1 SAMUELA 29
29
Sa nanuma ko tui Kaca me lako vata kaya ko Tevita e na nonai valu, a ra sa bese kina ko ira na turaga, a sa qai talai Tevita yani ko tui Kaca.
1A ra sa soqona vata na nodra mataivalu kecega ki Efeki ko ira na kai Filisitia: a ra sa la'ki tiko ko ira na Isireli mai na dua na mata-ni-wai mai Jesirieli. 2A ra sa lako yani vakayayadrau, ka vakayayaudolu, na nodra turaga na kai Filisitia; a sa muri lako ko Tevita kei ira na nona tamata kei Akisi. 3A ra sa taroga ko ira na turaga ni kai Filisitia, Sa vakaevei ko ira na Iperiu oqo? A sa kaya ko Akisi vei ira na turaga ni kai Filisitia, Ko Tevita oqo, se segai, na tamata i Saula na tui Isireli, o koya sa tiko vei au e na veisiga oqo, se na veiyabaki oqo, ia ka'u sa sega ni kunea vua e dua na ka ca mai na siga sa vuki kina, ka yacova na siga oqo? 4A ra sa cudru vua ko ira na turaga ni kai Filisitia; a ra sa kaya vua ko ira na turaga ni kai Filisitia, Mo vakalesuya na tamata, me la'ki lesu ki na nona tikina ko sa lesi koya kina, ia me kakua ni lako sobu kei keda ki nai valu, de sa vuki me noda meca ni sa ia tiko nai valu: ia ka cava ena vakayalovinakataka kina na nona turaga ko koya oqo? sa sega li e na uludra na tamata oqo? 5sa segai beka ko Tevita oqo, o koya era sa veisausau kina ni ra sa ia na meke, ka kaya, Sa mokuta na veiudolu ko Saula, Kei na veiudolu vakatini ko Tevita?
6Sa qai kacivi Tevita ko Akisi, ka kaya vua, Me vaka sa bula ko Jiova, sa dina ni ko sa yalododonu, a sa vinaka vei au na nomu veilakoyaki vata kei au e nai valu; ni'u sa sega ni kunea na ca vei iko mai na siga ko a lako mai kina vei au, ka yacova na siga oqo; ia era sa sega ni vinakati iko ko ira na turaga: 7Mo qai lesu kina ka lako e na vakacegu, mo kakua ni vakayalocataki ira na turaga ni kai Filisitia. 8A sa kaya vei Akisi ko Tevita, Ia ka cava ka'u sa cakava? ka cava ko sa kunea vei au na nomuni tamata mai na siga ka'u a mai tiko kina e matamuni, ka yacova na siga oqo, me'u kakua kina ni lako me'u vala kei ira na nona meca na noqu turaga na tui? 9A sa vosa ko Akisi, ka kaya vei Tevita, Au sa kila ni ko sa vinaka vei au, me vaka e dua na agilose ni Kalou: ia era sa kaya ko ira na turaga ni kai Filisitia, Ena sega ni lako cake kei keda ki nai valu ko koya. 10O koya mo qai sou e na mataka kei ira na nona tamata na nomu turaga era a lako vata mai kei iko; ia ni dou sa sou e na mataka, a sa rarama vei kemudou na vanua, dou qai lako yani.
11A sa sou e na mataka ko Tevita, ko koya kei ira na nona tamata, me lako yani e na mataka, me lesu ki na nodra vanua na kai Filisitia. A ra sa lako cake ki Jesirieli ko ira na kai Filisitia.
Currently Selected:
1 SAMUELA 29: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
