2 VEIGAUNA 26
26
Sa tui Juta ko Usaia, a sa vukei koya ko Jiova, 1-15. Sa sega ni dokai ira na bete ko Usaia, a sa tauvi vukavuka ko koya, 16-23.
1A ra sa kauti Usaia ko ira kecega na Juta, ni sa tinikaono na nona yabaki, a ra sa buli koya me tui, mei sosomi kei Amasaia na tamana. 2Sa tarai Eloci ko koya, ka vakasuka tale me nodra na Juta, sa qai moce vata na tui kei ira na nona qase.
3Sa tinikaono na yabaki i Usaia ni sa buli me tui, ka sa lewa tiko mai Jerusalemi ka yabaki limasagavulu ka rua. A yaca i tinana talega ko Jikolaia mai Jerusalemi. 4A sa caka dodonu ko koya e na mata i Jiova, me vaka na ka kecega ka kitaka ko Amasaia na tamana; 5ka sa qarava na Kalou e na gauna i Sakaraia, o koya sa vuku e na raivotu ni Kalou: ka ni sa qaravi Jiova tiko ko koya, sa vukei koya na Kalou me tamata yaco.
6A sa lako yani ko koya ka vala kei ira na kai Filisitia, ka sa basuraka sobu na bai mai Kaca, kei na bai mai Japine, kei na bai mai Asitoti, ka sa tara na koro eso e na vanua mai Asitoti, kei na kedra maliwa na kai Filisitia. 7A sa vukei koya na Kalou ni sa vala kei ira na kai Filisitia, kei ira na kai Arepea era tiko mai Kuri-peali, kei ira na luve i Maoni. 8A sa solia ko ira na Amoni na veika-ni-loloma vei Usaia, ka sa kuruvaki na yacana ka yaco ki nai curucuru kei Ijipita: ni sa tubu cake tiko vakalevu sara.
9Sa tara talega ko Usaia na vale ni valu cecere e na matamata-ni-koro e tutuna, kei na matamata-ni-koro ni buca, mai nai lesu talega, ka sa vakaukauwataka. 10Sa tara talega eso na vale ni valu cecere e na veikau, ka sa levu nai kelikeli wai sa kelia, ni sa ka levu na nona pulumokau; e na vanua bucabuca, kei na vanua cecelevu: ka so talega na nona tamata dauteitei, kei nai vakatau ni veivaini e na veiulu-ni-vanua, mai Kameli talega: ni sa dauvinakata na caka were ko koya.
11Sa dua talega na mataivalu i Usaia era daulako vakamataivalu lalai ki nai valu, me vaka na nodra i wiliwili sa volai e na liga i Jieli na vunivola, kei Meesea, o koya sa lewa, a sa nodra turaga ko Enanaia, maivei ira na nona turaga ni valu na tui. 12A kedrai wiliwili kecega na tamata qaqa era sa liu vei ira na nodra qase, sa le rua na udolu ka ono na drau. 13A ra sa lewa e dua nai valu, sa le tolusagavulu na oba ka vitu na udolu ka lima na drau, era dauvala vagumatua, me vukea na tui me vala kei ira na meca. 14A sa vakarautaka ko Usaia nai sasabai me rauti ira kecega nai valu, kei na moto, kei nai sala-ni-valu, kei nai sulu ni seredra, kei na dakai dina, kei nai rabo ni vatu. 15Ka sa cakava mai Jerusalemi na ka vakamatai, era sa vakavuna na tamata vuku, me tiko e dela ni vale ni valu cecere, kei na dela ni bai kaukauwa, me vanataki kina na gasau kei na vatu lelevu. A sa kuruvaki vakayawa na yacana: ni sa vukei vakalevu sara ko koya, ka sa kaukauwa kina.
16Ia ni sa kaukauwa mai, sa yalolevu mai me ca kina: ni sa talaidredre vei Jiova na nona Kalou, ka curu ki loma ni vale ni soro i Jiova me vakama na ka boi vinaka e dela ni cabocabo ni ka boi vinaka. 17A sa muri koya yani ki loma ko Asaraia na bete, ka lako vata kaya e le walusagavulu na bete i Jiova, era tamata qaqa: 18ka ra sa vorati Usaia na tui, ka kaya vua, Sa sega ni nomuni tavi, i Usaia, mo ni vakama na ka boi vinaka kivei Jiova, sa nodratou i tavi ga na bete na luve i Eroni, o iratou sa lumuti me ra vakama na ka boi vinaka; mo ni lako tani mai na vale ni soro; ni kemuni sa vakacalaka; ia ena sega ni dokai kemuni kina ko Jiova na Kalou.
19Sa qai cudru mai ko Usaia; ka sa taura tu e na ligana e dua na bilo me vakama kina na ka boi vinaka; ia ni sa cudru tiko vei ira na bete, sa tubura na yadrena na vukavuka e na matadra na bete, e na vale i Jiova, ka voleka ki nai cabocabo ni ka boi vinaka. 20A sa vakaraici koya ko Asaraia na bete levu, kei ira kecega na bete, ka raica, sa vukavuka na yadrena, a ra sa biligi koya tani ki tautuba; ka, vakariri talega ko koya me lako ki tautuba, ni sa yaviti koya ko Jiova. 21A sa vukavuka ko Usaia na tui ka yacova na siga sa mate kina, ka sa tiko e na dua na vale vakataki koya ga, ni sa vukavuka; ni sa tabu me curu ki na vale i Jiova; a sa lewa na vale ni tui ko Jocame na luvena, ka lewai ira na lewe ni vanua.
22Ia na kena vo ni cakacaka i Usaia, a kenai vakatekivu, kei na kenai otioti, sa vola ko Aisea na parofita, na luve i Emosi. 23A sa moce vata kei ira na nona qase ko Usaia, a sa bulu vata kei ira na nona qase e na vanua ni nodra i bulubulu na tui; ni ra sa kaya, Sa vukavuka ko koya: ka sa lewa ko Jocame na luvena, me kenai sosomi.
Currently Selected:
2 VEIGAUNA 26: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
