1 SAMUELA 8
8
Erau sa tamata ca na luve i Samuela, a sa kerea kina ko ira na Isireli me dua na nodra tui, 1-5. Sa masu vua na Kalou ko Samuela, a sa kaya na Kalou me rogoci ira na tamata e na ka ko ya, 6-9. Sa tukuna ko Samuela vei ira na tamata nai valavala ni tui, 10-18. A ra sa guta ga na tui ko ira na tamata, 19-22.
1Ia ni sa qase ko Samuela, sa lesi rau na luvena me rau turaga-ni-lewa vei ira na Isireli. 2Ia na yaca ni nona ulumatua ko Joeli; kei na yacana na kenai karua ko Epaia: erau sa turaga-ni-lewa koi rau mai Pieri-sepa. 3A rau sa sega ni muria na nonai valavala koi rau na luvena, a rau sa vuki me guta nai yau, ka taura nai solisoli me rau lewa vakatani, a rau sa vakatanitaka kina na lewa.
4A ra sa soqoni vata ko ira kecega na qase ni Isireli, ka lako vei Samuela ki Rama, 5a ra sa kaya vua, Raica, ko sa qase mai, ia na luvemu, erau sa sega ni muria na nomu i valavala: mo lesia mada vei keda e dua na tui me lewai keda me vakataki ira na veimatanitu kecega.
6Ia sa ca vei Samuela na ka oqo, ni ra sa kaya, Solia vei keda e dua na tui me lewai keda. A sa masu vei Jiova ko Samuela. 7A sa kaya vei Samuela ko Jiova, Mo vakarorogo vei ira na tamata e na ka kecega era sa kaya vei iko: ni ra sa sega ga ni beci iko, sai au ga era sa beca, me'u kakua ni nodra tui koi au. 8Me vaka na ka kecega era sa cakava mai na siga ka'u a kauti ira cake mai kina mai Ijipita ka yacova na siga oqo, ni ra sa biuti au ka qarava na veikalou tani, era sa kitaka vaka talega kina vei iko. 9Ia oqo, mo vakarorogo ki na nodra vosa; ia mo tukuna vakabibi sara vei ira, ka vakatakila vei ira na nonai valavala na tui sa na lewai ira.
10A sa tukuna kecega na vosa i Jiova ko Samuela vei ira na tamata era masuta vua me dua na nodra tui. 11A sa kaya ko koya, Oqo na nonai valavala na tui sa na lewai kemuni: Ena kauti ira na luvemuni ko koya, ka lesia me yaga vua, ki na nona qiqi-ni-turaga, ka me ra nona tamata dauvodo ose: ka so me ra cici ka liutaka na nona qiqi-ni-turaga. 12Ia ena lesia eso me ra turaga ni yayaudolu, ka turaga ni yayalimasagavulu; ka so me cukita na nona veiwere e nai siviyara me tamusuka talega na nona sila, ka mataitaka na nonai yaya ni valu, kei nai yaya ni nona qiqi-ni-valu. 13Ia ena kauti ira ko koya na nomuni goneyalewa me ra caka kakana kamikamica, me ra dauvakasasaqa talega, ka dauvavavi. 14Ia ena kauta talega ko koya na nomuni veiwere, kei na nomuni veiwere-ni-vaini, kei na nomuni veiolive, io na kena ka vinaka, ka na solia vei ira na nona tamata. 15Ia ena kauta na kenai katini ni nomuni sore ni kau, kei na nomuni veiwere-ni-vaini, ka solia vei ira na nona matanivanua, kei ira na nona tamata. 16Ia ena kauti ira talega na nomuni tamata, kei ira na nomuni vada, kei ira na nomuni cauravou vinaka, kei na nomuni asa, me ra yaga e na nona cakacaka. 17Ena kauta ko koya nai katini ni nomuni sipi, ia koi kemuni, ena nona tamata. 18Kemuni na qai tagi sara e na siga ko ya e na vuku ni nomuni tui kemuni sa digitaka me nomuni; ena qai sega ni rogoci kemuni ko Jiova e na siga ko ya.
19A ra sa bese ga na tamata ni vakarogoca na vosa i Samuela; a ra kaya, E segai; me dua na neimami tui; 20me keimami sa vakataki ira na veimatanitu kecega; me lewai keimami na neimami tui, ka liutaki keimami, ka la'ki ia na neimami valu. 21A sa rogoca kecega na nodra vosa na tamata ko Samuela, a sa la'ki tukuna e na daliga i Jiova. 22A sa kaya vei Samuela ko Jiova, Mo vakarorogo ki na nodra vosa, ka bulia vei ira e dua na tui. A sa kaya vei ira na Isireli ko Samuela, Ni lako na tamata yadua ki na nona koro.
Currently Selected:
1 SAMUELA 8: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
