1 TUI 5
5
Sa vakarau ko Solomoni me tara na vale ni soro, a sa vukei koya ko Airami, na tui Taia.
1A sa talai ira na nona tamata ko Airami na tui Taia vei Solomoni, ni sa rogoca oti ko koya sa lumuti ko koya me tui, mei sosomi kei tamana: ni sa lomani Tevita tikoga ko Airami. 2A sa talaki vei Airami ko Solomoni, ka kaya, 3O sa kilai Tevita na tamaqu, ni sa sega ni tara rawa e dua na vale ki na yaca i Jiova na nona Kalou, e na vuku ni valu sa voliti koya tikoga, ka me soli ira oti mada ko Jiova ki na ruku ni yavana. 4Ia oqo, sa vakacegui au ko Jiova na noqu Kalou e na veiyasana kecega; sa sega e dua na meca, ka sega ni yaco tiko e dua na ka ca. 5Ka raica, ka'u sa vaka me'u tara e dua na vale ki na yaca i Jiova na noqu Kalou, me vaka na ka ka kaya ko Jiova vei Tevita na tamaqu, ni sa kaya, A luvemu, o koya ka'u na vakatikora e na nomu i tikotiko vakaturaga me kemui sosomi, e na tara ko koya na vale ki na yacaqu. 6Ia oqo, mo vakarota me ra taya eso na sitari mai Lepanoni me noqu; ia era na tiko vata ko ira na noqu tamata kei ira na nomu tamata: ia ka'u na solia vei iko na kedrai voli na nomu tamata me vaka na ka kecega ko na kaya: ni ko sa kila sa sega na tamata vei keitou e kila na ta kau me vakataki ira na kai Saitoni.
7Ia ni sa rogoca ko Airami na vosa i Solomoni, sa marau vakalevu, ka kaya, Me vakavinavinakataki ko Jiova e na siga edaidai, o koya sa solia vei Tevita e dua na luvena sa vuku, me lewai ira na tamata oqo era lewe vuqa. 8Sa talaki talega vei Solomoni ko Airami, ka kaya, Au sa rogoca na ka ko sa talaki kina vei au; au na cakava na ka kecega ko sa vinakata e na vuku ni vu ni sitari, kei na vu ni damanu: 9ena kauta sobu mai Lepanoni ki na waitui ko ira na noqu tamata: ia ka'u na waqabilibilitaka mai waitui ki na tikina ko na tukuna vei au, ia ka'u na biuta ki kea, ko na qai vakauta; ia ko na kitaka na ka ka'u sa vinakata, ka ni ko soli kakana vei ira na noqu lewe-ni-vale.
10A sa solia vei Solomoni ko Airami na vu ni sitari kei na vu ni damanu, oqori kecega sa vinakata ko koya. 11A sa solia vei Airami ko Solomoni e tinikaono na oba na puseli witi, me kedra na nona lewe-ni-vale, kei na waiwai sa lauvutu e dua na udolu ka lima na drau na kaloni; sa solia vakaoqo vei Airami ko Solomoni e na veiyabaki yadua. 12A sa solia vei Solomoni ko Jiova na vuku, me vaka ka yalataka vua: a rau sa tiko veisaututaki ko Airami kei Solomoni: a rau sa ia na veiyalayalati.
13A sa lesia ko Solomoni na tui na tamata maivei ira kecega na Isireli: era sa lewe tolu na oba na tamata. 14A sa talai ira ki Lepanoni, e le dua na oba e na dua na vula, ka ra veitaravi; era sa vula dua mai Lepanoni, ka ra vula rua mai nodra koro: ia ko Etonirami sa nodra turaga na tamata sa lesi. 15A sa le vitu na oba na tamata i Solomoni sa daucola ka, a sa le walu na oba sa ta kau tiko mai na ulu-ni-vanua; 16kei ira talega na tamata nei Solomoni era lesi me vakaraica na cakacaka, era sa le tolu na udolu ka tolu na drau, era lewai ira na tamata era sa cakacaka tiko. 17A sa vakarota ko koya na tui ka ra sa kauta na vatu lelevu, na vatu dredre, na vatu sa ta oti, me tauyavutaka kina na vale. 18A ra sa taya ko ira na tamata dautara vale nei Solomoni, kei ira na tamata dautara vale nei Airami, kei ira na kai Kipali: a ra sa vakarautaka na kau kei na veivatu me tara kina na vale.
Currently Selected:
1 TUI 5: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
