1 PITA 5
5
Sa vakaroti ira nai talatala qase, kei ira nai talatala cauravou, kei ira na tamata kece, a sa tinia na nonai vola, 114.
1Au sa vakarota vei ira nai talatala qase era tiko vei kemudou, niu sa qase talega koi au, ka sa dautukutuku e na ka ka vosota na Karisito, ka sai taukei talega ni ukuuku ena vakaraitaki mai e na gauna maimuri: 2dou vakania na qele-ni-sipi ni Kalou era sa tiko vei kemudou, ka dou vakatawana, kakua ga e na loma e vosota, e na loma ga e vinakata; kakua ga e na vuku ni yau vakasisila, e na loma ga e rekitaka; 3ia dou kakua ni valavala vakaturaga vei ira sa nomudou i tavi, ia mo dou nodra i vakarau ga na qele ni sipi. 4Ia ni na rairai mai nai Vakatawa levu, dou na rawata kina nai sala vakaiukuuku ena sega ni malai rawa.
5Oi kemudou talega na cauravou, dou vakamalumalumutaki kemudou vei ira na qase. Io, dou dui vakamalumalumutaki kemudou vakai kemudou, ka dou vakaisulu e na yalomalumalumu: ni sa vorati ira na viavialevu na Kalou, ia sa solia nai solisoli loloma vei ira na yalomalumalumu. 6O koya oqo mo dou qai vakamalumalumutaki kemudou e ruku ni liga kaukauwa ni Kalou, me vakalevulevui kemudou cake ko koya e na gauna sa lokuci: 7ka dou biuta vei koya na nomudou lomaocaoca kecega, ni sa daunanumi kemudou ko koya.
8Dou yalomatua, dou vakatawa: sa veilakoyaki voli na nomudou meca na tevoro, me vaka na laioni sa tagi, a sa vakasaqara eso me tiloma: 9dou vorati koya ni dou sa tu dei e na vakabauta, ni dou sa kila sa vakayacori na ka rarawa vakakina vei ira na wekamudou era sa tiko voli e vuravura oqo.
10Ia na Kalou sa dauia na loloma kecega, o koya sa kacivi kemudou ki na nonai ukuuku tawa mudu e na vuku i Karisito Jisu, ni dou sa vakararawataki mada e na gauna eso, ena qai vakavinakataki kemudou sara, mo dou vakataudeitaki, mo dou vakaukauwataki. 11Me nona na lewa e na gauna kece ka sega ni mudu. Emeni.
12Au sa vola vakalailai ka ia nai vakaro, a sa kauta vei kemudou ko Silivenuse, o koya kau sa nanuma sa wekada dina, ia kau sa vakadinadina ni sa loloma dina ni Kalou dou sa tu dei kina. 13Sa loloma yani vei kemudou nai soqosoqo lewe ni lotu, mai Papiloni, era sa digitaki vata kei kemudou; sa vakakina ko Marika na luvequ. 14Dou dui veireguci vakai kemudou e na loloma. Me tu ga na vakacegu vei kemudou kecega sa tu vata kei Karisito Jisu. Emeni.
Currently Selected:
1 PITA 5: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific