1 KORINICA 1
1
Sa vakatekivuna na nonai vola ko Paula e na vosa ni loloma kei na vakavinavinaka, 19; a sa vunauci ira ni ra sa dauveileti, a sa vakavulici ira me ra veilomani, 1016; me ra kakua ni dokai ira walega na tamata, ka me ra vakavinavinaka ga vua na Kalou, 1731.
1Koi au ko Paula, sa kacivi mei apositolo i Jisu Karisito, e na lewa ni Kalou, kei Sosiceni na wekaqu, 2vei ira nai soqosoqo lewe ni lotu ni Kalou era sa tiko mai Korinica, vei ira sa tu vata kei Karisito Jisu ka sa vakasavasavataki, era sa kacivi me ra yalosavasava, kei ira kecega e na veiyasana kecega era sa masuta na yaca i Jisu Karisito na noda Turaga, io, na noda kei na nodra talega: 3Me yaco vei kemudou na loloma, kei na vakacegu, mai vua na Kalou ko Tamada, kei na Turaga ko Jisu Karisito.
4Au sa vakavinavinaka e na veisiga vua na noqu Kalou e na vukumudou, e na vuku ni loloma ni Kalou sa soli vei kemudou e na vuku i Karisito Jisu; 5ni dou sa vakavutuniyautaki e na ka kecega e na vukuna, e na vosa kecega kei na vuku kecega; 6me vaka ni sa vakadinadinataki vei kemudou nai tukutuku kei Karisito: 7ka dou sa sega kina ni uasivi sobu e na dua nai solisoli vakayalo: ni dou sa waraka na kena vakarairaitaki ni noda Turaga ko Jisu Karisito: 8o koya ena vakataudeitaki kemudou me yaco na kenai vakataotioti, mo dou tawa cala e na siga ni noda Turaga ko Jisu Karisito. 9Sa dina na Kalou, o koya sa kacivi kemudou mo dou nonai tokani ni Luvena ko Jisu Karisito na noda Turaga.
10IA kau sa vakamasuti kemudou, na veiwekani, e na yaca ni noda Turaga ko Jisu Karisito, mo dou tauvata kecega e na vosa, ia me kakua vei kemudou na veisei; mo dou veivinakati sara ni dou sa lomavata ka lewa vata. 11Ni sa tukuni kemudou mai vei au, kemudou na veiwekani, ko ira na lewe ni vale i Kiloi, ni dou sa dauveileti vakai kemudou. 12Ia na ka oqo kau sa vosa kina, ni dou sa kaya yadua, Oi au sa nei Paula; ia, Oi au sa nei Apolosa, ia, Oi au sa nei Kifa; ia, Oi au sa nei Karisito. 13Sa tawase beka na Karisito? sa vakoti beka ki na kauveilatai e na vukumudou ko Paula? se dou sa papitaisotaki beka e na yaca i Paula? 14Au sa vakavinavinaka vua na Kalou niu sa sega ni papitaisotaka e dua vei kemudou, oi rau ga ko Kirisipo kei Keio; 15de kaya e dua ni dou sa papitaisotaki e na yacaqu. 16Au sa papitaisotaki ira talega na lewe ni vale i Sitifana: ia kau sa sega ni nanuma ni kau sa papitaisotaka e dua tani tale.
17Ni sa sega ni talai au na Karisito meu veipapitaisotaki, meu vunautaka ga nai tukutuku-vinaka: ia ka sega ga e na vosa sa vuku, de vakatawayagataki kina na kauveilatai i Karisito. 18Ni sa ka lialia vei ira sa rusa na kena vunautaki na kauveilatai, ia sa kena kaukauwa ga ni Kalou vei keda sa vakabulai. 19Ni sa volai, Au na vakarusa na nodra vuku era sa dauvuku, Ka vakatawayagataka na nodra yalomatua era sa dauyalomatua. 20Evei na vuku? evei na vunivola? evei na dauveileti ni vuravura oqo? sa sega beka ni vakalialiataka na vuku ni vuravura oqo na Kalou? 21Io, ni sa vuku tu na Kalou, a ra sa sega ni kila na Kalou na kai vuravura e na nodra vuku, sa qai vinakata na Kalou me vakabulai ira era sa vakabauta, e na vosa vakalialia. 22Ni ra sa taroga nai vakatakilakila ko ira na Jiu, a ra sa vakasaqara na vuku ko ira na kai Kirisi: 23ia keitou sa vunautaki Karisito ni sa lauvako ki na kauveilatai, a ka era sa tarabe kina ko ira na Jiu ka sa ka lialia vei ira na kai Kirisi: 24ia vei ira ga era sa kacivi, se ra Jiu se ra kai Kirisi, na Karisito na kaukauwa ni Kalou, kei na vuku ni Kalou. 25Ni sa ka vuku na sesewa ni Kalou ka sa uasivi vei ira na tamata; a sa kaukauwa na malumalumu ni Kalou me uasivi vei ira na tamata.
26Ni dou sa raica, na veiwekani, na kenai valavala ni nomudou kacivi, ni sa sega ni lewe vuqa era sa vuku vakayago, sa sega ni lewe vuqa era sa kaukauwa, sa sega ni lewe vuqa era sa turaga me sa kacivi: 27ia sa digitaka na Kalou na veika vakalialia e vuravura, me vakamaduataki ira na vuku; ia na veika sa malumalumu e vuravura sa digitaka na Kalou me vakamaduataka na veika sa kaukauwa; 28kei na veika vakaisi e vuravura, kei na veika e beci, sa digitaka na Kalou, kei na veika sa sega walega, me vakarusa na veika sa tu dei; 29me kakua kina na tamata me dokai koya e mata ni Kalou. 30Ia maivei koya ga dou sa tu vata kina kei Karisito Jisu, o koya sa cakava na Kalou me vu ni vuku vei keda, ka vu ni vakadonui, ka vu ni vakasavasavataki, ka vu ni bula; 31me yaco kina na ka sa volai, O koya sa vosa doudou, me vosa doudou e na vuku ni Turaga.
Currently Selected:
1 KORINICA 1: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific