2 VEIGAUNA 20
20
Sa masu ka lolo ko Jiosafati kei ira na Juta; sa qai vakamatei ko ira na nodra meca, 1-26. Sa qai tiko vakacegu mai Jerusalemi ko Jiosafati; ia sa cala ni sa veitokani kei Easaia, 27-37.
1Sa oti oqo, era sa lako mai ko ira na luve i Moapi, kei ira na luve i Amoni, ka so tani vei ira na Amoni, me ra veivala kei Jiosafati. 2Sa qai lako mai eso ka ra tukuna vei Jiosafati, ka kaya, Sa lako vakaivalu mai vei kemuni e lewe vuqa sara, mai na tai kadua ni wasawasa, mai Siria, ka raica, era tiko mai Esesoni-tamari, (oqori ko Eni-keti). 3A sa rere ko Jiosafati, ka uqeti koya me vakasaqarai Jiova; ka kacivaka na lolo e na veiyasana kecega vaka-Juta. 4A ra sa soqoni vata ko ira na Juta, me ra kerea na veivuke mai vei Jiova: ia era sa lako mai na veikoro i Juta me ra vakasaqarai Jiova.
5A sa tu ko Jiosafati e na kedra maliwa na nodra i soqosoqo na kai Juta kei Jerusalemi, e na vale i Jiova, e na mata ni rara vou, 6a sa kaya, Kemuni Jiova na nodra Kalou na neimami qase, ko ni sa sega li ni Kalou mai lomalagi? ko ni sa sega li ni lewa na veimatanitu kecega ni veivanua? sa sega beka e ligamuni na kaukauwa kei na qaqa, ka sega kina e dua me vorati kemuni rawa? 7O ni sa sega li ni neimami Kalou, o koya ka vakaseva tani e na matadra na nomuni tamata, na Isireli, na lewe ni vanua oqo, ka solia ki na kawa i Eparaama na nomuni tokani me tawa mudu? 8A ra sa tiko kina, ka tara kina na vale tabu me nomuni, e na vuku ni yacamuni, ni ra kaya, 9Kevaka sa yaco vei keimami e dua na ca, nai seleiwau, na veicudruvi, se na mate levu, se na dausiga, ia kevaka keimami na tu e na mata ni vale oqo, e matamuni talega, (ni sa tiko na yacamuni e na vale oqo,) ka tagi vei kemuni e na neimami rarawa, o ni na qai rogoca ka veivuke. 10Ia oqo, ni raica, ko ira na luve i Amoni kei Moapi kei na ulu-ni-vanua ko Sia, ko ira ko ni sega ni laivi ira na Isireli me vala kei ira, ni ra sa lako cake mai na vanua ko Ijipita, a ra a gole tani ga mai vei ira, ka sega ni vakacacani ira; 11raica, era sa sauma vei keimami, ni ra lako mai me biuti keimami tani mai na nomuni votavota, ko ni sa solia me keimami taukena. 12Kemuni na neimami Kalou, o na sega li ni lewai ira? ni sa sega vei keimami na kaukauwa me keimami veivala rawa kei ira na lewe vuqa oqo sa lako mai me vala kei keimami; ia keimami sa sega ni kila na ka me keimami kitaka: ia sa rai vei kemuni na mata i keimami.
13A sa tu e na mata i Jiova ko ira kecega na Juta, kei ira vata na nodra lalai, na watidra, kei na luvedra.
14Sa qai curu mai na Yalo i Jiova vei Jeesieli na luve i Sakaraia, na luve i Pinaia, na luve i Jieli, na luve i Matanaia, e dua vei ira na Livai vei ira na luve i Esafa, ni sa tu e na kedra maliwa nai soqosoqo; 15a sa kaya ko koya, Ni rogoca, koi kemuni kecega na Juta, kei kemuni na kai Jerusalemi, kei kemuni Jiosafati na tui, Sa vosa vakaoqo vei kemuni ko Jiova, Ni kakua ni rere se taqaya e na vukudra na lewe vuqa oqo; ni sa sega ni nomuni nai valu, sa nona ga na Kalou. 16Ni lako sobu e na mataka me vala kei ira: raica, era sa lako cake mai e nai cabecabe ki Sisi; ia kemuni na kunei ira e na boto ni buca, e donuya na veikau ni Jirueli. 17Ni kua ni vala oqo: dou tuva, dou tu, ka raica na nona vakabulai kemuni ko Jiova, koi kemuni na Juta kei ira na Jerusalemi: ni kakua ni rere, se taqaya; lako yani me veivala kei ira e na mataka: ia ena nomuni to ko Jiova. 18A sa vakacuva na uluna ko Jiosafati ka vakatoboicu; a sa cuva sobu ko ira kecega na Juta kei ira na kai Jerusalemi e na mata i Jiova, a ra sa lotu kivei Jiova. 19A ra sa tu cake ko ira na Livai, eso maivei ira na luve i Koaca, ka maivei ira na luve i Kora, me ra vakavinavinaka kivei Jiova na nodra Kalou na Isireli e na domo levu sara.
20A ra sa sou e na mataka, ka lako yani ki na veikau mai Tikoa: ia ni ra sa lako yani, sa tu ko Jiosafati, ka kaya, Ni rogoci au, koi kemuni na Juta kei kemuni na kai Jerusalemi, Ni vakabauti Jiova na nomuni Kalou, kemuni na vakataudeitaki kina; vakadinati ira na nona parofita, kemuni na cakacaka yaco kina. 21Ia ni sa bose oti ko koya kei ira na tamata, sa lesia eso me sere vei Jiova, ka me ra vakavinavinaka e nai ukuuku ni yalosavasava, ni ra sa lako yani e na matadra nai valu, ka me ra kaya, Vakavinavinaka vei Jiova; ni sa sega ni mudu na nona loloma.
22Ia ni ra sa qai lagata na sere kei na vakavinavinaka, sa lesia ko Jiova na bikalawa me yaviti ira na luve i Amoni, kei ira na Moapi, kei na ulu-ni-vanua ko Sia, era sa lako mai me veivala kei ira na Juta; a ra sa moku. 23Ni ra sa tu cake ko ira na luve i Amoni kei ira na Moapi me mokuti ira na kai ulu-ni-vanua ko Sia, me vakamatea ka vakarusa sara: ia ni ra sa vakaoti ira na kai ulu-ni-vanua ko Sia, era sa veivuke kecega me ia na veivakamatei vakataki ira.
24Ia ni sa yaco ko ira na Juta ki na vale ni vakatawa e na veikau, era rai vaka kivei ira na lewe vuqa, ka raica, era sa yago mate ga, sa bale ki na soso, ka sega ni dro bula e dua. 25Ia ni sa lako mai ko Jiosafati kei ira na nona tamata me kauta tani vei ira nai toki ni valu, era sa kunea nai yau e dua na ka levu e na yago ni mate, kei na veivatu talei o koya era sa luvata me nodra, a ra sa sega kina ni kauta tani rawa: a ra sa bogi tolu ni ra sa kumuna vata tiko nai toki ni valu, e na vuku ni kena levu.
26Ia e na kenai kava ni siga, era sa soqoni vata e na buca ko Piraka: a ra sa vakarokoroko maikeri vei Jiova: a sa vakatokai kina na yaca ni yasana ko ya, Na buca ko Piraka [Na vakarokoroko], ka yacova na siga edaidai.
27Era sa qai lesu na tamata kecega ni Juta kei Jerusalemi, ka sa liutaki ira ko Jiosafati, me lako tale ki Jerusalemi e na marau; ni sa vakamarautaki ira ko Jiova e na vukudra na nodra meca. 28A ra sa lako ki Jerusalemi ki na vale i Jiova, ka ra sa taura lako na soliteri, kei na api, kei na davui. 29A ra sa rere vakalevu sara vua na Kalou ko ira kecega na veimatanitu e na veivanua, ni ra sa rogoca sa dauveivala ko Jiova kei ira na nodra meca na Isireli. 30A sa sautu na matanitu i Jiosafati: ni sa vakasaututaki koya na nona Kalou e na veiyasana.
31A sa lewa ko Jiosafati vei ira na Juta: sa tolusagavulu ka lima na nona yabaki ni sa tekivu me lewa ko koya, a sa lewa tiko mai Jerusalemi ka yabaki ruasagavulu ka lima. Ia na yaca i tinana ko Asupa na luve i Sili. 32A sa muria ko koya nai valavala i Esa na tamana, ka sega ni lako tani maikina, sa kitaka ga na ka e dodonu e na mata i Jiova. 33Ia sa sega ni kau tani na veitikina cecere: ka ni ra sa sega ni vagolea na lomadra ko ira na tamata vua na Kalou ni nodra qase. 34Ia na kena vo ni cakacaka i Jiosafati, a kenai vakatekivu, kei na kenai otioti, raica, sa volai e nai vola i Jeu na luve i Anani, ko koya sa cavuti e na kedrai vola na tui Isireli.
35Ia emuri sa mai veitokani ko Jiosafati na tui Juta kei Easaia na tui Isireli, ko koya sa ia nai valavala ca: 36a sa veitokani kaya me ta waqa me lako ki Tasisi: ia erau sa taya na waqa mai Esi-oni-keperi, 37Sa qai parofisaitaki Jiosafati ko Eliesa na luve i Totava mai Maresa, a sa kaya, Ni ko sa la'ki veitokani kei Easaia, sa vorolaka na nomu cakacaka ko Jiova. A sa vorolaki na veiwaqa ka sa sega kina ni lako rawa ki Tasisi.
Currently Selected:
2 VEIGAUNA 20: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
