1 KORINICA 2
2
Sa tukuna ni sa sega ni vunau ko koya e na vuku vakavuravura, 15; a sa vuku ga na nona vunau ni sa vukei koya na Yalo Tabu, 613; a sa sega kina ni kila na kenai balebale ko koya sa sega ni yalovou, 1416.
1Ia koi au, niu sa lako yani vei kemudou, na veiwekani, au sa sega ni lako e na vosa vinaka se na vuku, niu sa vunautaka vei kemudou na vosa sa tukuni kina na Kalou. 2Ni sa dei na yaloqu meu kakua ni kila e na kemudou maliwa e dua na ka tani, ko Jisu Karisito duaduaga, kei na nona lauvako ki na kauveilatai. 3Ia kau a tiko vata kei kemudou e na malumalumu, kei na rere, kei na sautaninini levu. 4Ia na noqu vosa, niu sa vunau, sa sega ni ia e na vosa vakaveitemaki ni vuku vakatamata, sa ia ga e na kena vakadinadinataki ni Yalo Tabu, kei na kaukauwa-mana: 5me kakua kina ni tu na nomudou vakabauta e na nodra vuku na tamata, e na kaukauwa ga ni Kalou.
6Ia keitou sa tukuna na vuku e na kedra maliwa era sa yalomatua sara: a sa sega ga na vuku ni vuravura oqo, se na nodra vuku na turaga ni vuravura oqo, o koya sa yaco me ka wale: 7ia na vuku ga ni Kalou keitou sa tukuna e na ka vuni, io, oqori ka vunitaki eliu, ka lesia na Kalou ni sa bera ni caka ko vuravura me da vakalougatataki kina; 8ia ka sa sega e dua na turaga ni vuravura oqo sa kila: ia kevaka era sa kila, era sa sega ni vakota ki na kauveilatai na Turaga vakaiukuuku. 9Ia sa vaka nai vola, Sa sega na mata sa kunea, se na daliga sa rogoca, Ka sa sega ni curu ki na loma ni tamata, Na veika sa vakarautaka na Kalou me nodra era sa lomani koya. 10Ia vei keda ga sa vakatakila mai na Kalou e na Yalo Tabu; ni sa dikeva na ka kecega na Yalo Tabu, io, na veika titobu ni Kalou. 11Io, ko cei na tamata sa kila na ka ni tamata, a yalo ni tamata ga sa tiko e lomana? sa vaka talega kina na veika ni Kalou sa sega e dua sa kila, sa kila ga na Yalo ni Kalou. 12Ia eda sa sega ni rawata na yalo ni vuravura, na Yalo ga sa mai vua na Kalou; me da kila kina na veika sa solia walega mai vei keda na Kalou. 13A veika oqori keitou sa tukuna talega, ia ka sa sega ga e na vosa sa vakatavulica na vuku ni tamata, o koya ga sa vakatavulica na Yalo Tabu; ni keitou sa vakatautauvatataka na veika vakayalo kei na veika vakayalo.
14Ia na tamata sa vakayago sa sega ni vakabauta na veika ni Yalo ni Kalou: ni sa ka lialia vua, a sa sega ni kila rawa ko koya, ni ra sa kilai vakayalo ga. 15Ia ko koya sa vakayalo sa kila na ka kecega, a sa sega e dua sa kilai koya. 16Io, ko cei sa kila na loma ni Turaga, me vakatavulici koya kina? Ia sa tu vei keda na lomai Karisito.
Currently Selected:
1 KORINICA 2: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific