1 SAMUELA 19
19
Sa tukuna vei Tevita na vere i Saula ko Jonacani, 1-3. Sa masuti tamana ko Jonacani me bula ko Tevita, 4-7. Sa qara tale ko Saula me vakamatei Tevita, a sa vakabulai koya ko Maikali, 9-17. Sa dro kivei Samuela ko Tevita, a sa tala eso ko Saula me vakamatei koya, a sa yaco vei iratou na Yalo ni Kalou, a ratou sa parofisai, kei Saula talega, 18-24.
1A sa vosa vei Jonacani na luvena ko Saula, vei ira kece talega na nona tamata, me ra vakamatei Tevita. 2Ia sa vinakati Tevita vakalevu ko Jonacani, na luve i Saula: a sa tukuna vei Tevita ko Jonacani, ka vaka ne, Sa qara tiko ko Saula na tamaqu me vakamatei iko: ia mo qarauni iko mada e na mataka, ka tiko e na dua na tikina vuni, ka mo vunitaki iko: 3ia ka'u na lako yani me keirau tu vata kei tamaqu e na were ko sa tiko kina, ia ka'u na vosataki iko vei tamaqu; ia ka'u na raica se sa na vakaevei, ka tukuna vei iko.
4A sa vosataka na ka vinaka e na vuku i Tevita ko Jonacani kivei Saula na tamana, ka kaya vua, Me kakua ni kitaka na ka ca ko koya na tui, vei Tevita, na nona tamata; ni sa sega ni kitaka e dua na ka ca vei iko ko koya, ka ni sa vinaka sara na nonai valavala vei iko: 5ni sa bolea sara na mate ko koya ka sa la'ki vakamatei koya na kai Filisitia, a sa cakava ko Jiova na veivakabulai levu vei ira kecega na Isireli: ko a raica, ka marau kina: e na vuku ni cava ko sa via cakava na ka ca vua na tamata sa sega ni cala, ka mo vakamatei Tevita walega? 6A sa vakarorogo ko Saula ki na vosa i Jonacani: a sa bubului ko Saula, Me vaka sa bula ko Jiova, ena sega ni vakamatei ko koya. 7A sa kacivi Tevita ko Jonacani, ka tukuna vua ko Jonacani na ka kecega oqo. A sa kauti Tevita vei Saula ko Jonacani, a sa dautiko vata kaya ko koya, me vaka eliu.
8A sa ia tale nai valu: a sa lako yani ko Tevita, ka vala kei ira na kai Filisitia, ka mokuti ira e na veiraravui levu; a ra sa dro tani sara mai vua.
9A sa curumi Saula na yalo ca maivei Jiova, ni sa tiko e nona vale ko koya, a sa taura e ligana na nona moto; a sa qiriqiri tiko ko Tevita. 10A sa segata ko Saula me cokai Tevita me veituituitaki kei na lalaga e na moto; a sa lako lo yani ko koya mai vei Saula, a sa cokataka na moto ki na lalaga ko koya; a sa dro bula ko Tevita e na bogi ko ya. 11A sa tala yani ko Saula eso na tamata ki na vale i Tevita, me vakatawai koya, ka me ratou vakamatei koya e na mataka: ia sa tukuna vei Tevita ko Maikali na watina, ka kaya, Kevaka ko sa sega ni vakabulai iko e na bogi edaidai, ko na qai vakamatei e na mataka. 12A sa tukuci Tevita sobu ko Maikali mai na katuba lailai e cake: a sa lako yani ko koya, ka dro, ka sa bula 13A sa kauta ko Maikali e dua na matakau, ka vakotora e nai mocemoce, a sa kauta nai lokoloko vutika ni me me kenai lokoloko, ka tutuvitaka e na dua nai tutuvi. 14Ia ni sa tala ko Saula eso na tamata me kauti Tevita, sa kaya na yalewa, Sa tauvi mate ko koya. 15A sa talai iratou na tamata ko Saula me la'ki raici Tevita, ka kaya, Dou kauti koya cake mai vei au e nai mocemoce, me'u vakamatei koya. 16A ratou sa lako mai na tamata, ka raica, sa no e dua na matakau e nai mocemoce, a sa dua nai lokoloko vutika ni me sa nonai lokoloko. 17A sa kaya vei Maikali ko Saula, A cava ko sa vakaisini au kina vakaoqo, ka tala yani na noqu meca me bula ko koya? A sa kaya vei Saula ko Maikali, Sa kaya vei au ko koya, Mo laivi au mada me'u lako; me'u vakamatei iko mei cavai?
18A sa dro ko Tevita, ka bula, ka lako kivei Samuela ki Rama, ka tukuna vua na ka kecega ka cakava vua ko Saula. A rau sa lako kei Samuela me rau tiko mai Naioci. 19A sa tukuni vei Saula, ka vaka ne, Raica, sa tiko mai Naioci e Rama ko Tevita. 20A sa tala ko Saula eso na tamata me tauri Tevita: ia ni ratou sa raica nai vavakoso parofita ni sa parofisai tiko, a sa tu ko Samuela ni sa lesi me liutaki ira, sa curumi iratou na tamata i Saula na Yalo ni Kalou, a ratou sa parofisai talega ko iratou. 21A sa tukuni vei Saula, a sa tala eso na tamata tani, a ratou sa parofisai talega ko iratou. A sa tala vakatolu eso na tamata ko Saula, a ratou sa parofisai talega ko iratou. 22A sa lako talega ki Rama ko koya, ka yaco ki nai keli wai levu mai Seku: a sa taro ko koya, ka vaka ne, Sa vakaevei ko Samuela kei Tevita? A sa kaya e dua, Raica erau sa tiko mai Naioci e Rama. 23A sa lako yani kina ko koya ki Naioci mai Rama: a sa curumi koya talega na Yalo ni Kalou, a sa lako yani ko koya ka parofisai lako, ka yaco sara ki Naioci mai Rama.
24A sa luvata talega ko koya na nonai sulu, ka parofisai talega ko koya e na mata i Samuela, a sa koto luvawale e na siga taucoko ko ya kei na bogi taucoko ko ya. O koya oqo sa kainaki kina, Sa tiko vata li ko Saula talega kei ira na parofita?
Currently Selected:
1 SAMUELA 19: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
