa sara. 6A sa vakamatea e Juta ko Peka na luve i Rimalaia e le tinikarua na oba e na dua na siga, era sa tamata qaqa kecega; ka ni ra a biuti Jiova na Kalou ni nodra qase. 7O Sikiri talega, a tamata qaqa mai Ifireimi, sa vakamatei Meesea na luvena na tui, kei Asirikame na turaga ni vale, kei Elikana, o koya sa tarava na tui. 8A sa vakabobulataka maivei ira na wekadra ko ira na Isireli, e le ruasagavulu na oba, na yalewa, na gonetagane, kei na gone yalewa, ka levu talega nai yau era sa tokitaka maivei ira, ka kauta nai toki ki Samaria.
9A sa tiko maikea e dua na parofita i Jiova, na yacana ko Oteti: a sa curu yani ko koya ka la'ki tavaki ira na mataivalu ka la'ki Samaria, ka kaya vei ira, Raica, ni sa cudru ko Jiova na Kalou ni nomuni qase vei ira na Juta, sa soli ira kina ki na ligamuni, ia ko ni sa mokuti ira e na cudru sa yala ki lomalagi. 10Ia oqo, kemuni sa nakita me vakamalumalumutaki ira na Juta kei ira mai Jerusalemi, me ra nomuni tagane bobula, kei na nomuni yalewa bobula: ia sa sega li vei kemuni, io vei kemuni, nai valavala ca vei Jiova na nomuni Kalou? 11Ia oqo, mo ni rogoci au, ka sereki ira tale na bobula, kemuni a vakabobulataka maivei ira na wekamuni: ni sa yaco vei kemuni na cudru waqawaqa i Jiova. 12Sa qai tu cake eso vei ira sa liu vei ira na Ifireimi, ko Asaraia na luve i Joenani, ko Perekaia na luve i Meselemoce, kei Jesikaia na luve i Salumi, kei Amasa na luve i Atilai, era tu cake vei ira ka lako tale mai nai valu, 13ka kaya vei ira, Dou na sega ni kauti ira mai ki ke na bobula: ni da sa cala vei Jiova, ia dou sa nakita me vakaikuritaka na nodai valavala ca kei na noda caka cala: ni sa ka levu na noda caka cala, ka sa waqawaqa na cudru vei ira na Isireli. 14A ra sa sereki ira na bobula ka laiva nai toki ni valu ko ira na tamata i valu e matadra na turaga kei nai soqosoqo taucoko. 15A sa tu cake ko ira na tamata sa cavuti oti na yacadra yadua, ka kauti ira na bobula, ka vakasulumi ira kecega era sa luvawale tu e nai toki, ka vakaisulutaki ira, ka vakaivavataki ira, ka vakani ira, ka vagunuvi ira, ka lumuti ira, ka vakavodoki ira na malumalumu e na asa, ka kauti ira ki Jeriko, na koro ni veiviu, kivei ira na wekadra: era sa qai lesu ki Samaria.
16E na gauna ko ya sa talaki ko Easi na tui kivei iratou na tui Asiria, me ratou mai vukei koya. 17Ni ra a lako tale mai ko ira na kai Itomi ka mokuti ira na Juta, ka vakabobulataki ira eso. 18O ira talega na kai Filisitia, era sa lako vakaivalu ki na veikoro e na vanua bucabuca, kei na yasana vaka ki na ceva mai Juta, a ra sa rawai Peci-semesi, kei Eijaloni, kei Kiteroci, kei Soko kei na kena veikoro lalai, kei Timina kei na kena veikoro lalai, kei Kimiso kei na kena veikoro lalai: a ra sa tikotiko ga maikea. 19Ni sa vakamalumalumutaki ira na Juta ko Jiova, ena vuku i Easi na tui Isireli; ni sa vakaluvawaletaki ira na Juta ko koya, ka caka cala vakalevu vei Jiova. 20A sa lako mai vei koya ko Tikilaci-pilineseri na tui Asiria, ka vakararawataki koya, ka sega ni vakaukauwataki koya. 21Ni sa kauta ko Easi na ka eso mai na vale i Jiova, kei na vale ni tui, maivei ira talega na turaga, ka solia vei tui Asiria: ia sa sega ni vukei koya.
22Ia e na gauna ni nona rarawa, sa caka cala vakalevu cake vei Jiova: io, ko Easi na tui oqo. 23Ni sa vakacaboi soro vei ira na kalou ni Tamasiko, o ira ka yaviti koya: ka sa kaya ko koya, Ni ra sa vukei ira na tui Siria, ko ira na nodra kalou, au na soro kina vei ira, me ra vukei au mai. Ia era sa vu ni nona rusa, kei na nodra rusa talega na Isireli kecega. 24A sa kumuna vata ko Easi na bilo ni vale ni Kalou, ka sa taya vakamatailalai na bilo ni vale ni Kalou, ka sa sogota na katuba ni vale i Jiova, ka cakava na nonai cabocabo-ni-soro e na tutuna kecega e Jerusalemi. 25Ia e na veikoro yadua e Juta sa cakava na veitikina cecere, me vakama kina na ka boi vinaka kivei ira na kalou tani, ka sa vakacudrui Jiova na Kalou ni nona qase.
26Ia na kena vo ni nona cakacaka, kei na nonai valavala kecega, a kenai vakatekivu, kei na kenai otioti, raica, sa volai e na kedrai vola na tui Juta kei Isireli. 27A sa moce vata kei ira na nona qase ko Easi, ka sa bulu e na koro, io e Jerusalemi: a ra sa sega ni kauti koya ki na nodra i bulubulu na tui Isireli: ka sa lewa ko Esekaia na luvena, me kenai sosomi.
Currently Selected:
2 VEIGAUNA 28: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
