1 VEIGAUNA 5
5
O ira ka tubu vei Rupeni, kei Kata, kei Manasa.
1Ia ko ira na luve i Rupeni ka tagane na ulumatua i Isireli, (ni sa ulumatua ko koya; ia ni sai valavala vakavelavela ni sa toro ki nai mocemoce i tamana, sa soli na nonai tutu vakaulumatua vei rau na tagane na luve i Josefa na luve i Isireli: ka sa sega ga ni wili nai tabatamata me vaka na vakaulumatua. 2Ia sa gumatua vei iratou na tuakana kei na tacina ko Juta, a sa vu mai vua na turaga sa levu cake; ka sa nei Josefa na ka vakaulumatua:) 3Io ko iratou na tagane na luve i Rupeni na ulumatua i Isireli: ko Enoke, kei Palu, ko Esironi, kei Kamai. 4O iratou na luve i Joeli ka tagane: ko Semaia, ko Koki, ko Semeai, 5ko Maika, ko Riaia, ko Peali, 6ko Piera, ko koya ka kauta tani vakabobula ko Tikilaci-pilineseri na tui Asiria: ko koya sa nodra turaga na Rupeni.
7Ia ko ira na tacina e na nodra veimataqali, ni sa wili nai tabatamata ni nodra kawa: ko Jieli sa liu, kei Sakaraia, 8kei Pela na luve i Asasi ka tagane, na luve i Sema ka tagane, na luve i Joeli ka tagane, o koya ka tiko mai Aroeri, ka yala ki Nipo kei Peali-mioni: 9A sa tiko e na vanua vaka ki na tu-i-cake ko koya, ka yala ki nai curucuru ki na veikau mai na uciwai ko Uferetisi, ni sa tubu me ka levu na nodra manumanu e na vanua ko Kiliati. 10Ia e na gauna i Saula era sa vala kei ira na Akiri: a ra sa mokuti ira: a ra sa tiko e na nodra veivale laca e na vanua kecega vaka ki na tu-i-cake mai Kiliati.
11Ia ko ira na luve i Kata era tiko donui ira e na vanua ko Pasani, ka yala ki Salika: 12ko Joeli sa liu, kei Safami na kenai karua, kei Janei, kei Safati mai Pasani: 13kei iratou na wekadratou e na mataqali i tamadratou: ko Maikeli, kei Mesulame, kei Sipa, kei Jorei, kei Jakani, kei Sia, kei Iperi, e lewe vitu. 14Oqo na tagane na luve i Epaieli na luve i Uri ka tagane, na luve i Jaroa ka tagane, na luve i Kiliati ka tagane, na luve i Maikeli ka tagane, na luve i Jisisei ka tagane, na luve i Jato ka tagane, na luve i Pusa ka tagane; 15ko Ei na luve i Apitieli ka tagane, na luve i Kuni ka tagane, era sa liu e na mataqali i tamadra. 16A ra sa tiko e Kiliati mai Pasani, kei na kena veikoro, kei na vanua veico kecega ni Seroni, e na nodra i yalayala. 17O ira kece oqo sa wili na nodra i tabatamata e na gauna i Jocame na tui Juta, kei na gauna i Jeropoami na tui Isireli.
18O ira na luve i Rupeni ka tagane, kei ira na Kata, ka dua na wase ni mataqali i Manasa, ko ira na tamata qaqa, era sa taura rawa nai sasabai kei nai seleiwau, ka dauvanataka na dakai dina, ka daukila nai valu, era le vasagavulu ka va na udolu, ka vitu na drau ka onosagavulu, era lako rawa e nai valu. 19A ra sa ia nai valu kei ira na Akari, kei Jeturi, kei Nefisi, kei Notapi. 20A ra sa vukei ni ra sa vala kei ira, a ra sa soli ko ira na Akari ki na ligadra, kei ira kece talega na nodra i to: ni ra sa tagi vua na Kalou e nai valu, a sa rogoci ira ko koya: ni ra sa vakararavi vua. 21A ra sa tokia na nodra manumanu; e lima na oba na nodra kameli, ka ruasagavulu ka lima na oba na sipi, ka rua na udolu na asa, ka le tini na oba na tamata. 22Ni ra sa moku mate na lewe vuqa, ni sa ka mai vua na Kalou nai valu. A ra sa tikotiko ga me kedrai sosomi ka yacova na veivakabobulataki.
23Ia ko ira na luvedra e dua na wase ni mataqali i Manasa, era sa tiko e na vanua oqo: era sa tubu me lewe vuqa mai Pasani, ka yacovi Peali-erimoni, kei Siniri, ka yacova na ulu-ni-vanua ko Erimoni. 24Ia ko ira oqo na turaga ni mataqali ni nodra qase, io ko Iferi, kei Isai, kei Ilieli, kei Asirieli, kei Jeremaia, kei Otevaia, kei Jatieli, era tamata qaqa, ka tamata rogo, era turaga ni mataqali ni nodra qase.
25Ia era sa talaidredre vua na Kalou ni nodra qase, ka lako vakatani me ra muria na veikalou ni lewe ni vanua oqori, ko ira ka vakarusa ko koya na Kalou e matadra. 26Ia na nodra Kalou na Isireli sa vakauqeta na yalo i Puli na tui Asiria, kei na yalo i Tikilaci-pilineseri na tui Asiria, a sa kauti ira tani, io ko ira na Rupeni, kei ira na Kata, ka dua na wase ni mataqali i Manasa, ka kauti ira ki Ela, kei Apori, kei Ara, kei na uciwai mai Kosani, ka yacova na gauna oqo.
Currently Selected:
1 VEIGAUNA 5: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
