1 CESALONAIKA 1
1
Sa tukuna vei ira ko Paula ni sa daunanumi ira tiko, ka masulaki ira, ni sa kila era sa lotu dina sara, 110.
1Koi keitou ko Paula, kei Silivenuse, kei Timoci, ki na nodra i soqosoqo lewe ni lotu na kai Cesalonaika, o ira sa tu vua na Kalou ko Tamada kei na Turaga ko Jisu Karisito: Me nomudou na loloma, kei na vakacegu, mai vua na Kalou ko Tamada, kei na Turaga ko Jisu Karisito.
2Keitou sa vakavinavinaka tikoga vua na Kalou e na vukumudou kecega ni keitou sa cavuti kemudou e na neitou masu; 3keitou sa sega ni mudu ni nanuma na nomudou daucakacaka e na vakabauta, kei na nomudou oca e na loloma, kei na nomudou vosota e nai nuinui vua na noda Turaga ko Jisu Karisito, e na mata ni Kalou ko Tamada; 4ni keitou sa kila na nomudou digitaki, oi kemudou na veiwekani ka daulomani kemudou na Kalou; 5ni sa sega ni yaco vei kemudou na neitou i tukutuku-vinaka e na vosa walega, e na kaukauwa talega, kei na Yalo Tabu, ka ni sa vakadinadinataki vakalevu; ni dou sa kila na neitou i valavala e na vukumudou ni keitou a tiko vata kei kemudou. 6Ia dou a dauvakadamurimuri keitou, kei na Turaga, ni dou a vakabauta na vosa e na veivakararawataki levu, kei na reki e na Yalo Tabu; 7dou a yaco kina mo dou nodra i vakarau kecega era sa vakabauta mai Masitonia kei Akaia. 8Ni sa rogovaki yani maivei kemudou na vosa ni Turaga ki Masitonia kei Akaia, a sa sega ni koya walega, sa yaco yani talega nai rogorogo ni nomudou vakabauta na Kalou ki na veiyasana kecega, a sa sega kina ni yaga me keitou kaya e dua na ka. 9Ni ra sa tukuna ga ko ira e na vuku i keitou nai valavala ni neitou laki tiko vei kemudou, ni dou sa saumaki mai na veimatakau vua na Kalou, mo dou qarava na Kalou bula ka dina; 10mo dou waraka talega na Luvena mai lomalagi, sa vakatura cake tale ko koya mai na mate, ko Jisu, o koya sa vakabulai keda mai na cudru sa bera mai.
Currently Selected:
1 CESALONAIKA 1: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
