1 SAMUELA 15
15
Sa talai Saula na Kalou me vakarusai ira na Amalekaiti, 1-3. Sa vakasoqona nai valu ko Saula, 4,5; a sa lomani ira na kai Kenai, 6; a sa vakarusai ira na Amalekaiti, ka vakabulai Ekaki kei na manumanu, 7-9. Sa vunauci Saula matua ko Samuela, 10-23; a sa tukuna na nona cala ko Saula, ka masuti Samuela me rau lesu vata kaya, 24-31. Sa vakamatei Ekaki ko Samuela, ka qai lesu ki na nona vale, 32-35.
1A sa kaya vei Saula ko Samuela, Sa talai au ko Jiova me'u lumuti iko mo nodra tui na nona tamata, io, ko ira na Isireli: ia mo rogoca mada na nona vosa ko Jiova. 2Sa kaya vakaoqo ko Jiova ni lewe vuqa, Au sa nanuma tiko na ka ka kitaka vei ira na Isireli ko ira na Amalekaiti, ni sa lawa koto vei ira e na sala ni ra sa lako cake mai Ijipita. 3Oqo, mo la'ki yaviti ira na Amalekaiti, ka vakarusa na ka kecega sa tu vei ira, mo kakua ni lomani ira; mo vakamatea na tagane kei na yalewa, na gone lailai kei koya sa dramidrami, na pulumokau kei na sipi, na kameli kei na asa.
4A sa soqoni ira vata na tamata ko Saula, ka wiliki ira mai Tilaimi, e le rua na drau na udolu nai valu sa taubale, ka le tini na udolu na tamata ni Juta. 5A sa lako mai ko Saula ki na dua na nodra koro na Amalekaiti, ka lawa koto e na buca. 6A sa kaya vei ira na Kenaiti ko Saula, Dou lako tani, lako sobu maivei ira na Amalekaiti, de'u sa vakarusai kemudou vata kei ira; ni dou a caka vinaka vei ira kecega na Isireli ni ra sa lako cake mai Ijipita. A ra sa lako tani na Kenaiti maivei ira na Amalekaiti. 7A sa mokuti ira na Amalekaiti ko Saula, mai Avila ka yaco ki Suri, ko ya sa donui Ijipita. 8Ia ko Ekaki na nodra tui na Amalekaiti sa taura bula ko koya, ka vakarusai ira laivi na tamata kecega e nai seleiwau. 9Ia ko Ekaki, kei ira na sipi vinaka, kei na pulumokau, kei na manumanu uro, kei na luve ni sipi, kei na ka kecega sa vinaka, sa vakabula ko Saula kei ira na tamata, ka sa sega ni vakamatei ira laivi: ia na ka kecega sa vakasisila ka sega ni yaga era sa vakarusa sara.
10A sa lako mai na vosa ni Kalou kivei Samuela, ka kaya, 11Au sa veivutuni ni ka'u sa buli Saula me tui; ni sa vuki tani ko koya me kakua ni muri au, ka sega ni vakayacora na noqu vosa. A sa rarawa ko Samuela; a sa tagi vei Jiova e na bogi taucoko. 12Ia ni sa sou e na mataka ko Samuela me la'ki tavaki Saula e na mataka, sa tukuni vei Samuela, ka vaka, Sa lako mai ki Kameli ko Saula, ka raica, sa vakaduria e dua na nonai vakananumi, ka sa lako voli yani, ka lako sobu ki Kilikali.
13A sa lako mai kivei Saula ko Samuela, a sa kaya vua ko Saula, Me vakalougatataki iko ko Jiova; au sa vakayacora na vosa i Jiova. 14A sa kaya ko Samuela, Oi; ka cava na nodra tagi na sipi oqo, kei na domo ni pulumokau ka'u sa rogoca? 15A sa kaya ko Saula, Era sa kauti ira maivei ira na Amalekaiti; ia ko ira na tamata era sa vakabula na kena vinaka ni sipi kei na pulumokau, me ra vakacabora vei Jiova na nomu Kalou; ia sa ka tani keimami sa vakarusa laivi. 16A sa kaya vei Saula ko Samuela, Mo kua mada, me'u tukuna vei iko na ka sa kaya vei au e na bogi ko Jiova. A sa kaya vua ko koya, Mo tukuna mada mai.
17A sa kaya ko Samuela, Ni ko a ka lailai ga e matamu, ko a sega li ni buli mo nodra turaga na veimataqali i Isireli? Ka sa lumuti iko ko Jiova mo turaga vei ira na Isireli; 18a sa talai iko ko Jiova e na dua na sala, ka kaya, Mo la'ki vakamatei ira laivi na tamata ca, io ko ira na Amalekaiti, ka vala kei ira ka me ra oti mada. 19Ia ka cava ko sa sega kina ni vakarorogo ki na vosa i Jiova, ia ko a taura nai toki ni valu, ka kitaka na ka ca e na mata i Jiova? 20A sa kaya vei Samuela ko Saula, Ia ka'u sa vakarogoca na vosa i Jiova, ka'u a lako e na sala ka talai au kina ko Jiova, ia ka'u a kauti Ekaki mai na tui Amaleki, ia ko ira na Amalekaiti ka'u a vakamatea sara. 21Ia ko ira ga na tamata, era sa taura nai toki ni valu, na sipi kei na pulumokau, io, na ka talei sa dodonu me vakarusai, me ra vakacabora vei Jiova na nomu Kalou mai Kilikali. 22A sa kaya ko Samuela, Sa vinakata li ko Jiova nai soro kama kei nai madrali, me vaka sa vinakata ko koya na talairawarawa ki na vosa i Jiova? Raica, sa vinaka na talairawarawa, ka ca nai soro; sa vinaka na vakarorogo, ka ca na uro ni sipi tagane. 23Ni sa tautauvata na kena ca ni talaidredre kei na cakai sausau, ia na yalokaukauwa sa ka ca, ka vaka na dauqarava na matakau. Ni ko sa beca na vosa i Jiova, sa beci iko talega ko koya, mo kakua ni tui tiko. 24A sa kaya vei Samuela ko Saula, Au sa cala sara; ni ka'u sa talaidredre ki na vosa i Jiova, kei na nomu vosa: ni'u a rerevaki ira na tamata, ka vakarorogo ki na nodra vosa: 25ia, ka'u sa vakamasuti iko mo bokoca mada na noqu ca, ia me daru lesu tale, me'u ia nai soro vei Jiova. 26A sa kaya vei Saula ko Samuela, Au na sega ni lesu vata kei iko: ni ko sa beca na vosa i Jiova, sa beci iko ko Jiova, mo kakua ni tui tiko vei ira na Isireli. 27Ia ni sa vuki rubu ko Samuela me lako yani, sa taura ko koya na bui ni nonai sulu, a sa kadresu. 28A sa kaya vua ko Samuela, Sa kaliraka mai vei iko edaidai ko Jiova na matanitu ko Isireli, a sa solia vua e dua na kai nomu sa vinaka cake vei iko: 29ia ena sega ni vosa lasu se veivutuni ko koya na nodra Kaukauwa na Isireli: ni sa sega ni tamata ko koya me veivutuni rawa. 30A sa kaya ko koya, Au sa cala sara: ia oqo, mo vakarokorokotaki au mada e matadra na nodra qase na noqu tamata, kei na matadra na Isireli, ka me daru lesu mada me'u soro vei Jiova na nomu Kalou. 31A sa lesu tale ko Samuela, ka muri Saula, a sa ia nai soro vei Jiova ko Saula.
32Sa qai kaya ko Samuela, Kauti Ekaki mai vei au ki ke, o koya na nodra tui na Amalekaiti. A sa lako vakayalomamada mai vei koya ko Ekaki. Ni sa kaya ko Ekaki, Sa takali vakaidina na rarawa ni mate. 33A sa kaya ko Samuela, Me vaka sa vakamatei na luvedra na yalewa e na nomu i seleiwau, ena vakamatei vakakina na luvena na tinamu. A sa talaki Ekaki ko Samuela e na mata i Jiova mai Kilikali.
34A sa lako ki Rama ko Samuela; ka sa lako cake ki na nona vale ko Saula ki Kipea nei Saula. 35Ka sa sega ni raici Saula tale ko Samuela, ka yacova na siga sa mate kina; a sa tagicaki Saula ko Samuela. A sa veivutuni ko Jiova ni sa lesi Saula me nodra tui na Isireli.
Currently Selected:
1 SAMUELA 15: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
