1 SAMUELA 11
11
Era sa mai vala ki Jepesi ko ira na luve i Amoni, 1,2. Era sa talaki me tukuna vei Saula, a sa la'ki vukei ira ko Saula, ka mokuti ira na luve i Amoni, 4-11. Sa vakataudeitaki kina ko Saula me tui, 12-15.
1Sa qai lako cake ko Neasi na luve i Amoni, ka la'ki tiko vakaivalu voleka ki Jepesi-kiliati: a ra sa kaya ko ira kecega na kai Jepesi vei Neasi, Me da veiyalayalati mada, keimami na qai qaravi iko. 2A sa kaya vei ira ko Neasi na luve i Amoni, Na ka oqo ka'u na veiyalayalati kina kei kemuni, me'u leuta kecega na matamuni i matau, ka me'u cakava me ka ni veivakamaduataki vei ira kecega na Isireli.
3A ra sa kaya vua ko ira na qase ni Jepesi, Me tu mada ga me bogi vitu, me keimami tala na tamata eso ki na nodra yasana kecega na Isireli; ia kevaka sa sega e dua me vakabulai keimami, keimami na qai ucu yani vei iko. 4A ra sa lako mai nai talaki ki Kipea ka nei Saula, ka ra sa tukuna nai tukutuku oqo vei ira na tamata; a ra sa tabalaka cake na domodra ko ira na tamata kecega, ka tagi. 5Ka raica, sa muria na qele ni pulumokau ko Saula mai na veiwere; a sa kaya ko Saula, Sa ra vakaevei ko ira na tamata, ni ra sa tagi? A ra sa tukuna vua na nodra vosa na kai Jepesi. 6A sa curumi Saula na Yalo ni Kalou ni sa rogoca nai rogorogo ko ya, a sa waqa vakalevu na nona cudru. 7A sa taura ko koya e rua na pulumokau, ka tava vakalailai ka vakauta e na ligadra na tamata eso ki na veiyasana kecega e Isireli, ka kaya, Ko ira yadua sa sega ni lako mai me muri Saula kei Samuela, ena caka vakaoqo ki na nona pulumokau. A sa kani ira na tamata na rere vei Jiova, a ra sa lako mai me vaka era le dua ga na tamata. 8A sa wiliki ira ko koya mai Peseki, a ra sa le tolu na drau na udolu na Isireli, a ra sa le tolusagavulu na udolu na tamata i Juta.
9A ra sa kaya vei ira na tamata era a lako mai, Dou la'ki vosa vakaoqo vei ira na kai Jepesi-kiliati, E na mataka ni sa katakata mai na mata-ni-siga kemuni na vakabulai. A ra sa lako nai talaki, ka tukuna vei ira na kai Jepesi; a ra sa reki. 10A ra sa kaya ko ira na kai Jepesi, E na mataka keimami na ucu yani vei kemuni, ia kemuni na qai cakava vei keimami na ka kecega e vinaka vei kemuni.
11Ia e na mataka sa wasei ira na tamata ko Saula me sa tolu na mataivalu; a ra sa yaco mai ki na kedra maliwa nai valu ni sa ia tiko na veivuke yadra ni mataka, ka mokuti ira na luve i Amoni ka yacova na gau-ni-siga sa katakata; ia sa dui se ko ira ka vo, me sega ni tiko vata e le rua.
12A ra sa kaya vei Samuela na tamata, O cei ko koya sa kaya, Me tui li vei keda ko Saula? mo ni kauti ira mai na tamata oqori, me keimami vakamatei ira. 13A sa kaya ko Saula, Ena sega na tamata me vakamatei edaidai, ni sa ia na veivakabulai edaidai vei ira na Isireli ko Jiova.
14A sa kaya vei ira na tamata ko Samuela, Tou mai lako mada ki Kilikali, ka vakataudeitaka maikea na matanitu. 15A ra sa lako na tamata kecega ki Kilikali, a ra sa buli Saula me tui e na mata i Jiova mai Kilikali; a ra sa vakamatea kina eso nai soro ni veivinakati e na mata i Jiova; ka sa reki vakalevu maikina ko Saula kei ira kecega na Isireli.
Currently Selected:
1 SAMUELA 11: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
